174 నియోజకవర్గాలు ఒక ఎత్తు.. ఇదొక్కటే మరో ఎత్తు

ఆంధ్రప్రదేశ్ అసెంబ్లీ ఎన్నికల సమరాంగణాన హోరాహోరీగా పోరాడేందుకు ప్రధాన పార్టీలన్నీ సిద్ధమవుతున్నాయి. జనసేన పార్టీతో పొత్త ఉన్న నేపథ్యంలో తెలుగుదేశం 94 నియోజకవర్గాలకు అభ్యర్థులను ప్రకటించగా, తనకు కేటాయించిన 24 నియోజకవర్గాల్లో జనసేన ఐదుగురు అభ్యర్థులను ప్రకటించింది.

మూడు లోక్ సభ స్థానాలకు అభ్యర్థులను ఎంపిక చేయాల్సి ఉంది. బీజేపీ కలిసివస్తే ఈ పార్టీతోపాటు టీడీపీ, జనసేన కలిసి కూటమిగా ఏర్పడనున్నాయి. ఈ మూడు పార్టీల కూటమిని ఎదుర్కొనేందుకు వైసీపీ వ్యూహ ప్రతివ్యూహాలను సిద్ధం చేస్తోంది.

ఉమ్మడి శ్రీకాకుళం జిల్లాలో కీలకమైన ఎస్సీ నియోజకవర్గం రాజాం. గత ఎన్నికల్లో వైసీపీ తరఫున పోటీచేసిన కంబాల జోగులు విజయం సాధించారు. టీడీపీ తరఫున పోటీచేసిన మాజీ మంత్రి కొండ్రు మురళీమోహన్ పై 16,848 ఓట్ల మెజారిటీతో గెలుపొందారు. 2014 ఎన్నికల్లో కూడా జోగులు టీడీపీ అభ్యర్థిని కావలి ప్రతిభాభారతిపై 512 ఓట్ల మెజారిటీతో విజయం సాధించారు.

2009 ఎన్నికల్లో కాంగ్రెస్ తరఫున పోటీచేసిన కొండ్రు మురళీమోహన్ టీడీపీ అభ్యర్థి కావలి ప్రతిభాభారతిపై 27,133 ఓట్ల తేడాతో విజయాన్ని దక్కించుకున్నారు. నియోజకవర్గాల పునర్విభజనలో భాగంగా 2009 నాటికి ఎస్సీ నియోజకవర్గంగా మారింది.

గతంలో ఇది జనరల్ నియోజకవర్గంగా ఉన్న సమయంలో తెలుగుదేశం పార్టీకి కంచుకోటగా మారింది. 1983లో పార్టీ ఆవిర్భావం నుంచి 1994 ఎన్నికలు మినహా అన్ని ఎన్నికల్లో 2004 వరకు కమిడి కళా వెంకట్రావు 5సార్లు విజయం సాధించారు.

వైసీపీ తరఫున కంబాల జోగులకే సీటు దక్కుతుందా? టీడీపీ నుంచి ఎవరు పోటీచేయనున్నారు? అనే ఉత్కంఠ నియోజకవర్గంలో కొనసాగుతోంది. రెండోసారి అధికారంలోకి రావాలనే పట్టుదలతో వైసీపీ ఉంది. కూటమిగా ఏర్పాటై ఘనవిజయం సాధిస్తామనే ధీమాలో టీడీపీ ఉంది. విజయం ఏ పార్టీని వరిస్తుందో చూడాలి.

English summary

Rajam is a key SC constituency in the joint Srikakulam district. Kambala Jogulu, who contested on behalf of YCP in the last election, won. He won with a majority of 16,848 votes against former minister Kondru Murali Mohan who contested on behalf of TDP