ముకేష్‌కు భద్రతపై సుప్రీం ప్రశ్న: బాలిక రేప్‌పై వ్యాఖ్య

By Pratap

Published: Wednesday, May 1, 2013, 18:51 [IST]

న్యూఢిల్లీ: భద్రత కల్పనపై సుప్రీంకోర్టు బుధవారం కేంద్ర ప్రభుత్వానికి ప్రశ్నలు సంధించింది. భారతదేశంలోని అతి సంపన్నుడైన ముకేష్ అంబానీకి ప్రభుత్వ భద్రత కల్పించాలనే నిర్ణయంపై వివరణ ఇవ్వాలని సుప్రీంకోర్టు కేంద్రాన్ని ఆదేశించింది. దేశరాజధాని ఢిల్లీలో తగిన భద్రత కల్పించి ఉంటే ఐదేళ్ల బాలికపై అత్యాచారం జరిగి ఉండేది కాదని అభిప్రాయపడింది.

ఐదేళ్ల బాలికపై అపార్టుమెంటులో ఇటీవల దారుణంగా అత్యాచారం జరిగిన విషయం తెలిసిందే. ఈ అత్యాచారాన్ని నిరసిస్తూ ఢిల్లీ వీధుల్లో నాలుగు రోజుల పాటు ప్రదర్శనలు జరిగాయి. ఆపార్టుమెంట్ భవనంలో సోదాలు నిర్వహించలేదని, అత్యాచారంపై ఫిర్యాదు చేయకుండా ఉండడానికి బాలిక తండ్రికి 2 వేల రూపాయల లంచం ఇవ్వజూపారని పోలీసులు తర్వాత అంగీకరించిన విషయం తెలిసిందే. బాలిక ఇంకా ఆస్పత్రిలో చికిత్స పొందుతోంది.

ఐదేళ్ల బాలికను ఇద్దరు వ్యక్తులు తమ ఆపార్టుమెంటులో రెండు రోజుల పాటు బంధించి దారుణంగా రేప్ చేశారు. పాప అరుపులు విని తల్లిదండ్రులు పాపను రక్షించారు. ఈ తర్వాత ఇద్దరు నిందితులను పోలీసులు అరెస్టు చేశారు.

రిలయన్స్ అధినేత ముకేష్ అంబానీకి సాయుధ కమెండోలతో కూడిన పూర్తి స్థాయి భద్రత కల్పించాలని ప్రభుత్వం ఈ నెలారంభంలో నిర్ణయం తీసుకుంది. ముకేష్ అంబానీకి జడ్ క్లాస్ భద్రత కల్పించాలని నిర్ణయం తీసుకుంది. ముకేష్ ఇండియన్ ముజాహిదీన్ నుంచి బెదిరింపులు వచ్చిన నేపథ్యంలో హోం మంత్రిత్వ శాఖ ఆ నిర్ణయం తీసుకుంది.

Published On May 1, 2013