చిరు ఎమ్మెల్యేలను కలుపరు, వారిని పంపరు: హరీష్

By Pratap

Published: Tuesday, February 14, 2012, 11:01 [IST]

హైదరాబాద్: తమను కలుపుకోవాలని అడిగితే ప్రజారాజ్యం పార్టీ శానససభ్యులను కాంగ్రెసు కలుపుకోవడం లేదని, తాము పార్టీలో ఉండబోమని వైయస్సార్ కాంగ్రెసు పార్టీ కండువాలు కప్పుకుని వచ్చినా వారిపై వేటు వేయడం లేదని తెలంగాణ రాష్ట్ర సమితి (తెరాస) హరీష్ రావు అన్నారు. స్పీకర్ సాక్షిగానే వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గం శానససభ్యులు విప్‌ను ధిక్కరించారని, వారిపై అనర్హత వేటు వేయడానికి అంతకన్నా సాక్ష్యం అక్కరలేదని ఆయన అన్నారు. ప్రజారాజ్యం పార్టీ శానససభ్యులు పదవులు స్వీకరించినా వారిని కాంగ్రెసు పార్టీలో కలుపుకోవడం లేదని ఆయన అన్నారు. స్పీకర్ చర్య వల్ల శానససభ గౌరవం తగ్గిపోతుందని ఆయన అన్నారు. అధికార పక్షం మాట తప్పితే నిలదీయాల్సిన బాధ్యత ప్రధాన ప్రతిపక్షం మీద, ప్రతిపక్ష నేత మీద ఉంటుందని, తెలంగాణపై మాట తప్పిన ప్రభుత్వాన్ని చంద్రబాబు నిలదీయాలని ఆయన అన్నారు. చంద్రబాబు ముఖం చాటేస్తున్నారని ఆయన విమర్శించారు. చంద్రబాబు తెలంగాణపై ప్రభుత్వాన్ని నిలదీస్తే తాము తెలుగుదేశం పార్టీ వెంట నడవడానికి సిద్ధంగా ఉన్నామని ఆయన అన్నారు.

శాసనసభలో తెలంగాణ రాష్ట్ర ఏర్పాటుకు తీర్మానం ప్రతిపాదించకపోతే కాంగ్రెసు, తెలుగుదేశం పార్టీలను పాతరేస్తామని తెలంగాణ రాష్ట్ర సమితి (తెరాస) శాసనసభా పక్ష నేత ఈటెల రాజేందర్ అన్నారు. శాసనసభ రేపటికి వాయిదా పడిన తర్వాత మంగళవారం ఆయన మీడియా ప్రతినిధులతో మాట్లాడారు. తెలంగాణ కోసం తీర్మానం ప్రతిపాదించాలని అడిగితే సభను వాయిదా వేసుకుని పారిపోయారని ఆయన వ్యాఖ్యానించారు. తాము లేవనెత్తిన తెలంగాణ అంశంపై కాంగ్రెసు, తెలుగుదేశం పార్టీ సభ్యులు నోరు విప్పడం లేదని ఆయన అన్నారు.

శాసనసభలో తెలంగాణ తీర్మానం ప్రతిపాదిస్తే మద్దతిస్తామని కాంగ్రెసు, తెలుగుదేశం పార్టీలు హామీ ఇచ్చాయని, ఆ హామీని నిలబెట్టుకోలేదని తెరాస శాసనసభ్యుడు పోచారం శ్రీనివాస రెడ్డి అన్నారు. తెలంగాణ ప్రజల ఆకాంక్ష మేరకు తెలంగాణ తీర్మానాన్ని సభలో ప్రతిపాదించాలని మాత్రమే తాము కోరామని ఆయన అన్నారు. తెలంగాణ అంశం కేంద్రం పరిధిలో ఉందని ముఖ్యమంత్రి కిరణ్ కుమార్ రెడ్డి అనడాన్ని ప్రస్తావిస్తూ శాసనసభలో తీర్మానం చేసి పంపితే బంతి కేంద్రంలో పడుతుందని, అదే తాము అడుగుతున్నామని ఆయన అన్నారు.

Published On February 14, 2012