హైదరాబాద్ లో గణేష్ నిమజ్జనం వేళ కీలక నిర్ణయం..!!

వినాయక నిమజ్జనానికి భాగ్యనగరం ముస్తాబు అవుతోంది. హుస్సేన్ సాగర్ లో నిమజ్జనం పై కొనసాగుతన్న సందిగ్ధతకు స్పష్టత వచ్చింది. హుస్సేన్‌సాగర్‌ వద్ద బొజ్జ గణపయ్య నిమజ్జనాలపై జీహెచ్​ఎంసీ, పోలీస్​ శాఖ ఓ నిర్ణయానికి వచ్చాయి. ఈ మేరకు తాజా మార్గదర్శకాలు జారీ చేసారు. ఖైరతాబాద్​ నుంచి సచివాలయం వైపు వెళ్లే వాహనాల రాకపోకలకు అంతరాయం కలగొద్దనే ఆ క్రేన్లను నెక్లెస్​ రోడ్డుకు మళ్లించాలని నిర్ణయించారు.

పర్యవేక్షణ
హుస్సేన్‌సాగర్‌​లో నిమజ్జనానికి వచ్చే వినాయక విగ్రహాల సంఖ్యకు తగ్గట్లుగా అప్పటికప్పుడు ఏర్పాట్లు చేసుకునేలా అధికారులు నిర్ణయం తీసుకున్నారు. రద్దీ తక్కువ ఉంటే ట్యాంక్‌బండ్‌కు నిమజ్జన వేడుక నుంచి మినహాయింపు ఇవ్వాలని నిర్ణయించారు. ఎన్టీఆర్​ మార్గ్​లో ఏర్పాటు చేసిన నాలుగు క్రేన్లను తొలగించారు. వినాయక విగ్రహాల నిమజ్జనం సందర్భంగా కేంద్ర కాలుష్య నియంత్రణ మండలి (సీపీసీబీ) పలు మార్గదర్శకాలను విడుదల చేసింది.

కీలక సూచనలు
వినాయక విగ్రహాలను జలాశయాల్లో కాకుండా స్థానికంగా తాత్కాలిక కొలనులు ఏర్పాటు చేసుకొని నిమజ్జనం చేయాలి. దీనివల్ల ఉత్పత్తయిన వ్యర్థాలను స్థానిక సంస్థ లు 24 గంటల్లోపు తరలించాలని సూచించింది. గణేశ్‌ విగ్రహాల నిమజ్జనం వేళ సైన్‌బోర్డులు, అగ్నిమాపక పరికరాలు, బారికేడ్లు ఏర్పాటు చేయాలని పేర్కొంది. ఇక, ర్థాల సేకరణ కోసం ప్రతి కొలను, జలాశయం వద్ద కేంద్రాలను ఏర్పాటు చేయాలి. పూజా, ఇతర వ్యర్థాలను గణేశ్‌ నిమజ్జనానికి ముందే సేకరించాలని స్పష్టం చేసింది.

నిరంతర పర్యవేక్షణ
హుస్సేన్​సాగర్​లో క్లీనింగ్ ప్రక్రియ కొనసాగుతోంది. సాగర్​లోని వ్యర్థాలను తొలగించే బాధ్యతను హెచ్‌ఎండీఏ, రోడ్లను శుభ్రం చేసే బాధ్యతను జీఎచ్ఎం​సీ తీసుకుని పనులు మొదలుపెట్టాయి. ప్రకృతికి హాని కలిగించే గణేశ్​ విగ్రహాలను హుస్సేన్​సాగర్​లో నిమజ్జనం చేయవద్దని హైకోర్టు ఇప్పటికే స్పష్టం చేసింది. మరోవైపు హుస్సేన్​సాగర్​లో, నెక్లెస్​రోడ్​లో ఏర్పాటు చేసిన కొలనులో పేరుకుపోయిన వ్యర్థాలను ఇప్పటికే జీహెచ్ఎంసీ పారిశుద్ధ్య కార్మికులు తొలిగించి ఎప్పటికప్పుడు వాహనాల ద్వారా డంపింగ్ యార్డ్​కు తరలిస్తున్నారు.

English summary

Officials issues guide lines for Ganesh Immersion in Hussain Sagar.