సోనియాకు వైయస్ జగన్ సవాల్

ఢిల్లీలో చేపట్టిన జలదీక్షను మాజీ పార్లమెంటు సభ్యుడు వైయస్ జగన్ బలప్రదర్సనగా మార్చారు. పార్లమెంటు సభ్యులు, శాసనసభ్యులు ఆయన జలదీక్షకు హాజరయ్యారు. తన సత్తా ఏమిటో ఆయన కాంగ్రెసు అధ్యక్షురాలు సోనియా గాంధీ ఎదుటే ఆయన ప్రదర్సించారు. ఆ రకంగా ఆయన సవాల్ విసిరారు. తాను తలుచుకుంటే రాష్ట్ర ప్రభుత్వాన్ని కూల్చేయగలనననే సంకేతాలను ఆయన పంపినట్లు భావిస్తున్నారు. వైయస్ జగన్‌కు ఇప్పటికిప్పుడు 35 మంది శాసనసభ్యుల బలం ఉందని అంచనాలు వేస్తున్నారు. ఈ 35 మందిలో నలుగురు తెలుగుదేశం, ప్రజారాజ్యం పార్టీ శాసనసభ్యులు. మిగతా 31 మంది కాంగ్రెసుకు చెందినవారే. అయితే, ఎంతలేదన్నా వైయస్ జగన్‌కు బలప్రదర్సనలో 28 మంది శాసనసభ్యులు పాల్గొన్నట్లు సమాచారం అందుతోంది.

కాంగ్రెసుకు చెందిన కనీసం 28 మంది శాసనసభ్యులు ముఖ్యమంత్రి కిరణ్ కుమార్ రెడ్డి ప్రభుత్వానికి మద్దతు ఉపసంహరించుకుంటారనేది తేలిపోతూనే ఉన్నది. వారు మద్దతు ఉపసంహరించుకుంటే ప్రభుత్వం సాంకేతికంగా మైనారిటీలో పడిపోయినట్లే. అయితే, వీరిపై పార్టీ ఫిరాయింపుల నిరోధక చట్టం కింద వేటు పడే అవకాశాలు కూడా ఉన్నాయని అంటున్నారు. అదే కిరణ్ కుమార్ రెడ్డి ప్రభుత్వానికి రక్షణగా మారుతుందా అనేది చెప్పలేం. కర్ణాటక అనుభవాన్ని చూసుకుంటే అలాగే అనిపిస్తోంది. అయితే ప్రభుత్వాన్ని పడగొట్టడానికి ఈ బలం చాలునని, సాంకేతికపరమైన అడ్డంకులు తొలగించుకునే అవకాశాలు కూడా ఉన్నాయని జగన్ వర్గం వాదిస్తోంది.

వైయస్ జగన్ వెంట కనిపించేది 28 మంది శాసనసభ్యులే అయినా ఆయన బలం మరింత ఉంటుందని భావించేవాళ్లు కూడా ఉన్నారు. కాంగ్రెసు పార్టీకి చెందిన ఎమ్మెల్యేల్లో మూడింట ఒక వంతు శాసనసభ్యుల మద్దతు కూడగట్టుకునే దాకా జగన్ ఆగుతారా అనే సందేహం కూడా వ్యక్తమవుతోంది. ప్రభుత్వ మనుగడకు 147 మంది సభ్యుల మద్దతు అవసరం. ప్రస్తుత పరిస్థితి చూసుకుంటే ప్రభుత్వం మైనారిటీలో పడిపోయినట్లే. ప్రభుత్వ మనుగడకు కనీసం ఆరుగురు సభ్యుల మద్దతు అవసరమని భావిస్తున్నారు. ఏమైనా, సోనియాకు వైయస్ జగన్ సవాల్ విసిరారనే అనుకోవచ్చు. ఈ స్థితిలో రాష్ట్రం రాష్ట్రపతి పాలన కిందికి వెళ్తుందా అనే అనుమానాలు వ్యక్తమవుతున్నాయి. తెలంగాణ ఆందోళనలను సాకుగా చూపి రాష్ట్రపతి పాలన విధించడానికి కేంద్ర ప్రభుత్వం ముందుకు వస్తుందా అనేది చెప్పలేం. అయితే, ఇందుకు కేంద్ర ప్రభుత్వం కొంత సమయం తీసుకోవచ్చునని అంటున్నారు.