ఇక్కడి నుంచే పంపించేయకండి: మీడియాతో చిరంజీవి

By Pratap

Published: Tuesday, March 20, 2012, 19:45 [IST]

హైదరాబాద్: "నన్ను ఇక్కడి నుంచి ఢిల్లీకి అప్పుడే పంపించేయకండయ్యా'' అంటూ కాంగ్రెస్ నేత చిరంజీవి మీడియా ప్రతినిధులతో సరదాగా అన్నారు. కాంగ్రెస్ పార్టీ తరఫున రాజ్యసభ అభ్యర్థిగా నామినేషన్ వేసిన చిరంజీవికి మంగళవారం కూడా అసెంబ్లీ లాబీల్లో వివిధ పార్టీల ఎమ్మెల్యేల నుంచి అభినందనలు వెల్లువెత్తాయి. ఈ సందర్భంగానే అక్కడున్న మీడియా ప్రతినిధులు - "ఎప్పుడు ఢిల్లీకి వెళ్తున్నారు ?'' అని అడిగినప్పుడు ఆయన నవ్వుతూ.."తొందరేముంది ? నాలుగైదు రోజుల తర్వాత వెళ్తాను..అయినా నన్ను త్వరగా ఇక్కడి నుంచి పంపించాలని చూడకండయ్యా'' అని బదులిచ్చారు.

కాగా, రాజ్యసభకు వేసిన ఆరు నామినేషన్లు కూడా సక్రమంగానే ఉన్నాయని రాష్ట్ర ఎన్నికల ప్రధానాధికారి భన్వర్‌లాల్ చెప్పారు. దీంతో నలుగురు కాంగ్రెసు అభ్యర్థులు చిరంజీవి, పాల్వాయి గోవర్దన్ రెడ్డి, రేణుకా చౌదరి, రాపోలు ఆనందభాస్కర్, తెలుగుదేశం పార్టీ అభ్యర్థులు దేవేందర్ గౌడ్, సిఎం రమేష్ రాజ్యసభకు ఎన్నికైనట్లే. ఢిల్లీలో పార్టీ ప్రతిష్ట పెంచడానికి కృషి చేస్తానని దేవేందర్ గౌడ్ అన్నారు. రాజ్యసభ టికెట్లకు తాము డబ్బులిచ్చిన వచ్చిన ఆరోపణలను ఆయన ఖండించారు. చిన్న వయస్సులో తనకు రాజ్యసభ అవకాశం కల్పించారని, తాను పార్టీ ప్రతిష్టను పెంచడానికి పనిచేస్తానని రమేష్ అన్నారు.

Published On March 20, 2012