వణికిన పాక్ ఆర్మీ.. విరుచుకుపడ్డ ఉగ్రవాదులు, 15 మంది మృతి!
పాకిస్థాన్లో ఉగ్రవాదం మరోసారి రక్తపాతం సృష్టించింది. ఖైబర్ పఖ్తున్ఖ్వా ప్రావిన్స్లోని బాజౌర్ సైనిక శిబిరంపై మే 15, 2026న జరిగిన భారీ ఆత్మాహుతి దాడి దేశవ్యాప్తంగా కలకలం రేపింది. ప్రాథమిక సమాచారం ప్రకారం కనీసం 15 మంది సైనికులు ఈ దాడిలో మరణించగా, పలువురు తీవ్రంగా గాయపడ్డారు. మరణాల సంఖ్య ఇంకా పెరిగే అవకాశం ఉందని స్థానిక మీడియా పేర్కొంది.
భారీ పేలుడు..
భద్రతా వర్గాల సమాచారం ప్రకారం, ఉగ్రవాదులు ముందుగా పేలుడు పదార్థాలతో నిండిన వాహనాన్ని సైనిక శిబిరం సమీపంలో పేల్చారు. ఆ భారీ విస్ఫోటనం కారణంగా క్యాంపు గేట్లు, పరిసర భవనాలు ధ్వంసమయ్యాయి. పేలుడు అనంతరం ఆయుధాలతో సిద్ధంగా ఉన్న ముష్కరులు శిబిరంలోకి చొరబడి విచక్షణారహితంగా కాల్పులు జరిపారు. దీంతో అక్కడ ఉన్న సైనికులు అప్రమత్తమై ప్రతిదాడికి దిగడంతో గంటల పాటు భీకర కాల్పులు చోటుచేసుకున్నాయి.
దాడికి బాధ్యత వహించిన టీటీపీ
ఈ ఘాతుకానికి నిషేధిత ఉగ్రవాద సంస్థ 'తహ్రీక్-ఏ-తాలిబాన్ పాకిస్థాన్' (TTP) బాధ్యత వహించింది. తమ 'స్పెషల్ ఇస్తషాదీ ఫోర్సెస్' (SIF) ద్వారానే ఈ ఆత్మాహుతి దాడిని అమలు చేసినట్లు టీటీపీ ప్రకటించింది. 2025 అక్టోబర్లో క్వెట్టాలో జరిగిన దాడి తర్వాత టీటీపీ అధికారికంగా ప్రకటించిన అతిపెద్ద ఆత్మాహుతి దాడి ఇదే కావడం గమనార్హం.
భారత్ను అస్థిరపరచాలనే లక్ష్యంతో దశాబ్దాలుగా ఉగ్రవాద వర్గాలను పెంచి పోషించిన పాకిస్థాన్ ఇప్పుడు అదే ఉగ్రవాదం బారిన పడుతోంది. ఒకప్పుడు తమ వ్యూహాత్మక ఆస్తులుగా భావించిన మిలిటెంట్ గ్రూపులే ఇప్పుడు పాకిస్థాన్ సైన్యాన్ని లక్ష్యంగా చేసుకుంటున్నాయి. విశ్లేషకులు దీనిని "తానే తవ్వుకున్న గుంతలో తానే పడటం"గా అభివర్ణిస్తున్నారు.
వరుస దాడులతో భయాందోళన
ఖైబర్ పఖ్తున్ఖ్వా ప్రాంతంలో వారం రోజుల వ్యవధిలో ఇదే రెండో పెద్ద ఆత్మాహుతి దాడి కావడం పరిస్థితి తీవ్రతను తెలియజేస్తోంది. అంతకుముందు లక్కీ మర్వత్ జిల్లాలోని నౌరంగ్ బజార్లో పేలుడు పదార్థాలతో నిండిన ఆటో రిక్షాతో దాడి జరిగింది. ఆ ఘటనలో ఇద్దరు పోలీసులు, ఒక మహిళ సహా పలువురు మరణించగా, దుకాణాలు, వాహనాలు ధ్వంసమయ్యాయి.
అలాగే ఈ ఏడాది ఫిబ్రవరిలో కూడా అదే ప్రాంతంలో జరిగిన మరో దాడిలో ఐదుగురు పోలీసులు, ఇద్దరు పౌరులు ప్రాణాలు కోల్పోయారు. వరుస దాడులతో ప్రజల్లో తీవ్ర భయాందోళన నెలకొంది. అలానే బాజౌర్ జిల్లా ఆఫ్ఘనిస్తాన్ సరిహద్దుకు సమీపంలో ఉండటంతో, ఈ ప్రాంతం చాలా కాలంగా ఉగ్రవాద కార్యకలాపాలకు కేంద్రంగా మారింది. పాకిస్థాన్ ప్రభుత్వం ఆఫ్ఘన్ భూభాగంలో దాక్కున్న ఉగ్రవాదులే ఈ దాడులకు కారణమని ఆరోపిస్తోంది. అయితే, ఆఫ్ఘన్ తాలిబాన్ ప్రభుత్వం ఈ ఆరోపణలను ఖండిస్తోంది.
హై అలర్ట్లో భద్రతా బలగాలు
తాజా ఘటన అనంతరం బాజౌర్, పెషావర్, సరిహద్దు ప్రాంతాల్లో భద్రతా బలగాలు హై అలర్ట్ ప్రకటించాయి. చెక్పోస్టుల వద్ద తనిఖీలు కట్టుదిట్టం చేశారు. అనుమానితుల కోసం భారీ స్థాయిలో సెర్చ్ ఆపరేషన్లు కొనసాగుతున్నాయి. పాకిస్థాన్ సైన్యం ఉగ్రవాదులను పూర్తిగా నిర్మూలిస్తామని ప్రకటించినప్పటికీ, వరుస దాడులు భద్రతా వ్యవస్థ వైఫల్యంపై ప్రశ్నలు లేవనెత్తుతున్నాయి.
పాకిస్థాన్లో భద్రతా సంక్షోభం
ఇటీవల నెలలుగా పాకిస్థాన్లో ఉగ్రదాడులు పెరుగుతున్నాయి. ముఖ్యంగా సైనిక శిబిరాలు, పోలీస్ స్టేషన్లు, ప్రభుత్వ భవనాలే లక్ష్యంగా మారుతున్నాయి. దీంతో దేశంలో అంతర్గత భద్రతా పరిస్థితిపై తీవ్ర ఆందోళనలు వ్యక్తమవుతున్నాయి. రాజకీయ అస్థిరత, ఆర్థిక సంక్షోభం మధ్య ఉగ్రవాదం మళ్లీ తలెత్తడం పాకిస్థాన్కు పెద్ద సవాల్గా మారింది.
Click it and Unblock the Notifications
Sign in with Google