సామాన్యుడికి ‘అదానీ’ గ్యాస్ ఊరట: పీఎన్జీ, సీఎన్‌జీ ధరలపై భారీ తగ్గింపు!

దేశంలో పరిశుభ్ర ఇంధన వినియోగాన్ని పెంచడమే లక్ష్యంగా కేంద్ర ప్రభుత్వం కీలక అడుగు వేసింది. పెట్రోలియం అండ్ నేచురల్ గ్యాస్ రెగ్యులేటరీ బోర్డు (పీఎన్‌జీఆర్‌బి) కొత్త టారిఫ్ విధానం అమల్లోకి రావడంతో అదానీ టోటల్ గ్యాస్ (ATGL), గెయిల్ (GAIL), ఐజీఎల్ (IGL) వంటి ప్రధాన సంస్థలు తమ గ్యాస్ ధరలను తగ్గించాయి. జనవరి 1, 2026 నుండి ఈ కొత్త ధరలు అమలులోకి వచ్చాయి.

ఏమిటీ కొత్త టారిఫ్ విధానం?

ఇప్పటివరకు సహజ వాయువు రవాణాకు దూరాన్ని బట్టి మూడు వేర్వేరు టారిఫ్ జోన్లు ఉండేవి. దీనివల్ల గ్యాస్ ఉత్పత్తి కేంద్రాలకు దూరంగా ఉన్న నగరాల్లో ధరలు ఎక్కువగా ఉండేవి. ఇప్పుడు ఈ మూడు జోన్లను రెండుగా (300 కిలోమీటర్ల వరకు ఒక జోన్, ఆ పైన రెండో జోన్) కుదించారు. దేశవ్యాప్తంగా సీఎన్‌జీ, గృహ వినియోగ పీఎన్‌జీకి మిలియన్ బ్రిటిష్ థర్మల్ యూనిట్‌కు (MMBtu) రూ.54 చొప్పున ఏకరీతి రవాణా ధరను నిర్ణయించారు. దీనివల్ల రవాణా ఖర్చులు తగ్గి, వినియోగదారులపై భారం తగ్గింది.

ఎక్కడ.. ఎంత తగ్గింది?

ప్రముఖ పంపిణీ సంస్థ అదానీ టోటల్ గ్యాస్ లిమిటెడ్ (ATGL) వివిధ ప్రాంతాల్లో గ్యాస్ ధరలను రూ.4 వరకు తగ్గించింది. గుజరాత్, మధ్యప్రదేశ్-మహారాష్ట్ర ప్రాంతాలలో సీఎన్‌జీ కిలోకు రూ.0.50-రూ.1.90, పీఎన్‌జీ ప్రామాణిక క్యూబిక్ మీటర్‌కు రూ.1.10 వరకు తగ్గింది. రాజస్థాన్, పంజాబ్, హర్యానా-ఎన్‌సీఆర్, ఉత్తర మధ్యప్రదేశ్, సరిహద్దు ఉత్తరప్రదేశ్‌లలో సీఎన్‌జీ కిలోకు రూ.1.40-రూ.2.55, గృహ పీఎన్‌జీ ప్రామాణిక క్యూబిక్ మీటర్‌కు రూ.1.10-రూ.4.00 తగ్గింది. మధ్య, తూర్పు భారతదేశంలో సీఎన్‌జీ రూ.1.81-రూ.4.05, పీఎన్‌జీ రూ.4.00 వరకు తగ్గాయి. ఈ ధరల సవరణలు జనవరి 1, 2026 నుండి అమలులోకి వచ్చాయి. ఏటీజీఎల్ తో పాటు, గెయిల్ గ్యాస్ లిమిటెడ్ సీఎన్‌జీ, పీఎన్‌జీ ధరలను రూ.1 తగ్గించింది. ఇంద్రప్రస్థ గ్యాస్ లిమిటెడ్ (ఐజీఎల్) ఢిల్లీ, ఎన్‌సిఆర్ పట్టణాల్లో గృహ పీఎన్‌జీని ప్రామాణిక క్యూబిక్ మీటర్‌కు రూ.0.70 తగ్గించింది. థింక్ గ్యాస్ సీఎన్‌జీపై రూ.2.50, పీఎన్‌జీపై ఏకంగా రూ.5 వరకు తగ్గించింది.

ప్రభుత్వ లక్ష్యం: 2030 నాటికి 15 శాతం వాటా

ప్రస్తుతం భారతదేశ మొత్తం ఇంధన వినియోగంలో సహజ వాయువు వాటా కేవలం 6 శాతం మాత్రమే ఉంది. కాలుష్యాన్ని తగ్గించి, పర్యావరణ హిత ఇంధనాలను ప్రోత్సహించడానికి 2030 నాటికి ఈ వాటాను 15 శాతానికి పెంచాలని కేంద్రం లక్ష్యంగా పెట్టుకుంది. ఈ క్రమంలో గ్యాస్ ధరలను తగ్గించడం వల్ల రవాణా రంగం, గృహ వినియోగదారులు సహజ వాయువు వైపు మొగ్గు చూపుతారని ప్రభుత్వం భావిస్తోంది.

"గ్యాస్ రవాణా ఛార్జీలను సరళీకృతం చేయడం వల్ల కోట్లాది మంది వినియోగదారులకు నేరుగా ఆర్థిక ప్రయోజనం కలుగుతుంది. ఇది సహజ వాయువును సామాన్యులకు మరింత అందుబాటులోకి తెస్తుంది." — సురేష్ పి మంగ్లానీ, సీఈఓ, అదానీ టోటల్ గ్యాస్ లిమిటెడ్.

వినియోగదారులకు కలిగే ప్రయోజనాలు:

పెట్రోల్, డీజిల్ ధరలతో పోలిస్తే సీఎన్‌జీ మరింత చౌకగా మారడంతో వాహన నిర్వహణ ఖర్చు తగ్గుతుంది. సిలిండర్లతో పోలిస్తే పైప్డ్ గ్యాస్ (PNG) మరింత పొదుపుగా మరియు సురక్షితంగా మారుతుంది. పరిశుభ్రమైన ఇంధనం కావడం వల్ల నగరాల్లో కాలుష్యం తగ్గుతుంది.

English summary

The PNGRB tariff reform unifies transport zones and reduces CNG and household PNG prices across India, easing consumer costs and promoting cleaner energy use. The changes, effective from January 1, 2026, aim to lower input costs for distributors and accelerate clean fuel adoption in the transport and residential sectors.