అలాస్కా మీట్ తర్వాత ఈయూ సంచలన నిర్ణయం.. సపోర్ట్ వారికే !
అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్ల మధ్య అలాస్కాలో జరిగిన శిఖరాగ్ర సమావేశం ముగిసింది. ఈ క్రమంలోనే యూరోపియన్ యూనియన్ (EU) ఉక్రెయిన్కు తమ మద్దతు కొనసాగుతుందని ప్రకటించింది. ఉక్రెయిన్ భద్రతా హామీలను పొందడంలో, తమ సార్వభౌమత్వాన్ని కాపాడుకోవడంలో EU దేశాలు పూర్తిగా సహకరిస్తాయని స్పష్టం చేశాయి. ఉక్రెయిన్ సరిహద్దుల్లో బలవంతపు మార్పులను అంగీకరించబోమని తేల్చి చెప్పాయి.
కాగా ట్రంప్-పుతిన్ సమావేశం తర్వాత, యూరప్, ఉక్రెయిన్ అధ్యక్షుడు జెలెన్స్కీ, ట్రంప్లతో కలిసి ఒక త్రైపాక్షిక శిఖరాగ్ర సమావేశం కోసం పని చేయడానికి సిద్ధంగా ఉన్నాయని తెలిపాయి. ఈ చర్చలు ఉక్రెయిన్కు తమ సార్వభౌమత్వాన్ని, ప్రాదేశిక సమగ్రతను కాపాడుకోవడానికి అవసరమైన భద్రతా హామీలను అందించడంపై దృష్టి పెడతాయని EU పేర్కొంది. భద్రతా హామీలు అందించడానికి అమెరికా సిద్ధంగా ఉందన్న ట్రంప్ ప్రకటనను EU స్వాగతించింది.
యూరోపియన్ నాయకులు, ముఖ్యంగా ఫ్రెంచ్ అధ్యక్షుడు ఇమ్మాన్యుయేల్ మాక్రాన్, జర్మన్ ఛాన్సలర్ ఫ్రీడ్రిచ్ మెర్జ్.. యూరోపియన్ కమిషన్ ప్రెసిడెంట్ ఉర్సులా వాన్ డెర్ లేయెన్ ఒక సంయుక్త ప్రకటన విడుదల చేశారు. ఈ ప్రకటనలో యూరోపియన్ దేశాలు ఉక్రెయిన్కు తమ మద్దతు కొనసాగిస్తాయని, రష్యా దురాక్రమణకు వ్యతిరేకంగా ఆంక్షలను మరింత బలోపేతం చేస్తామని స్పష్టం చేశారు.
ఉక్రెయిన్ స్వేచ్ఛా ఎంపికలకు మద్దతు..
ఉక్రెయిన్ తన సాయుధ దళాలను లేదా ఇతర దేశాలతో దాని సహకారాన్ని పరిమితం చేసుకోవాల్సిన అవసరం లేదని EU పేర్కొంది. EU లేదా NATOలలో ఉక్రెయిన్ ప్రవేశానికి రష్యా ఎటువంటి వీటో హక్కును కలిగి ఉండకూడదని స్పష్టం చేసింది. అంతర్జాతీయ సరిహద్దులను బలవంతంగా మార్చకూడదని పునరుద్ఘాటించింది, ఉక్రెయిన్ తన భూభాగంపై నిర్ణయం తీసుకునే హక్కును కలిగి ఉందని నొక్కిచెప్పింది.
ఫ్రెంచ్ అధ్యక్షుడు ఇమ్మాన్యుయేల్ మాక్రాన్ మాట్లాడుతూ.. ట్రంప్-పుతిన్ సమావేశం తర్వాత, ట్రంప్, జెలెన్స్కీ, యూరోపియన్ మిత్రదేశాలతో సమన్వయ సమావేశం జరిగిందని, చర్చలు కొనసాగుతాయని చెప్పారు. ఏదైనా శాశ్వత శాంతికి దృఢమైన భద్రతా హామీలు అవసరమని, ఇందులో అమెరికా సహకరించడానికి సంసిద్ధత చూపడం మంచి పరిణామమని ఆయన పేర్కొన్నారు. ఫ్రాన్స్ పూర్తిగా ఉక్రెయిన్కు అండగా ఉంటుందని.. ఐక్యతతో, బాధ్యతతో తమ ప్రయోజనాలను కాపాడుకోవడానికి కలిసి పని చేస్తామని ఆయన స్పష్టం చేశారు.
రష్యాపై ఒత్తిడి..
ఉక్రెయిన్లో హింస కొనసాగుతున్నంత కాలం రష్యాపై ఆర్థిక ఒత్తిడిని కొనసాగించడానికి EU సిద్ధంగా ఉందని పేర్కొన్నారు. రష్యా దురాక్రమణ యుద్ధం కొనసాగుతున్నంత కాలం ఈ ఆంక్షలు కొనసాగుతాయని EU స్పష్టం చేసింది. ఈ పరిణామాలన్నీ, రష్యా-అమెరికా చర్చలు జరిగినప్పటికీ, ఉక్రెయిన్ విషయంలో యూరోపియన్ దేశాల ఐక్యత, దృఢమైన వైఖరిని తెలియజేస్తున్నాయన్నారు. పోరాటం ముగిసి, న్యాయమైన శాంతిని నెలకొల్పడానికి, ఉక్రెయిన్ను బలోపేతం చేయడానికి మరిన్ని ప్రయత్నాలు చేస్తామని EU ప్రకటించింది.
ఇక ఈ శిఖరాగ్ర సమావేశం తక్షణమే శాంతిని తీసుకురాకపోయినా.. భవిష్యత్ చర్చలకు ఒక దారిని ఏర్పరిచింది. త్వరలో జరగబోయే త్రైపాక్షిక సమావేశం ఈ సమస్యకు ఒక పరిష్కారం చూపుతుందో లేదో చూడాలి.
Click it and Unblock the Notifications
Sign in with Google