కెకెకు ఇవ్వకపోవడం మాకు హెచ్చరిక కాదు: పొన్నం

By Srinivas

Published: Tuesday, March 20, 2012, 8:28 [IST]

న్యూఢిల్లీ: పార్టీ సీనియర్ నేత కె కేశవ రావుకు రాజ్యసభ అవకాశం మరోసారి ఇవ్వనంత మాత్రాన అధిష్ఠానం తమకు హెచ్చరికలు జారీ చేసినట్ల్లు కాదని తెలంగాణ ప్రాంత కాంగ్రెస్ పార్టీ పార్లమెంటు సభ్యులు సోమవారం అన్నారు. సోమవారం ఇక్కడి జంతర్ మంతర్ వద్ద చిన్న రాష్ట్రాల సమాఖ్య ఆధ్వర్యంలో ధర్నా జరిగింది. కెకెతో పాటు కాంగ్రెస్ ఎంపీలు పొన్నం ప్రభాకర్, వివేక్, రాజయ్యలు హాజరయ్యారు. తమ సంఘీభావం ప్రకటించారు. ఈ సందర్భంగా పొన్నం మాట్లాడారు. కెకెను అధిష్ఠానం పక్కన పెట్టడాన్ని తాము హెచ్చరికగా భావించటం లేదన్నారు. రాజ్యసభ సభ్యుల ఎంపికలో పార్టీ నిర్ణయాన్ని తాము గౌరవిస్తామని, అయితే తెలంగాణ కోసం మాత్రం రాజీలేని పోరాటం చేస్తామని చెప్పారు. తెలంగాణపై తగ్గే ప్రసక్తి లేదన్నారు.

ఒక్కరిని పక్కన పెట్టిన అధిష్ఠానం ముగ్గురికి అవకాశం కల్పించిందని మరో ఎంపి వివేక్ గుర్తు చేశారు. కాబట్టి తెలంగాణకు అన్యాయం చేసినట్లు కాదని అన్నారు. నిజామాబాద్ పార్లమెంటు సభ్యుడు మధుయాష్కీ మాత్రం కేకే స్థానంలో ఆనంద భాస్కర్‌కు సీటు ఇవ్వటం పట్ల హర్షం వ్యక్తం చేశారు. ఆనంద భాస్కర్ కూడా తెలంగాణను సమర్థించిన వారేనన్నారు. ఆయన ఢిల్లీకి వచ్చి తెలంగాణ ఇవ్వాలని కోరుతూ అధిష్టానానికి వినతి పత్రాలు ఇచ్చారని తెలిపారు. కెకెకు ఇవ్వనందుకు బాధగా ఉన్నా, ఆనంద భాస్కర్‌కు ఇచ్చినందు వల్ల మాట్లాడలేని పరిస్థితి ఏర్పడిందని మధుయాష్కీ చెప్పారు.

Published On March 20, 2012