ఒక్కొక్కరికీ ఊచకోతే:ఇరాన్‌ పాలకులకు ట్రంప్ మాస్ వార్నింగ్..!!

ఇరాన్‌లో రగులుతున్న విప్లవ జ్వాలలకు అమెరికా బాసటగా నిలిచింది. ప్రజాస్వామ్యం కోసం, ప్రాథమిక హక్కుల కోసం వీధుల్లోకి వచ్చి ప్రాణాలకు తెగిస్తున్న ఇరాన్ ప్రజలకు అగ్రరాజ్యం అధ్యక్షుడు డొనాల్డ్ ట్రంప్ బాహాటంగా మద్దతు ప్రకటించారు. రక్తం చిందిస్తున్న నియంతృత్వ పాలనపై ఆయన చేసిన వ్యాఖ్యలు ఇప్పుడు అంతర్జాతీయంగా పెను సంచలనం సృష్టిస్తున్నాయి."మారణ హోమం ఆగాల్సిందే.. ప్రజాస్వామ్యం గెలవాల్సిందే!" - ఇదే ఇప్పుడు ప్రపంచవ్యాప్తంగా వినిపిస్తున్న నినాదం.ఇరాన్‌లో గత కొద్ది రోజులుగా సాగుతున్న ప్రజా తిరుగుబాటుపై అమెరికా అధ్యక్షుడు డొనాల్డ్ ట్రంప్ అత్యంత తీవ్రంగా స్పందించారు. ఇరాన్ పౌరులను ఊచకోత కోస్తున్న అక్కడి ప్రభుత్వంపై నిప్పులు చెరిగారు.

సహాయం వస్తోంది.. ధైర్యంగా ఉండండి!
ట్రంప్ తన 'ట్రూత్ సోషల్' వేదికగా ఇరాన్ ఆందోళనకారులకు అత్యంత శక్తివంతమైన సందేశాన్ని పంపారు."ఇరాన్ దేశభక్తులారా..మీ నిరసనలను కొనసాగించండి. మీ దేశంలోని ప్రభుత్వ సంస్థలను హస్తగతం చేసుకోండి! మీపై దాడులు చేస్తున్న హంతకుల పేర్లను, మిమ్మల్ని వేధిస్తున్న వారి గుర్తులను భద్రపరచండి.వారు భారీ మూల్యం చెల్లించక తప్పదు.మీ కోసం సహాయం వస్తోంది (Help is on its way). ఎంఐజీఏ (MIGA - Make Iran Great Again)!" అంటూ ట్రంప్ ఉద్వేగభరితంగా పోస్ట్ చేశారు.

డొనాల్డ్ ట్రంప్ ప్రస్తావించిన 'MIGA' (Make Iran Great Again) అనేది కేవలం ఒక నినాదం మాత్రమే కాదు, దాని వెనుక బలమైన రాజకీయ మరియు భౌగోళిక వ్యూహాలు దాగి ఉన్నాయి. తన ఎన్నికల నినాదం 'MAGA' (Make America Great Again) తరహాలోనే, ఇరాన్ కోసం ఆయన ఈ సరికొత్త పంథాను ఎంచుకున్నారు.

చర్చలు రద్దు - కఠిన నిర్ణయం
నిరసనకారులపై సాగుతున్న అమానవీయ దాడులను నిరసిస్తూ ట్రంప్ కీలక నిర్ణయం తీసుకున్నారు. ఇరాన్ అధికారులతో జరగాల్సిన అన్ని చర్చలను, సమావేశాలను తక్షణమే రద్దు చేస్తున్నట్లు ప్రకటించారు. అమాయక పౌరుల హత్యలు ఆగే వరకు చర్చల ప్రసక్తే లేదని స్పష్టం చేశారు. ఇదిలా ఉంటే అమెరికాకు చెందిన హ్యూమన్ రైట్స్ యాక్టివిస్ట్ న్యూస్ ఏజెన్సీ వెల్లడించిన గణాంకాలు గుండెల్ని పిండేస్తున్నాయి.

డిసెంబర్ 28 నుంచి మొదలైన ఈ పోరాటంలో ఇప్పటివరకు సుమారు 2,000 మంది ప్రాణాలు కోల్పోయారు.మరణించిన వారిలో 18 ఏళ్లలోపు వయసున్న చిన్నారులు తొమ్మిది మంది ఉండటం అత్యంత విషాదకరం.మృతుల్లో 1,847 మంది సామాన్య నిరసనకారులు ఉండగా, మిగిలిన వారు ప్రభుత్వ అనుబంధ సిబ్బంది మరియు ఇతర పౌరులున్నట్లు తెలుస్తోంది.

ఒకవైపు అణచివేత.. మరోవైపు ఆకలి.. ఇంకోవైపు ప్రాణభయం.. ఈ మూడింటినీ ఎదురిస్తూ ఇరాన్ ప్రజలు చేస్తున్న పోరాటం ఇప్పుడు చరమాంకానికి చేరుకుంది. ట్రంప్ ఇచ్చిన పిలుపుతో ఇరాన్ వీధుల్లో నిరసనకారుల గళం మరింత పెరిగింది. అగ్రరాజ్యం నేరుగా రంగంలోకి దిగితే, ఇరాన్ భవిష్యత్తు మరియు పశ్చిమ ఆసియా భౌగోళిక రాజకీయాలు పూర్తిగా మారిపోవడం ఖాయం.