AP PGCET 2024: ఏపీ పీజీసెట్ నోటిఫికేష‌న్ విడుద‌ల‌..జూన్‌లో ప్ర‌వేశ‌ ప‌రీక్ష‌లు..!

Published: Tuesday, April 2, 2024, 15:37 [IST]

ఏపీ పీజీసెట్ నోటిఫికేష‌న్ విడుద‌లయ్యింది. ఆంధ్రప్రదేశ్‌లోని విశ్వవిద్యాలయాలు, వాటి అనుబంధ పీజీ కళాశాలల్లో పోస్టు గ్రాడ్యుయేట్ కోర్సుల్లో ప్రవేశాలు కల్పించేందుకు ఈ ప‌రీక్ష‌లు నిర్వ‌హిస్తారు. ఈ ప‌రీక్ష‌కు సంబంధించిన ఆన్‌లైన్ ద‌రఖాస్తు ప్ర‌క్రియ ఏప్రిల్ 1 నుంచే ప్రారంభ‌మ‌య్యింది. అభ్యర్థుల నుంచి మే 4 వరకు దరఖాస్తులు స్వీకరించనున్నారు. ఈ ప‌రీక్ష‌ల నిర్వ‌హ‌ణ బాధ్య‌త ఆంధ్రా యూనివ‌ర్సిటీ తీసుకుంది. ఈ ప‌రీక్ష ద్వారా రాష్ట్రంలోని 16 విశ్వవిద్యాలయాలు, వాటి అనుబంధ పీజీ కాలేజీల్లో 145కి పైగా పీజీ కోర్సుల్లో ప్రవేశాలు క‌ల్పించ‌నున్నారు.

రాతపరీక్షలో సాధించిన మెరిట్ ఆధారంగా ఈ ప‌రీక్ష‌లో ప్రవేశాలు కల్పిస్తారు. దరఖాస్తు చేసుకున్న అభ్యర్థులకు జూన్ 10 నుంచి 14 మధ్య ప్రవేశ పరీక్షలు నిర్వహించనున్నారు. ఎంపీఈడీకి రాతపరీక్ష నుంచి మినహాయింపు ఉంటుంది. ఈ ప‌రీక్ష‌లు మూడు కేటగిరీల వారీగా నిర్వహిస్తున్నారు. కేటగిరీ-1లో ఆర్ట్స్, హ్యూమానిటీస్, సోషల్ సైన్సెస్; కేటగిరీ-2లో కామర్స్ అండ్ ఎడ్యుకేషన్, కేటగిరీ-3లో సైన్స్ సబ్జెక్టులకు సంబంధించి పరీక్ష‌లు ఉంటాయి. యూనివర్సిటీ వారీగా అందుబాటులో ఉన్న సీట్లలో 85% శాతం సీట్లు స్థానిక విద్యార్థులకు కేటాయిస్తారు.

AP PGCET 2024 AP PGCET Notification Released Entrance Exams in June

పీజీ కోర్సుల వివ‌రాలు ఇలా ఉన్నాయి...

ఎంఏ, ఎంకాం, ఎంఎస్సీ, ఎంసీజే, ఎంఎల్‌ఐబీఎస్సీ, ఎంఈడీ, ఎంపీఈడీ, ఎంఎస్సీటెక్ తదితర కోర్సులు..

విద్యార్హ‌త : సంబంధించిన సబ్జెక్టులతో బ్యాచిలర్ డిగ్రీ ఉత్తీర్ణత లేదా చివరి సంవ‌త్స‌రం పరీక్ష రాస్తున్నవారు అభ్య‌ర్థులు కూడా ద‌ర‌ఖాస్తు చేసుకోవ‌చ్చు.

అప్ల‌య్ చేయుట‌కు ఫీజు వివ‌రాలు :

జనరల్ కేటగిరీ అభ్య‌ర్థుల‌కు 850 రూపాయలు ఫీజుగా నిర్ణ‌యించారు. బీసీలకు రూ.750.. ఎస్సీ, ఎస్టీ, దివ్యాంగులకు రూ.650 రూపాయ‌లు చెల్లించాల్సి ఉంటుంది. ఇది కంప్యూటర్ ఆధారిత రాతపరీక్ష. ఈ పరీక్షలో మొత్తం 100 ప్రశ్నలకు, 100 మార్కులకు ఉంటుంది. ప్రశ్నపత్రం ఆబ్జెక్టివ్ పద్ధతిలో ఉంటుంది. లాంగ్వేజేస్ పేపర్లు మినహా మిగతా అన్ని ప్రశ్నపత్రాలు ఆంగ్ల‌ మాధ్యమంలో ఉంటుంది. పరీక్ష సమయం 90 నిమిషాలు. ఈ పరీక్షలో నెగెటివ్ మార్కులు లేవు.

Published On April 2, 2024