విశాఖలో కీచక సీఐ, యువతిపై అత్యాచార యత్నం, వీడియో తీసి చుక్కలు చూపించిన యువతి

విశాఖపట్నం: ఓ సమస్యపై తన వద్దకు వచ్చిన యువతికి అండగా నిలబడాల్సిందిపోయి.. అదను చూసుకుని ఆమెపై అఘాయిత్యానికి యత్నించాడు ఓ ఖాకీ. కానీ ఆమె తెలివిగా అతడి ప్రవర్తనను వీడియో తీసి పై అధికారులకు అందించింది. అంతే- సదరు ఖాకీ చేతికి సస్పెన్షన్ ఆర్డర్ అందింది.

అసలేం జరిగిందంటే.. వారణాసికి చెందిన ఓ యువకుడు విశాఖపట్నంలోని ఫోర్ పాయింట్స్ హోటల్‌లో పనిచేస్తున్నాడు. మలేసియాలో సాఫ్ట్‌వేర్ ఇంజనీర్‌గా పనిచేస్తున్న ఓ యువతితో అతడు ప్రేమలో పడ్డాడు.

ఈ నేపథ్యంలో ఆ యువతి కూడా మలేసియా నుంచి వచ్చేసి, కొద్ది నెలల క్రితం తన ప్రియుడు పనిచేసే హోటల్‌లోనే చేరింది. ఈ క్రమంలో ఇద్దరి మధ్య ఏం జరిగిందో తెలియదుకానీ ఆ యువకుడు గత నవంబర్‌లో వైజాగ్ నుంచి పరారయ్యాడు.

దీంతో ఆ యువతి నవంబర్ 18న స్థానిక త్రీటౌన్ పోలీసుస్టేషన్‌లో ఫిర్యాదు చేసింది. పరారైన ఆమె ప్రియుడు పంజాబ్‌లోని లుథియానాలో ఉన్నాడని గుర్తించిన పోలీసులు అక్కడికెళ్లి అతడ్ని అదుపులోకి తీసుకున్నారు.

అనంతరం లుథియానా కోర్టులో అతడ్ని హాజరుపరిచి, ఆ తరువాత విశాఖకు తీసుకొచ్చి, జైలుకు తరలించారు. ఇక్కడే ఆ యువతి సీఐ వెంకటరావు సహాయం కోరింది. కాబోయే వాడిని జైలుకు పంపితే, ఆ కోపంతో అతడు తనను పెళ్లిచేసుకోడేమో అనేది ఆమె బాధ.

ఆ యువతి పరిస్థితిని ఆసరాగా తీసుకున్న ఖాకీ కామాంధుడు త్రీటౌన్ పోలీస్‌స్టేషన్ సీఐ వెంకటరావు ఆమెను లోబరుచుకునేందుకు ప్రయత్నించాడు. డిసెంబర్ 28న ఆమె ఉంటున్న హోటల్‌లోనే మరో గదికి తీసుకెళ్లి.. లైంగిక దాడికి యత్నించాడు.

అయితే ఖాకీచకాన్ని ఆ యువతి తెలివిగా వీడియో తీసి మంగళవారం పోలీస్ కమిసనర్‌కు పంపించింది. ప్రాథమిక విచారణలో సీఐ వెంకటరావుపై వచ్చిన ఆరోపణలు నిజమేనని తేలడంతో ఉన్నతాధికారులు అతడ్ని సస్పెండ్ చేశారు.

English summary

Vishakhapatnam three town CI Venkat Rao suspended for comitting sexual assault on a woman, when she asked him for help in lover arrest case.