అంబటి రాయుడు చేతికి పగ్గాలు, హిస్టరీలో ఎప్పుడూ చూడని మార్పులు!
హైదరాబాద్ క్రికెట్ అసోసియేషన్ (HCA)లో ప్రక్షాళన పర్వం మొదలైంది. గత కొంతకాలంగా వివాదాలకు నిలయంగా మారిన హెచ్సీఏను సంస్కరణల బాటలో నడిపించేందుకు ప్రస్తుత నాయకత్వం కీలక నిర్ణయాలు తీసుకుంది. ఉప్పల్లోని రాజీవ్ గాంధీ అంతర్జాతీయ క్రికెట్ స్టేడియంలో జరిగిన మీడియా సమావేశంలో హెచ్సీఏ అధ్యక్షుడు అమర్నాథ్, కార్యదర్శి జీవన్ రెడ్డి భవిష్యత్తు ప్రణాళికలను వెల్లడించారు.
హైదరాబాద్ క్రికెట్ అసోసియేషన్లో పారదర్శకతను పెంచడం, వ్యవస్థను ప్రొఫెషనల్గా మార్చడమే లక్ష్యంగా భారీ మార్పులకు శ్రీకారం చుట్టారు. ఇందులో భాగంగా టీమిండియా మాజీ క్రికెటర్ అంబటి రాయుడును క్రికెట్ ఆపరేషన్స్ హెడ్గా నియమిస్తూ హెచ్సీఏ కీలక ప్రకటన చేసింది. క్రికెట్ రంగంలో ఆయనకున్న అపారమైన అనుభవం, అసోసియేషన్ పనితీరులో పారదర్శకతను తీసుకురావడానికి దోహదపడుతుందని నాయకత్వం ఆశాభావం వ్యక్తం చేసింది.
అవినీతిపై ఉక్కుపాదం.. ప్రత్యేక యూనిట్ ఏర్పాటు
క్రికెట్లో అవినీతిని అరికట్టేందుకు హెచ్సీఏ అత్యంత కఠినమైన నిర్ణయం తీసుకుంది. ప్రత్యేకంగా ఒక యాంటీ-కరప్షన్ యూనిట్ను ఏర్పాటు చేస్తున్నట్లు ప్రకటించింది. ఈ యూనిట్కు చైర్మన్గా ప్రిన్సిపల్ డిస్ట్రిక్ట్ అండ్ సెషన్స్ జడ్జ్ విజేందర్ పింగళిని నియమించారు. న్యాయపరమైన పర్యవేక్షణలో ఈ యూనిట్ పనిచేయడం ద్వారా సెలక్షన్స్, ఇతర వ్యవహారాల్లో అక్రమాలకు తావులేకుండా చేయవచ్చని భావిస్తున్నారు. అంతేకాకుండా, క్రికెటర్లు మరియు క్లబ్ ప్రతినిధుల ఫిర్యాదులను సత్వరం పరిష్కరించడానికి ప్రత్యేక గ్రీవెన్స్ రెడ్రెసల్ మెకానిజాన్ని కూడా అందుబాటులోకి తెస్తున్నారు.
మే 12 నుంచి లీగ్ సీజన్ షురూ!
హెచ్సీఏ లీగ్ సీజన్ 2026-27కు సంబంధించిన షెడ్యూల్ను కూడా అసోసియేషన్ ఖరారు చేసింది. మే 12 నుంచి లీగ్ మ్యాచ్లు ప్రారంభం కానున్నాయి. మొదటగా 'A'- 'B' డివిజన్ జట్లకు టీ20 ఫార్మాట్లో పోటీలను నిర్వహించనున్నారు. ఆటగాళ్లకు నిరంతరం మ్యాచ్ ప్రాక్టీస్ లభించేలా ఈ సీజన్ను పకడ్బందీగా నిర్వహించనున్నారు.
గ్రామీణ క్రికెట్పై ప్రత్యేక ఫోకస్
హైదరాబాద్ నగరానికే పరిమితం కాకుండా, జిల్లాల్లోని ప్రతిభావంతులైన ఆటగాళ్లను వెలికితీసేందుకు హెచ్సీఏ ప్రణాళికలు సిద్ధం చేసింది. సెంటర్ ఆఫ్ ఎక్సలెన్స్ అకాడమీని పూర్తిస్థాయిలో అభివృద్ధి చేసి, అక్కడ అంతర్జాతీయ ప్రమాణాలతో కూడిన శిక్షణ సౌకర్యాలు కల్పించనున్నారు. ముఖ్యంగా గ్రామీణ ప్రాంతాల్లోని క్రికెటర్లకు ఆధునిక కోచింగ్ అందించడం ద్వారా రాష్ట్రం నుంచి మరిన్ని జాతీయ స్థాయి ఆణిముత్యాలను తయారు చేయడమే తమ లక్ష్యమని హెచ్సీఏ స్పష్టం చేసింది.
మొత్తానికి, ఒకవైపు అనుభవజ్ఞుడైన రాయుడు సేవలను ఉపయోగించుకుంటూ, మరోవైపు న్యాయపరమైన పర్యవేక్షణలో అవినీతిని అడ్డుకుంటూ హెచ్సీఏ తీసుకున్న ఈ నిర్ణయాలు తెలుగు క్రికెట్ భవిష్యత్తును మారుస్తాయని క్రీడాభిమానులు ఆశిస్తున్నారు.
Click it and Unblock the Notifications
Sign in with Google