వైఎస్ లో ఎంతో మార్పు

హైదరాబాద్: ఈసారి రుతుపవనాలు విఫలం కావడం, రాష్ట్రం ఆర్ధిక సంక్షోభంలో కూరుకుపోవడంతో ముఖ్యమంత్రి వైఎస్ లో హుషారు కన్పించడం లేదు. ఇదే వర్షాభావ పరిస్ధితి గత ఏడాది వచ్చి ఉంటే కాంగ్రెస్ పార్టీ అధికారంలోకి వచ్చి ఉండేది కాదు. అభివృద్ధికి నిధులు లేకుండా ఖాళీ ఖజానాతో ప్రభుత్వాన్ని నడపడం మామూలు విషయం కాదు. నిధులు లేనందువల్లనే జనంలోకి వెళ్ళలేకపోతున్నానని వైఎస్ స్వయంగా ప్రకటించారు కూడా. ఆయనలో ఉన్న నిజాయితీని జనం గ్రహించారు కాబట్టే గత ఎన్నికల్లో కొత్త హామీలు ఇవ్వకపోయినా గెలిపించారు. చంద్రబాబు నగదు బదిలీ, ఉచిత కలర్ టీవీ పథకాలను వారు నమ్మలేకపోయారు.

రెండోసారి అధికారంలోకి వచ్చిన తర్వాత వైఎస్ లో గణనీయమైన మార్పు కన్పిస్తోంది. మొదటిసారి అధికారంలోకి వచ్చిన వెంటనే ఆయన తనను నమ్ముకున్న వారికి తోచిన సాయం రకరకాల రూపాల్లో చేశేశారు. ఇరిగేషన్ కాంట్రాక్టులు కూడా ఆయన మనుషులకే దక్కాయి.వారికి భారీగా అడ్వాన్సులు కూడా లభించాయి. కుమారుడు జగన్ మోహన్ రెడ్డి వ్యాపార సామ్రాజ్యంలో ఈ కాంట్రాక్టర్లు భారీగా పెట్టుబడులు పెట్టారు.