బ్రెస్ట్ క్యాన్సర్ యుద్ధంలో సరికొత్త ఆయుధం

మ‌హిళా లోకాన్ని కలవరపెడుతున్న బ్రెస్ట్ క్యాన్సర్ చికిత్స రంగంలో ఒక చారిత్రక పరిణామం చోటుచేసుకుంది. అడ్వాన్స్‌డ్ స్టేజ్ క్యాన్సర్‌తో పోరాడుతున్న వేలాది మంది రోగులకు ఊరటనిస్తూ, 'ఇన్లూరియో (Inluriyo)' అనే విప్లవాత్మక ఔషధానికి అమెరికా ఫుడ్ అండ్ డ్రగ్ అడ్మినిస్ట్రేషన్ (FDA) ఆమోదం లభించింది.

ఈ కొత్త డ్రగ్ రాకతో, మరణ ప్రమాదం దాదాపు 40 శాతం మేర తగ్గిందని క్లినికల్ ట్రయల్స్‌లో రుజువైంది. ఇది కేవలం ఒక ఔషధం కాదు... లక్షలాది మంది మహిళల జీవితాల్లో కొత్త ఆశ, మరో అవకాశం నింపబోతున్న ఒక సాధనం.

ప్రపంచ ఫార్మా దిగ్గజం ఎలి లిల్లీ అభివృద్ధి చేసిన ఈ 'ఇన్లూరియో' (Inluriyo) డ్రగ్‌ను నోటి ద్వారా రోజుకు ఒక మాత్ర రూపంలో తీసుకుంటారు. ఈ మాత్ర యొక్క గొప్పతనం ఏమిటంటే..ఇది క్యాన్సర్‌కు కారణమయ్యే ఈస్ట్రోజన్ రిసెప్టార్‌కు విరోధిగా (Antagonist) పనిచేస్తుంది. దీని ద్వారా, చివరి స్టేజ్ బ్రెస్ట్ క్యాన్సర్‌తో పోరాడుతున్న వారిలో సైతం అద్భుతమైన ఫలితాలను అందించింది.

మూడవ దశ EMBER-3 ట్రయల్స్లో, ఇతర ఎండోక్రైన్ థెరపీతో పోలిస్తే, ఇన్లూరియో డ్రగ్ క్యాన్సర్ పురోగతి లేదా మరణ ప్రమాదాన్ని గణనీయంగా తగ్గించినట్లు స్పష్టమైంది. ఇప్పటికే హార్మోనల్ థెరపీ తీసుకున్న రోగులు కూడా ఈ డ్రగ్‌ను తీసుకోవడానికి అర్హులే.

ఇతర క్యాన్సర్ మందులతో పోలిస్తే, ఇన్లూరియో చికిత్సలో మెరుగైన ఫలితాలను అందించడం, బ్రెస్ట్ క్యాన్సర్పై జరుగుతున్న ఈ యుద్ధంలో ఒక పెద్ద విజయంగా పరిగణించవచ్చు. మహిళల ఆరోగ్యం ,భవిష్యత్తు కోసం చేస్తున్న పరిశోధనల్లో ఇది ఒక మైలురాయి వంటిది.

ఈ శుభవార్త అందిన వారం రోజుల్లోనే ఈ విప్లవాత్మక ఔషధం అమెరికా మార్కెట్‌లో అందుబాటులోకి రానుంది. బ్రెస్ట్ క్యాన్సర్‌తో పోరాడుతున్న ప్రతి మహిళకు, మరియు వారికి మద్దతుగా నిలుస్తున్న ప్రతి కుటుంబానికి... 'ఇన్లూరియో' రూపంలో కొత్త భరోసా లభించినట్టే.

English summary

Major breakthrough in breast cancer treatment: The FDA has approved 'Inluriyo,' an oral drug by Eli Lilly, proven to reduce the risk of death in advanced stage patients by nearly 40%. Read about the EMBER-3 trial success.