జగన్ పార్టీకి శాశ్వత ఎన్నికల గుర్తుగా సీలింగ్ ఫ్యాన్

న్యూఢిల్లీ: కడప పార్లమెంటు సభ్యుడు వైయస్ జగన్మోహన్ రెడ్డి నేతృత్వంలోని వైయస్సార్ కాంగ్రెసు పార్టీ ఎన్నికల గుర్తు ఫ్యాన్‌ను శాశ్వతంగా ఆ పార్టీకే కేటాయిస్తూ బుధవారం కేంద్ర ఎన్నికల సంఘం ఉత్తర్వులు జారీ చేసింది. శాసన సభలోనూ, పార్లమెంటులోనూ సభ్యుల సంఖ్య ప్రమాణాల మేరకు ఉండడంతో గత ఎన్నికల్లో తాత్కాలికంగా కేటాయించిన ఫ్యాన్ గుర్తును శాశ్వతం చేస్తూ నోటిఫికేషన్ విడుదల చేసింది.

2011 మార్చి 12న ఆవిర్భవించిన వైయస్సార్ కాంగ్రెసు ఆ తర్వాత అదే గుర్తుపై రాష్ట్రంలో పలు ఉప ఎన్నికలను ఎదుర్కొంది. 2011 మే నెలలో కడప లోకసభ, పులివెందుల శాసన సభ స్థానాలకు జరిగిన ఉప ఎన్నికల్లో వైయస్ జగన్, వైయస్ విజయమ్మ సీలింగ్ ఫ్యాన్ గుర్తుతోనే విజయం సాధించారు.

తర్వాత 2012 మార్చిలోను, జూన్‌లోను జరిగిన ఉప ఎన్నికల్లో నెల్లూరులోకసభతో పాటు 16 అసెంబ్లీ స్థానాల ఎన్నికల్లో కూడా వైయస్సార్ కాంగ్రెసు పార్టీ అభ్యర్థులు సీలింగ్ ఫ్యాన్ గుర్తు పైనే పోటీ చేసి గెలుపొందారు. తర్వాత పార్టీ ప్రమేయం లేని స్థానిక సంస్థల ఎన్నికల్లోను ఆశించిన విజయం సాధించింది.

ఈ నేపథ్యంలో వచ్చే లోకసభ, శాసన సభ సాధారణ ఎన్నికల్లో కామన్ సింబల్‌గా సీలింగ్ ఫ్యాన్ గుర్తునే కేటాయించాలని కోరూతూ డిసెంబర్ 1న, 3న పార్టీ సిఈసి సభ్యులు ఈసికి వేర్వేరుగా లేఖలు రాశారు. దీంతో ఈ గుర్తును కేటాయించారు.

English summary

The EC on Wednesday awarded the fan symbol to the YSR Congress Party. The party was only registered with the EC, and not recognised so far.