టిడిఎఫ్ సభ్యులతో కోదండరామ్

తెలంగాణ ఐక్య కార్యాచరణ కమిటీ (జెఎసి) కన్వీనర్ కోదండరామ్ ఈ నెల 13వ తేదీన కాలిఫోర్నియాలోని కూపర్టినోలో తెలంగాణ డెవలప్ మెంట్ ఫోరం (టిడిఎఫ్) సభ్యులతో సమావేశమయ్యారు. దాదాపు వంద మంది ఈ సమావేశంలో పాల్గొన్నారు. టిడిఎఫ్ బే ఏరియా టిడిఎఫ్ ఈ కార్యక్రమాన్ని ఏర్పాటు చేసింది. జగన్ బీరెల్లి, మహేంద్ర రెడ్డి, రాజేష్ వట్టిపల్లి, సతీష్ చాడ, శ్రీధర్ రుద్రశెట్టి, యుగంధర్ పొలసాని, వెంకట్ కొండపల్లి, మురళి దుగ్యాల ఈ ఈ కార్యక్రమ ఏర్పాటులో కీలక పాత్ర పోషించారు. తెలంగాణ రాష్ట్ర ఏర్పాటు అవసరం గురించి కోదండరామ్ సంక్షిప్తంగా చెప్పారు. ఆంధ్రప్రదేశ్ ఏర్పాటు చరిత్రపై ఆంధ్ర మీడియా తప్పుడు కథనాలను ప్రచారం చేస్తోందని ఆయన విమర్శించారు. హైదరాబాద్ రాష్ట్రం ప్రత్యేకంగా ఉండేదని, ఆంధ్ర నాయుకల ప్రోద్బలంతో హైదరాబాద్ రాష్ట్రాన్ని విలీనం చేసి ఆంధ్రప్రదేశ్ ను ఏర్పాటు చేశారని ఆయన చెప్పారు.

రెడీ మేడ్ రాజధాని ఆంధ్ర నాయకులకు కనిపించడమే కాకుండా సహజ వనరులు పుష్కలంగా ఉన్నాయని, కృష్ణా గోదావరి నదులు పరీవాహక ప్రాంతాలు వారు గుర్తించారని ఆయన చెప్పారు. ఆంధ్ర నాయకులు, మీడియా తెలంగాణను అణచివేశారని చెప్పడానికి ఆయన పలు ఉదాహరణలు చెప్పారు. శ్రీకృష్ణ కమిటీ నివేదికతో సంబంధం లేకుండా తెలంగాణ రాష్ట్ర ఏర్పాటుకు పోరాడాల్సిన అవసరం ఉందని ఆయన చెప్పారు. శ్రీకృష్ణ కమిటీని తెలంగాణ రాష్ట్ర ఏర్పాటు కోసం వేయలేదని, ఆంధ్రప్రదేశ్ భవిష్యత్తు కోసం వేశారని, అయితే నివేదిక తెలంగాణకు అనుకూలంగా వస్తుందని ఆశిస్తున్నామని, అయినా మన లక్ష్యం సాధించే వరకు విశ్రమించకూడదని ఆయన అన్నారు. ప్రసంగం పూర్తయిన తర్వాత టిడిఎఫ్ సభ్యులు వేసిన పలు ప్రశ్నలకు ఆయన సమాధానాలిచ్చారు. తెలంగాణ కోసం పోరాడకపోతే భవిష్యత్తు లేదని ఈ ప్రాంత నాయకులు గుర్తించినట్లు ఆయన తెలిపారు.