చంద్రబాబుకు చేదు అనుభవం: నిలదీసిన కార్యకర్తలు

By Pratap

Published: Friday, January 13, 2012, 19:44 [IST]

తిరుపతి: తెలుగుదేశం పార్టీ అధ్యక్షుడు నారా చంద్రబాబు నాయుడికి చేదు అనుభవం ఎదురైంది. తిరుపతిలో శుక్రవారం సాయంత్రం ఓ హోటల్లో జరిగిన రైల్వే కోడూరు శాసనసభ నియోజకవర్గం కార్యకర్తల సమావేశంలో ఆయనకు ఈ పరిస్థితి ఎదురైంది. చంద్రబాబును పార్టీ కార్యకర్తలను నిలదీశారు. మద్యానికి, డబ్బులకు అమ్ముడుపోయిన వారికి పార్టీలో ప్రాధాన్యం లభిస్తోందని, నీతినిజాయితీ గలవారు పార్టీకి దూరమవుతున్నారని వారు విమర్శించారు. చంద్రబాబు ప్రసంగిస్తుండగా వారు ఆ విమర్శలకు దిగారు. కొంత మంది కార్యకర్తలు వారికి సర్ది చెప్పడానికి ప్రయత్నించారు. పార్టీని బలోపేతం చేయడానికి కార్యకర్తలు దూకుడుగా పని చేయాలని ఆయన సూచించారు. తెలుగుదేశం పార్టీ ప్రభుత్వ హయాంలో పథకాలు సరిగా అమలు కాలేదని కార్యకర్తలు విమర్శించారు. కార్యకర్తల విమర్శలతో చంద్రబాబు కంగు తిన్నారు.

వైయస్సార్ కాంగ్రెసు పార్టీ, తెలంగాణ రాష్ట్ర సమితి (తెరాస) కుమ్మక్కయ్యాయని చంద్రబాబు విమర్శించారు. తెలంగాణలో తన పర్యటనను తెరాస కార్యకర్తలు అడ్డుకున్నారని, జగన్ యాత్రకు పూలవర్షం కురిపించారని ఆయన అన్నారు. తెరాస, వైయస్సార్ కాంగ్రెసు కాంగ్రెసు పార్టీలో విలీనమవుతాయని ఆయన అన్నారు. చంద్రబాబు చాలా కాలం తర్వాత చిత్తూరు జిల్లాలోని తన స్వగ్రామం నారావారి పల్లెకు వచ్చారు. దాంతో నారావారిపల్లె పూర్తిగా పసుపుమయం అయింది. కుటుంబ సభ్యులతో ఆయన సంక్రాంతి పర్వదినం గ్రామంలో జరపుకోవాలని ఆయన నిర్ణయించుకున్నారు.

Published On January 13, 2012