బొత్సపై రెడ్డి నేతల ఆగ్రహం

ప్రదేశ్ కాంగ్రెసు కమిటీ (పిసిసి) అధ్యక్షుడు బొత్స సత్యనారాయణ దూకుడుకు కాంగ్రెసు పార్టీ అధిష్టానం కళ్లెం వేసింది. బొత్స వ్యాఖ్యలపై అధిష్టానం అసంతృప్తితో ఉన్నట్లు తెలుస్తోంది. పనితీరులో దూకుడును, తీవ్ర వ్యాఖ్యలను మానుకోవాలని పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ బొత్స సత్యనారాయణను ఆదేశించినట్లు సమాచారం. కాంగ్రెసులోని కొంత మంది రెడ్డి నాయకులు బొత్స సత్యనారాయణ తీరుపై గులాం నబీ ఆజాద్‌కు ఫిర్యాదు చేసినట్లు తెలుస్తోంది. ఒక్కసారి కాదట, రెండు సార్లు బొత్సపై అధిష్టానం పెద్దలకు, సీనియర్ నాయకులకు వారు ఫిర్యాదు చేసినట్లు చెబుతున్నారు. ముఖ్యమంత్రి పదవిని చేపట్టడం తన లక్ష్యమని, రెడ్లంతా వైయస్ జగన్ నాయకత్వంలోని వైయస్సార్ కాంగ్రెసు పార్టీలోకి వెళ్లిపోతారని బొత్స చెబుతున్న మాటలు పార్టీకి నష్టం కలిగించేవిగా ఉన్నాయని వారు ఫిర్యాదు చేసినట్లు సమాచారం. దీంతో వ్యాఖ్యల తీవ్రతను తగ్గించుకోవడమే కాకుండా బాడీ లాంగ్వేజ్‌ని కూడా నియంత్రించుకోవాలని ఆజాద్ బొత్సకు సూచించినట్లు ప్రచారం జరుగుతోంది.

తాను ముఖ్యమంత్రిని కావాలని అనుకుంటున్నానని పదే పదే బొత్స అనడం ముఖ్యమంత్రి అధికారాన్ని తక్కువ చేసేదిగా ఉందని రెడ్డి నాయకులు అన్నట్లు తెలుస్తోంది. రెడ్లంతా వైయస్సార్ కాంగ్రెసులోకి వెళ్తారనేది తప్పుడు ప్రచారమని వారంటున్నారు. ముఖ్యమంత్రి కిరణ్ కుమార్ రెడ్డి అంచనాల మేరకు ప్రభావం చూపలేకపోతున్నారని కాంగ్రెసు అధిష్టానం అంగీకరిస్తున్నప్పటికీ ఆయ నను తప్పిస్తారనే అభిప్రాయం బలపడకూడదనే ఉద్దేశంతో ఉంది.

రెడ్ల తిరుగుబాటుతో పార్టీలో రెడ్ల ఆధిపత్యాన్ని తగ్గించడానికి ఇందిరా గాంధీ ప్రయత్నించినప్పుడు కూడా విదేయత గల రెడ్లు బయటకు వెళ్లిపోలేదనే విషయాన్ని రెడ్డి నాయకులు గుర్తు చేస్తున్నారు. కిరణ్ కుమార్ రెడ్డి పట్ల అసంతృప్తిగా ఉన్న రెడ్లు కూడా తాను ముఖ్యమంత్రిని కావాలని అనుకుంటున్నానని బొత్స చేస్తున్న వ్యాఖ్యలపై నిరసన వ్యక్తం చేస్తున్నారు. అలాంటి వ్యాఖ్యలు ముఖ్యమంత్రిని మరింత బలహీనపరుస్తాయని, దానివల్ల పార్టీ నష్టపోతుందని వారంటున్నారు. మంత్రివర్గంలో రెడ్ల ప్రాతినిధ్యాన్ని తగ్గించాలనే పార్టీ అధిష్టానం ఆలోచన పట్ల ఇప్పటికే వారు ఆవేదన వ్యక్తం చేస్తున్నారు. తనకు మంత్రి పదవి ఇవ్వాలని ఓ రెడ్డి శాసనసభ్యుడు కోరినప్పుడు ఇప్పటికే రెడ్లు మంత్రివర్గంలో చాలా ఉన్నారని, కొత్తగా రెడ్లకు ప్రాతినిధ్యం ఉండదని ఆజాద్ స్పష్టం చేసినట్లు తెలుస్తోంది.

English summary

Information about new PCC chief Botsa Satyanarayana's aggressive style of functioning and his belligerence and his frequent utterances that he wants to become the chief minister has reached the Congress high command.