జగన్ పై సోనియా పునరాలోచన?

తమను ధిక్కరించి ఓదార్పు యాత్ర చేస్తున్న కడప పార్లమెంటు సభ్యుడు వైయస్ జగన్ పై కాంగ్రెసు అధ్యక్షురాలు సోనియా గాంధీ పునరాలోచన చేస్తారా అనే ప్రశ్న తలెత్తుతోంది. వైయస్ జగన్ సమీప బంధువైన మంత్రి బాలినేని శ్రీనివాస రెడ్డి చేసిన ప్రకటన సోనియా దృష్టిని ఆకర్షించడానికేననే అభిప్రాయం వ్యక్తమవుతోంది. ప్రదేశ్ కాంగ్రెసు కమిటీ (పిసిసి) అధ్యక్షుడ్ని సోనియా గాంధీ ఎంపిక చేయాల్సి ఉంది. ఈ సమయంలో బాలినేని ప్రకటన వెలువడడం ప్రాధాన్యం సంతరించుకుంది. 2014 ఎన్నికల్లో కాంగ్రెసు పార్టీకి రాష్ట్రంలో వైయస్ జగన్ నాయకత్వం వహించాలనేది తన ఉద్దేశమని బాలినేని శ్రీనివాస రెడ్డి అన్నారు. ఇప్పటికిప్పుడు ముఖ్యమంత్రి పదవిని దక్కించుకోవడం సాధ్యం కాదని గ్రహించిన జగన్ వచ్చే ఎన్నికల్లో పార్టీకి నాయకత్వం వహించడం ద్వారా ఆ పదవిని దక్కించుకోవాలని ఆశిస్తున్నట్లు బాలినేని ప్రకటనను బట్టి అర్థం చేసుకోవచ్చు.

వైయస్ జగన్ లో కొంత మేరకు మార్పు వచ్చిందని భావించి పిసిసి అధ్యక్ష పదవి కోసం జగన్ పేరును సోనియా పరిగణనలోకి తీసుకుంటారా అనేది చెప్పడం కష్టమే. మొత్తం మీద, పార్టీలో బాలినేని శ్రీనివాస రెడ్డి ప్రకటన మరో వివాదానికి, చర్చకు దారి తీసింది. వచ్చే ఎన్నికల్లో రాష్ట్రంలో పార్టీకి ఎవరు నాయకత్వం వహించాలనేది అధిష్టానం నిర్ణయమని కాంగ్రెసు నాయకులు అప్పుడే ప్రకటనలు చేయడం ప్రారంభించారు. జగన్ పై తీవ్ర వ్యతిరేకత ఎదురవుతున్న నేపథ్యంలో ఆయన వర్గం నుంచి అధిష్టానం కరుణ కోసం చూస్తున్నట్లు తెలుస్తోంది.

కేంద్ర మంత్రి పదవి ఇవ్వజూపితే వద్దని చెప్పి వైయస్ జగన్ ధిక్కార స్వరం వినిపించారు. పార్టీ పేరెత్తకుండా, సోనియా, మన్మోహన్ ల పేరెత్తకండా ఆయన ఓదార్పు యాత్రలు చేస్తున్నారు. ఇది జగన్ పై కాంగ్రెసు అధిష్టానం ఆగ్రహానికి కారణమైంది. అంతేకాకుండా, తన మాటను లెక్కచేయకుండా జగన్ వ్యవహరించడంపై సోనియా తీవ్ర ఆగ్రహంతో ఉన్నారు. రాహుల్ గాంధీ కూడా జగన్ తో విసిగిపోయారు. ఈ స్థితిలో జగన్ ను తిరిగి దగ్గర చేసుకోవడం అంత సులభమైన విషయం కాదు. జగన్ ను నమ్మి పిసిసి పదవి అప్పగించే స్థితిలో సోనియా ఉండకపోవచ్చు. ఒక కాంగ్రెసు పార్లమెంటు సభ్యుడిగా కడప నియోజకవర్గానికే జగన్ పరిమితం కావాలన్నదే సోనియా అభిమతం. అయితే, జగన్ అందుకు సిద్ధపడతారా అనేది సందేహమే.