ప్రచారానికే పరిమితమా?: పార్టీ నేతలకి విజయమ్మ క్లాస్

By Srinivas

Published: Sunday, June 2, 2013, 9:26 [IST]

హైదరాబాద్/ఏలూరు: వైయస్సార్ కాంగ్రెసు పార్టీ గౌరవాధ్యక్షురాలు, పులివెందుల శాసన సభ్యురాలు వైయస్ విజయమ్మ శనివారం పార్టీ అసెంబ్లీ సమన్వయకర్తలకు క్లాస్ పీకారు. నిత్యం ప్రజల్లోనే ఉంటూ పార్టీ కార్యక్రమాలతో పాటు, ప్రజా సమస్యల పైన ఎప్పటికప్పుడు స్పందించారని హితవు పలికారు.

ఆమె శ్రీ పొట్టి శ్రీరాములు నెల్లూరు, ప్రకాశం జిల్లాలకు చెందిన అసెంబ్లీ నియోజకవర్గాల సమన్వయకర్తలతో సమావేశం నిర్వహించారు. ఆమె ఒక్కొక్కరిని పిలిచి మాట్లాడారు. కేవలం ప్రచారానికే పరిమితం కావొద్దని, అది సరికాదని, గ్రూపు రాజకీయాలను విడిచి అందరు కలిసి కట్టుగా పని చేయాలని సూచించారు.

షర్మిల యాత్ర

వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి సోదరి షర్మిల మరో ప్రజా ప్రస్థానం పాదయాత్ర పశ్చిమ గోదావరి జిల్లాలో కొనసాగుతోంది. ఈ సందర్భంగా ఆమె పలు ప్రాంతాల్లో మాట్లాడారు. బెల్టు షాపుల పాపం తెలుగుదేశం పార్టీ అధ్యక్షుడు నారా చంద్రబాబు నాయుడుదేనని ఆరోపించారు.

ముఖ్యమంత్రి కిరణ్ కుమార్ రెడ్డి ప్రభుత్వం టార్గెట్ పెట్టి మరీ తాగిస్తోందన్నారు. బెల్టు షాపుల విషయంలో ప్రభుత్వం కాలర్ పట్టుకొని నిలదీయాల్సిన చంద్రబాబు అధికార కాంగ్రెసు పార్టీకి అమ్ముడుపోయారని ఆరోపించారు. శనివారం నాటికి షర్మిల పాదయాత్ర 166 రోజులు పూర్తయింది.

Published On June 2, 2013