20 ఏళ్లు జగన్ జైల్లోనే, అమ్మాకూతుళ్ల పోటీ: గాలి

By Pratap

Published: Thursday, July 4, 2013, 8:50 [IST]

చిత్తూరు: తాను చేసిన నేరాలకు వైయస్ససార్ కాంగ్రెసు పార్టీ అధ్యక్షుడు వైయస్ జగన్ 20 ఏళ్లు జైలు నుంచి బయటికి వచ్చే ప్రసక్తే లేదని తెలుగుదేశం పార్టీ నాయకుడు గాలి ముద్దుకృష్ణమ నాయుడు అన్నారు.. జగన్ జైలులో ఉంటే ముఖ్యమంత్రి పీఠం కోసం అమ్మ విజయమ్మ, చెల్లి షర్మిల పోటీ పడుతున్నారని వ్యాఖ్యానించారు.. ఉత్తరాఖండ్ వరద బాధితులను ఆదుకున్న తమ పార్టీ అధ్యక్షుడు చంద్రబాబుకు ప్రపంచవ్యాప్తంగా మంచిపేరు వచ్చిందన్నారు.

తెలంగాణా చిచ్చుపెట్టి రాష్ట్రాన్ని రావణ కాష్టంగా మార్చిన ఘనత సోనియాదేనని ఆరోపించారు. బుధవారం రా త్రి స్థానిక రాజు కాంప్లెక్స్‌లో జరిగిన కార్యకర్తల సమావేశంలో ఆయన మాట్లాడారు. పుంగనూరు ప్రజలు రెండు పర్యాయాలు తప్ప ప్రతిసారి తమ పార్టీని ఆదరించారని గుర్తు చేశారు. తన స్వగ్రామం చంద్రగిరి ప్రాంతంలో ఉన్నా అక్కడ గెలవడం తనకు సులభమైనా నగరిలో పోరాడి గెలిచానన్నారు.

రాజకీయాల్లో పారిపోతే లాభం లేదని పోరాడి సాధించాలన్నారు. రూ. 2 లక్షల కోట్లు ప్రజల సొమ్ము దోచుకున్న తల్లి కాంగ్రెస్‌ను, పిల్ల కాంగ్రెస్ అయిన వైసీపీని ప్రజలు తరిమికొట్టాలని పిలుపునిచ్చారు. అవినీతికి పాల్పడ్డ మంత్రులు, నేతలు 2014 నాటికి జైళ్లకు వెళ్లక తప్పదన్నారు.

స్థానిక ఎన్నికల కోసమే చంద్రబాబు నాయుడు ఈనెల 5న తిరుపతి ప్రాంతీయ సదస్సుకు వస్తున్నారని పార్టీశ్రేణులు భారీగా తరలి రావాలని తెలుగుదేశం పార్టీ శాసనసభ్యుడు బొజ్జల గోపాలకృష్ణా రెడ్డి పిలుపునిచ్చారు. అవినీతి కాంగ్రెస్, వైయస్సార్ కాంగ్రెసు పార్టీలకు ప్రజలు ఓట్లు వేయడానికి సిద్ధంగా లేరని, వచ్చేది తమ పార్టీ ప్రభుత్వమేనన్నారు.

Published On July 4, 2013