చిరు, బాలయ్య ఎన్నికల్లో పోటీపడరు: మురళీ మోహన్

By Srinivas

Published: Thursday, January 26, 2012, 15:36 [IST]

హైదరాబాద్: హీరో, తెలుగుదేశం పార్టీ నేత నందమూరి బాలకృష్ణ, తిరుపతి శాసనసభ్యుడు, కాంగ్రెసు నేత చిరంజీవి మధ్య ఎలాంటి విభేదాలు సృష్టించవద్దని తెలుగుదేశం పార్టీ నేత, ప్రముఖ సినీ నటుడు మురళీ మోహన్ గురువారం మీడియాకు సూచించారు. శంషాబాద్‌లో ఓ కార్యక్రమంలో పాల్గొనేందుకు ఆయన వచ్చారు. ఈ సందర్భంగా ఆయన మాట్లాడారు. చిరంజీవి, బాలకృష్ణలు ఇద్దరూ తనకు మంచి మిత్రులు అని ఆయన చెప్పారు. హీరోల అభిమానులు కూడా సినిమాలతో రాజకీయాలను ముడిపెట్టి అవసరంగా గొడవలకు దిగవద్దని కోరారు. చిరంజీవి, బాలకృష్ణలు ఒకరిపై మరొకరు ప్రత్యేకంగా ఎన్నికల్లో పోటీ పడే అవకాశమే లేదని అన్నారు.

కాగా గత కొన్ని రోజులుగా బాలకృష్ణ, చిరంజీవిల మధ్య వాగ్యుద్దం జరుగుతున్న విషయం తెలిసిందే. ఒకరిపై మరొకరు విమర్శలు చేసుకున్నారు. వీరి వాగ్యుద్ధం నేపథ్యంలో బుధవారం శ్రీ పొట్టి శ్రీరాములు నెల్లూరు, చిత్తూరు జిల్లాలోని తిరుపతిలో అభిమానుల మధ్య ఘర్షణ చోటు చేసుకుంది. ఎస్పీఎస్ నెల్లూరులో పోటా పోటీగా దిష్టిబొమ్మల దగ్ధానికి ప్రయత్నాలు జరగ్గా, తిరుపతిలోనూ ఉద్రిక్త పరిస్థితులు ఏర్పడ్డాయి.

Published On January 26, 2012