మావోల మందుపాతరకు 13 మంది పోలీసుల బలి

By Pratap

Published: Saturday, January 21, 2012, 17:01 [IST]

రాయపూర్: జార్ఖండ్ రాష్ట్రంలో మావోయిస్టులు ఘాతుకానికి పాల్పడ్డారు. శక్తివంతమైన మందుపాతర పేల్చారు. ఈ ఘటనలో 11 మంది పోలీసులు మరణించినట్లు సమాచారం. ఇద్దరు గాయపడ్డారు. ఆ సంఘటన గార్వా జిల్లాలోని భందారియా పోలీసు స్టేషన్ పరిధిలోని అటవీ ప్రాంతంలో చోటు చేసుకుంది. యాంటీ ల్యాండ్‌మైన్ వాహనంలో పోలీసులు ప్రయాణిస్తుండగా నక్సలైట్లు మందుపాతర పేల్చారు. యాంటీ ల్యాండ్ మైన్ వాహనం తునాతునకలైంది.

బాద్గఢ్ వద్ద అడ్డంకులను తొలగించి బ్లాక్ డెవలప్ మెంట్ అధికారితో పాటు పోలీసులు తిరిగి వస్తుండగా మావోయిస్టులు మందుపాతర పేల్చారు. తన సొంత వాహనంలో ప్రయాణిస్తున్న బ్లాక్ డెవలప్ మెంట్ అధికారి సురక్షితంగా బయటపడ్డారు. యాంటీ ల్యాండ్‌మైన్ వాహనంలో డ్రైవర్ సహా 15 మంది పోలీసులు ఉన్నారు. పేలుడు తర్వాత పోలీసులకు చెందిన 14 ఆయుధాలను నక్సలైట్లు తీసుకుని వెళ్లారు. గాయపడిన ఇద్దరు పోలీసులు ఆస్పత్రిలో చికిత్స పొందుతున్నారు. మందుపాతర దాటికి పోలీసు వాహనం గాలిలో ఎగిరి కిందపడినట్లు చెబుతున్నారు.

Published On January 21, 2012