AP : టెట్ ఫ‌లితాలు వ‌చ్చేసాయ్‌..ఇలా చెక్ చేసుకోండి...

టెట్ అభ్య‌ర్థుల‌కు అల‌ర్ట్‌.. ఏపీ టెట్ ఫ‌లితాలు విడుద‌ల‌య్యాయి. టీచర్‌ ఎలిజిబిలిటీ టెస్ట్ ఫలితాలను నేడు (నవంబర్‌ 4) మంత్రి నారా లోకేశ్‌ చేతుల మీదగా విడుదల చేశారు. ఇక‌, ఈ ప‌రీక్ష‌లు రాసిన అభ్యర్ధులు అధికారిక వెబ్‌సైట్‌ నుంచి ఫలితాలను చెక్‌ చేసుకోగ‌ల‌రు. రాష్ట్రంలో టెట్ ప‌రీక్ష‌లు అక్టోబర్ 3వ తేది నుంచి 21వ వరకు మొత్తం 17 రోజుల జ‌రిగాయి. రాష్ట్ర వ్యాప్తంగా పలు పరీక్ష కేంద్రాల్లో ఈ ప‌రీక్ష‌లు జరిగిన సంగతి తెలిసిందే.

ఇటీవలే టెట్ ప‌రీక్ష‌ ప్రాథమిక కీ, రెస్పాన్స్‌షీట్‌లను విద్యాశాఖ విడుదల చేసింది. అన్ని సబ్జెక్టులకు అభ్యంతరాలను కూడా స్వీకరించింది. ఆ త‌ర్వాత ఫైన‌ల్‌ ఆన్సర్‌ కీన రూపొందించి.. దానిని గ‌త నెల (అక్టోబర్‌) 29న విడుదల చేశారు. ఇక‌, నేటి ఉద‌యం టెట్‌ పరీక్ష ఫలితాలను ఏపీ మంత్రి నారా లోకేష్‌ విడుదల చేశారు. రాష్ట్ర వ్యాప్తంగా టెట్‌ పరీక్షకు సుమారు 4,27,300 మంది అభ్యర్ధులు దరఖాస్తు చేసుకున్నారు.

అందులో 3,68,661 మంది అంటే 86.28 శాతం మంది ప‌రీక్ష‌కు హాజరయ్యారు. ఇక‌, ఈ పరీక్షల్లో 1,87,256 (50.79 శాతం) మంది ఉత్తీర్ణ‌త సాధించిన‌ట్లు మంత్రి లోకేశ్‌ తెలిపారు. వారంద‌రికీ ఆయ‌న శుభాకాంక్ష‌లు కూడా తెలిపారు. టెట్ అభ్యర్థులకు ఎలాంటి సందేహాలు ఉన్నావాటిని నివృత్తి చేసుకునేందుకు హెల్ప్‌ డెస్క్‌ నంబర్లకు కాల్‌ చేయవచ్చని అధికారులు సూచించారు. ఇచ్చిన మాట ప్రకారం త్వరలోనే మెగా డీఎస్సీ నోటిఫికేషన్ కూడా విడుద‌ల చేస్తామ‌ని అన్నారు. అభ్య‌ర్థులు టెట్ ఫ‌లితాలు కోసం ఈ వెబ్‌సైట్‌ను https://cse.ap.gov.in సంప్ర‌దించ‌గ‌ల‌రు.

నవంబర్‌ 6న ప్రకటన..

విద్యాశాఖ ముందుగా ప్ర‌క‌టించిన షెడ్యూల్ ప్ర‌కారం టెట్‌ ఫలితాలు ఈ నెల (నవంబ‌ర్ ) విడుద‌ల చేయాల్సి ఉండగా, తుది 'కీ' ఆలస్యంగా వెల్లడించడంతో ఫ‌లితాలు వాయిదా ప‌డ్డాయి. డీఎస్సీలో టెట్ స్కొర్‌కు 20 శాతం వెయిటేజీ ఉంటుంది. పైగా టెట్‌ స్కోర్‌కు జీవిత కాల వ్యాలిడిటీ ఉంటుంది. మెగా డీఎస్సీ క్ర‌మంలో టెట్ ప‌రీక్ష‌లో ఉత్తీర్ణ‌త సాధించ‌డం ప్రాధాన్యత సంతరించుకుంది. అందుకే ఈ సారి అభ్య‌ర్థులకూడా అమాంతం పెరిగింది. మెగా డీఎస్సీకి సంబంధించి 16,347 పోస్టులతో నవంబర్‌ 6న నోటిఫికేష‌న్ విడుదల చేసేందుకు పాఠశాల విద్యాశాఖ కసరత్తు చేస్తోంది. వచ్చే ఏడాది ఫిబ్రవరిలో డీఎస్సీ పరీక్షలు ఉంటాయని ఇప్పటికే అధికారులు స్పష్టం చేశారు. ఇందుకు సంబంధించిన అధికారిక నోటిఫికేషన్ కోసం అభ్య‌ర్థులు ఎంత‌గానో ఎదురుచూస్తున్నారు.

English summary

Alert for TET candidates.. AP TET results released. The Teacher Eligibility Test results were released today (November 4) by Minister Nara Lokesh. Now, the candidates who have written these exams can check the results from the official website