ఎన్నికలు వస్తే వైయస్ జగన్‌దే గెలుపు: సబ్బం హరి

By Pratap

Published: Sunday, February 26, 2012, 14:42 [IST]

విశాఖపట్నం/ ఒంగోలు: ఎన్నికలంటూ వస్తే వైయస్సార్ కాంగ్రెసు పార్టీ అధ్యక్షుడు వైయస్ జగన్ విజయాన్ని ఎవరూ అడ్డుకోలేరని జగన్ వర్గానికి చెందిన కాంగ్రెసు పార్లమెంటు సభ్యుడు సబ్బం హరి అన్నారు. గ్రేటర్ విశాఖపట్నం మున్సిపల్ కార్పోరేషన్ పాలకవర్గం పదవీ కాలం ముగుస్తుండడంతో వైయస్సార్ కాంగ్రెసు పార్టీకి చెందిన 12 మంది కార్పోరేటర్లకు సన్మానం జరిగింది. ఈ కార్యక్రమానికి సబ్బం హరి హాజరయ్యారు. వైయస్ రాజశేఖర రెడ్డి మరణాన్ని తట్టుకోలేక ప్రాణాలు విడిచిన వారికి ఆర్థి సాయం చేస్తామని ఇచ్చిన హామీని ఎఐసిసి ఇంతవరకు నిలబెట్టుకోలేకపోయిందని ఆయన విమర్శించారు.

ప్రభుత్వానికి దమ్ము, ధైర్యం ఉంటే కోవూరు ఉప ఎన్నికలో గెలవాలని వైయస్ జగన్ వర్గానికి చెందిన కాంగ్రెసు శాసనసభ్యుడు బాలినేని శ్రీనివాస్ రెడ్డి సవాల్ విసిరారు. ఒంగోలులో ఏర్పాటు చేసిన వైయస్సార్ కాంగ్రెసు పార్టీ జిల్లా కార్యాలయాన్ని ఆయన ఆదివారం ప్రారంభించారు. రాష్ట్రంలో జరిగే ఉప ఎన్నికల్లో వైయస్సార్ కాంగ్రెసు పార్టీ ఘన విజయం సాధిస్తుందని ఎమ్మెల్సీ జూపూడి ప్రభాకర రావు అన్నారు. ఈ కార్యక్రమంలో ప్రకాశం జిల్లా పార్టీ కన్వీనర్ నూకసాని బాలాజీతో పాటు పలువురు నాయకులు, కార్యకర్తలు పాల్గొన్నారు.

Published On February 26, 2012