నేనొచ్చానని సిఎం రాకపోవచ్చు, నామోషీ వద్దు: జగన్

By Srinivas

Published: Sunday, March 11, 2012, 13:40 [IST]

హైదరాబాద్: బాధితులను పరామర్శించేందుకు తాను వచ్చానని తెలిసి ముఖ్యమంత్రి కిరణ్ కుమార్ రెడ్డి రాకపోవచ్చునని వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆదివారం అనుమానం వ్యక్తం చేశారు. హైదరాబాదులోని నాగోల్ ప్రాంతం సాయినగర్ కాలనీలో ఘోర అగ్ని ప్రమాదం జరిగిన విషయం తెలిసిందే. బాధితులను పరామర్శించేందుకు జగన్ వచ్చారు. ఈ సందర్భంగా ఆయన మీడియాతో మాట్లాడారు. ఈ ప్రమాదంలో సుమారు ఇళ్లు కాలిపోయి సుమారు 650 కుటుంబాలు రోడ్డున పడ్డాయని ఆయన ఆవేదన వ్యక్తం చేశారు. మొన్న తూర్పు గోదావరిలోనూ నాలుగు వందల గుడిసెలు కాలి పోయాయని, ఇప్పుడు ఇక్కడ కాలి పోయాయని అన్నారు. వీరిని ప్రభుత్వం వెంటనే ఆదుకోవాలని డిమాండ్ చేశారు. ప్రభత్వం స్పందించకపోతే బాధితులకు న్యాయం జరిగే వరకు తాను పోరాటం చేస్తానని అన్నారు.

ముఖ్యమంత్రి కిరణ్ కుమార్ రెడ్డి హైదరాబాదులో ఉండి కూడా పరామర్శకు రాలేక పోయారన్నారు. అందుకు నేను బాధపడుతున్నానని అన్నారు. నా స్థానంలో ఆయన వచ్చి ఉంటే బాగుండేదన్నారు. ఇప్పటికైనా పరిస్థితి గమనించి ఆయన రావాలని అన్నారు. జగన్ వచ్చాడని, మరెవరో వచ్చారని ఆయన రాకుండా ఉండకూడదన్నారు. ఇక్కడకు వచ్చి బాధితులకు తానున్నానని భరోసా కల్పించాలన్నారు. జగన్ వచ్చాడని నామోషిగా ఫీల్ కాకుండా స్పందించాలన్నారు. బాధితులకు ఆర్థిక సహాయం వెంటనే ప్రకటించాలన్నారు. ఐదు నెలల్లో బాధితులకు పక్కా ఇల్లు కట్టించాలన్నారు.

కాగా ఈ ప్రమాదంలో సుమారు ఆరు వందలకు పైగా గుడిసెలు కాలి పోయాయి. షార్ట్ సర్క్యూట్ కారణంగా ఈ ప్రమాదం జరిగినట్లుగా తెలుస్తోంది. ఈ ప్రమాదంలో ఓ బాలిక సజీవ దహనం కాగా మరో బాలిక తీవ్రంగా గాయపడింది. మృతి చెందిన బాలిక కుటుంబానికు రూ.10 లక్షలు ఎక్స్‌గ్రేషియా, బాధితులకు తక్షణ సహాయం అందించాలని వైయస్సార్ కాంగ్రెసు పార్టీ డిమాండ్ చేసింది.

Published On March 11, 2012