బెదిరింపులపై చర్యలు తీసుకోండి: కోదండరామ్ డిమాండ్

By Srinivas

Published: Thursday, January 26, 2012, 12:43 [IST]

హైదరాబాద్: తెలంగాణ ఉద్యోగ సంఘాల నేత స్వామి గౌడ్‌కు వస్తున్న బెదిరింపులకు ప్రభుత్వం చర్యలు తీసుకోవాలని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ గురువారం డిమాండ్ చేశారు. తెలంగాణ జెఏసి కార్యక్రమంలో ఆయన జెండావిష్కరణ చేశారు. ఈ సందర్భంగా ఆయన మాట్లాడారు. తెలంగాణ మంత్రులు ఉద్యమంలో పాల్గొంటే తెలంగాణ వచ్చేదని ఆయన అభిప్రాయపడ్డారు. తెలంగాణపై స్పష్టత ఇవ్వాలని ప్రధాన మంత్రి మన్మోహన్ సింగ్‌కు లేఖ రాస్తామన్నారు. విధ్వంసానికే మెట్రో రైలు ప్రాజెక్టు అన్నారు.

మరోవైపు తెలంగాణ భవనంలో తెలంగాణ రాష్ట్ర సమితి నేత నాయిని నర్సింహా రెడ్డి జెండాను ఆవిష్కరించారు. ఈ సందర్భంగా ఆయన మావోయిస్టులపై మండిపడ్డారు. మావోయిస్టులకు చిత్తశుద్ధి ఉంటే తెలంగాణ కోసం ప్రజల్లోకి వచ్చి పోరాడాలని సూచించారు. టిఆర్ఎస్‌పై మావోయిస్టు నేత జగన్ చేసిన వ్యాఖ్యలు వెంటనే ఉపసంహరించుకోవాలని డిమాండ్ చేశారు. మావోయిస్టుల సమస్యలపై పోరాటం చేసింది కేవలం టిఆర్ఎస్సేనని గుర్తుంచుకోవాలన్నారు. ఉనికి కోసమే జగన్ ఉద్యమ నేతలపై ఆరోపణలు చేస్తున్నారన్నారు. తెలంగాణ కోసం చిత్తశుద్ధితో పోరాటం చేస్తుంది కేవలం తమ పార్టీయేనన్నారు.

Published On January 26, 2012