ఆంధ్ర బిడ్డ, 5 భాషల మాంత్రికుడు: నేర సామ్రాజ్యం సృష్టించిన బీటెక్ డ్రాపౌట్!

బెంగళూరు కేంద్రంగా పనిచేస్తూ దేశవ్యాప్తంగా పోలీసులను ముప్పుతిప్పలు పెట్టిన 25 ఏళ్ల మోసగాడు కారుపాటి అజయ్ చివరకు కోల్‌కతా బిధాన్‌నగర్ పోలీసులకు పట్టుబడ్డాడు. 8 రాష్ట్రాల్లోని అమాయక బాధితుల నుంచి రూ. 2 కోట్లకు పైగా దోచుకున్న ఈ మోసగాడిని అరెస్టు చేయడానికి, పోలీసులు ఒక ప్రత్యేకమైన 'వాట్సాప్ కోఆర్డినేషన్ నెట్‌వర్క్‌'ను ఉపయోగించడం ఈ కేసులో కీలక మలుపుగా నిలిచింది. ఆంధ్రప్రదేశ్‌కు చెందిన అజయ్ బీటెక్ డ్రాపౌట్ కావడం గమనార్హం. ఇతను బెంగళూరులోని చన్నసాంద్ర ప్రాంతంలో నివాసం ఉండేవాడు. ఇతనిపై పశ్చిమ బెంగాల్, సిక్కిం, కర్ణాటక, ఆంధ్రప్రదేశ్, మహారాష్ట్ర, ఉత్తరాఖండ్, తెలంగాణ, కేరళ, పుదుచ్చేరి వంటి ప్రాంతాల్లో మొత్తం 11 ఎఫ్‌ఐఆర్‌లు నమోదయ్యాయి.

హై-ఎండ్ బ్రాండ్స్ 'ఫ్యాషన్ డిజైనర్‌'గా నటించి..
అజయ్ ఎంచుకున్న మోసాల పద్ధతి చాలా తెలివైనది. ఇతను ముఖ్యంగా హాస్టల్స్, గెస్ట్‌హౌస్‌లలో ఉండే ఉన్నత వర్గానికి చెందిన వ్యక్తులను లక్ష్యంగా చేసుకునేవాడు. తాను హై-ఎండ్ అంతర్జాతీయ బ్రాండ్‌లకు ఫ్యాషన్ డిజైనర్‌గా పనిచేస్తున్నానని నమ్మిస్తూ పరిచయం పెంచుకునేవాడు.
బాధితులు పూర్తిగా నమ్మిన తర్వాత, వారు నిద్రిస్తున్న సమయంలో వారి ఫోన్‌లు, ల్యాప్‌టాప్‌లు, క్రెడిట్/డెబిట్ కార్డులను చాకచక్యంగా దొంగిలించేవాడు. దొంగిలించిన కార్డులను ఉపయోగించి పెద్ద మొత్తంలో బంగారం, ఐఫోన్‌లు కొనుగోలు చేసి, వాటిని తక్కువ ధరకు అమ్మి త్వరగా నగదుగా మార్చుకునేవాడు. దొంగిలించిన మొత్తాన్ని అతను ప్రధానంగా తన ఆన్‌లైన్ జూదం, క్రిప్టోకరెన్సీ ట్రేడింగ్ వ్యసనాలకు ఉపయోగించేవాడని పోలీసులు గుర్తించారు.

పోలీసులను తప్పించుకునే ప్లాన్ మామూలుగా లేదు..
తెలుగు, కన్నడ, ఇంగ్లీష్, హిందీ నేపాలీ... ఇలా 5 భాషలలో అనర్గళంగా మాట్లాడగలిగే అజయ్.. పోలీసుల దృష్టిని మళ్లించడానికి అనేక జాగ్రత్తలు తీసుకునేవాడు. ప్రతి మోసం కోసం కొత్త సిమ్ కార్డును ఉపయోగించేవాడు. అనేక నకిలీ ఆధార్ ఐడీలను సృష్టించాడు. నకిలీ పత్రాలపై అన్నింటిలోనూ ఒకే ఫోటోను ఉపయోగించి, తన గుర్తింపు నకిలీ అని తెలియకుండా చూసుకునేవాడు.

'ఆల్ స్టేట్స్ vs అజయ్ K' వాట్సాప్ గ్రూప్‌తో దొరికిన నిందితుడు
జూలై 29న కోల్‌కతాలో రూ.50 లక్షలు పోగొట్టుకున్న బాధితుడి ఫిర్యాదుతో దర్యాప్తు ప్రారంభమైంది. ఇతర రాష్ట్రాల నుంచి కూడా ఒకే రకమైన నేరాల ఫిర్యాదులు రావడంతో, కేరళ పోలీసులు చొరవ తీసుకొని "All States vs Ajay K Investigation" పేరుతో ఒక వాట్సాప్ గ్రూప్‌ను ఏర్పాటు చేశారు. ఈ గ్రూప్‌లో పశ్చిమ బెంగాల్, కేరళ, తెలంగాణ, కర్ణాటక సహా పలు రాష్ట్రాల అధికారులు చేరి, అజయ్‌ ఫోటోలు, స్థాన వివరాలు, దర్యాప్తు అప్‌డేట్‌లను రియల్ టైమ్‌లో పంచుకున్నారు. ఈ సమన్వయమే చివరకు అక్టోబర్ 25న కోల్‌కతాలో అజయ్‌ను అరెస్ట్ చేయడానికి దారితీసింది.

తెలివైన విద్యార్థి నుంచి సీరియల్ నేరగాడిగా...
సాధారణ నేపథ్యం నుంచి వచ్చిన అజయ్ బాల్యంలో తెలివైన విద్యార్థిగా ఉండేవాడు. అతని తండ్రి బెంగళూరులో చెత్త ట్రక్కు డ్రైవర్‌గా పనిచేసేవారు. అయితే బీటెక్ మధ్యలోనే మానేసిన తర్వాత అజయ్ కుటుంబంతో సంబంధాలు పూర్తిగా తెంచుకున్నాడు. 2023లో తల్లి మరణించినప్పుడు కూడా అతను ఇంటికి రాలేదని కుటుంబ సభ్యులు కన్నీటి పర్యంతమయ్యారు. అరెస్ట్‌కు ముందు అజయ్ రాంచీకి పారిపోవడానికి ప్లాన్ చేసినట్లు పోలీసులు తెలిపారు.

English summary

A 25-year-old Bengaluru-based Andhra Pradesh native, with fluency in five languages, allegedly duped victims across eight states of more than Rs.2 crore using hotel stay scams, stolen cards and crypto gambling.