అప్పుడు పని మనిషి.. ఇప్పుడు గృహ నిర్మాణశాఖ సహాయ మంత్రి..
పశ్చిమ బెంగాల్లో కొత్త ప్రభుత్వం ఏర్పడిన అనంతరం మంత్రివర్గ శాఖల కేటాయింపులు ఖరారయ్యాయి. రాష్ట్ర పాలనను మరింత సమర్థవంతంగా నిర్వహించాలనే లక్ష్యంతో ముఖ్యమంత్రి సువేందు అధికారి తన మంత్రివర్గ సహచరులకు శాఖలను పంపిణీ చేశారు. అయితే రాష్ట్ర భద్రత, శాంతిభద్రతల పరిరక్షణకు అత్యంత కీలకంగా భావించే హోంశాఖను ఆయన స్వయంగా తన వద్దే ఉంచుకోవడం రాజకీయ వర్గాల్లో చర్చనీయాంశంగా మారింది.
ప్రభుత్వ పరిపాలనలో వేగం పెంచడం, ఎన్నికల సమయంలో ప్రజలకు ఇచ్చిన హామీల అమలుపై ప్రత్యేక దృష్టి పెట్టడం కోసం శాఖల కేటాయింపులు చేసినట్లు అధికార వర్గాలు పేర్కొంటున్నాయి. అనుభవజ్ఞులైన నాయకులతో పాటు కొత్తగా ఎన్నికైన పలువురికి కూడా కీలక బాధ్యతలు అప్పగించడం విశేషం.
ఇంటి పనిమనిషి నుంచి సహాయ మంత్రిగా..
ఈ మంత్రివర్గ కూర్పులో అత్యంత ప్రేరణాత్మక కథగా నిలిచింది కలితా మాఝీ రాజకీయ ప్రయాణం. ఒకప్పుడు ఇంటి పనిమనిషిగా పనిచేసిన ఆమె, ప్రజాసేవ పట్ల ఆసక్తితో రాజకీయాల్లోకి అడుగుపెట్టి ఇప్పుడు రాష్ట్ర మంత్రివర్గంలో చోటు సంపాదించారు. ఆమెకు గృహనిర్మాణ శాఖ సహాయ మంత్రిగా బాధ్యతలు అప్పగించారు.
ఇటీవల జరిగిన అసెంబ్లీ ఎన్నికల్లో తూర్పు వర్ధమాన్ జిల్లా ఔస్గ్రామ్ నియోజకవర్గం నుంచి పోటీ చేసిన కలితా మాఝీ, అధికార పార్టీ టీఎంసీ అభ్యర్థిపై 12,535 ఓట్ల భారీ మెజారిటీతో విజయం సాధించారు. సామాన్య కుటుంబం నుంచి వచ్చిన ఆమెకు మంత్రి పదవి దక్కడం రాష్ట్ర రాజకీయాల్లో ప్రత్యేక చర్చకు దారితీసింది.
జర్నలిస్టు నుంచి ఆర్థిక మంత్రిగా స్వపన్ దాస్గుప్తా
ప్రముఖ జర్నలిస్టు, రచయితగా గుర్తింపు పొందిన స్వపన్ దాస్గుప్తాకు రాష్ట్ర ఆర్థిక శాఖ బాధ్యతలు అప్పగించారు. జాతీయ రాజకీయాలపై లోతైన అవగాహన కలిగిన ఆయనకు రాష్ట్ర ఆర్థిక వ్యవస్థను బలోపేతం చేసే బాధ్యతలు అప్పగించడం ప్రాధాన్యత సంతరించుకుంది. పెట్టుబడులు, అభివృద్ధి కార్యక్రమాలు, సంక్షేమ పథకాల అమలులో ఆయన కీలక పాత్ర పోషించనున్నట్లు భావిస్తున్నారు.
అలానే రాష్ట్ర అభివృద్ధికి కీలకమైన పరిశ్రమలు, వ్యవసాయం, ఆరోగ్యం, విద్య, పట్టణాభివృద్ధి వంటి శాఖలను అనుభవజ్ఞులైన నాయకులకు కేటాయించారు. పారిశ్రామిక పెట్టుబడులను ఆకర్షించడం, గ్రామీణాభివృద్ధి కార్యక్రమాలను వేగవంతం చేయడం, ఆరోగ్య సేవలను మరింత బలోపేతం చేయడం కొత్త ప్రభుత్వ ప్రధాన లక్ష్యాలుగా కనిపిస్తున్నాయి. ఇక మహిళా సంక్షేమం, యువజనాభివృద్ధి, క్రీడలు, విద్య, పర్యాటకం వంటి రంగాలకు కూడా ప్రాధాన్యత ఇవ్వడం ద్వారా సమగ్ర అభివృద్ధిని సాధించాలని ప్రభుత్వం భావిస్తోంది.
మంత్రులకు కేటాయించిన శాఖలు..
మంత్రి పేరు - శాఖ
- తపస్ రాయ్ పరిశ్రమలు - వాణిజ్య శాఖ
- దిలీప్ ఘోష్ - పంచాయతీ రాజ్, గ్రామీణాభివృద్ధి, వ్యవసాయ మార్కెటింగ్ శాఖ
- అగ్నిమిత్ర పాల్ - పట్టణాభివృద్ధి, పురపాలక వ్యవహారాల శాఖ
- డాక్టర్ శరద్వత్ ముఖర్జీ - ఆరోగ్య శాఖ
- జగన్నాథ్ ఛటోపాధ్యాయ - ఉన్నత విద్యాశాఖ
- డూద్ కుమార్ మండల్ - వ్యవసాయ శాఖ
- దీపక్ బర్మన్ పాఠశాల - విద్యాశాఖ
- శంకర్ ఘోష్ - పర్యాటక, పార్లమెంటరీ వ్యవహారాల శాఖ
- అర్జున్ సింగ్ - కార్మిక, రవాణా శాఖ
- ఇంద్రనీల్ ఖాన్ - క్రీడలు, యువజన, వినియోగదారుల వ్యవహారాల శాఖ
- మాలతీ రావ్ రాయ్ - మహిళా, శిశు సంక్షేమాభివృద్ధి శాఖ
- కలితా మాఝీ - గృహనిర్మాణ శాఖ సహాయ మంత్రి
- స్వపన్ దాస్గుప్తా - ఆర్థిక శాఖ మంత్రి
కొత్త ప్రభుత్వంపై భారీ అంచనాలు..
కొత్త మంత్రివర్గం ఏర్పాటుతో పశ్చిమ బెంగాల్ రాజకీయాల్లో కొత్త అధ్యాయం ప్రారంభమైంది. అనుభవం కలిగిన నాయకులతో పాటు సామాన్య ప్రజల నుంచి ఎదిగిన వ్యక్తులకు కూడా అవకాశాలు కల్పించడం ద్వారా ప్రజలకు దగ్గరయ్యే ప్రయత్నం ప్రభుత్వం చేస్తున్నట్లు విశ్లేషకులు అభిప్రాయపడుతున్నారు. రాష్ట్ర ఆర్థికాభివృద్ధి, ఉపాధి కల్పన, మౌలిక సదుపాయాల విస్తరణ, వ్యవసాయ రంగ అభివృద్ధి వంటి అంశాల్లో ఈ మంత్రివర్గం పనితీరు ఎలా ఉంటుందో అన్న ఆసక్తి రాష్ట్రవ్యాప్తంగా నెలకొంది.
Click it and Unblock the Notifications
Sign in with Google