Education News: విద్యార్థులకు BCI కొత్త రూల్స్.. ఇకపై అలా చేయకపోతే నో డిగ్రీ
Bar Council news: ప్రభుత్వ, ప్రైవేట్ సంస్థల్లో ఉద్యోగాలు చేయాలంటే ఆయా అభ్యర్థులపై ఎటువంటి కేసులు ఉండకూడదనే నిబంధన అందరికీ తెలిసిందే. అయితే రాజకీయాల్లో మాత్రం ఈ రూల్ ఎందుకు లేదు అంటూ ఎంతో కాలంగా ప్రశ్నలు వెల్లువెత్తుతున్నాయి. తాజాగా విద్యార్థులకు ఈ నిబంధన వర్తింపచేస్తూ బార్ కౌన్సిల్ ఆఫ్ ఇండియా (BCI) నిర్ణయం తీసుకుంది.
న్యాయ విద్యను అభ్యసించే విద్యార్థుల నేర నేపథ్యం తనిఖీ చేయించుకోవాలని BCI కొత్త నిబంధనను ప్రవేశపెట్టింది. విద్యార్థులు తమ తుది మార్కులు మరియు డిగ్రీలను స్వీకరించడానికి ముందు ఏవైనా పెండింగ్లో ఉన్న FIRలు, క్రిమినల్ కేసులు, నేరారోపణలను నివేదించాలంటూ ఓ సర్క్యులర్ రిలీజ్ చేసింది. ఈ వివరాలను క్షుణ్ణంగా తనిఖీ చేయాలని అన్ని న్యాయ విశ్వవిద్యాలయాలలోని వైస్-ఛాన్సలర్లు, రిజిస్ట్రార్లు మరియు సెంటర్స్ ఫర్ లీగల్ ఎడ్యుకేషన్ (CLE)కి ఆదేశాలు జారీ చేసింది.
ఇకపై లా ఇన్స్టిట్యూట్లు అటువంటి కేసులన్నింటినీ ఇమెయిల్ ద్వారా [email protected]కి నివేదించాల్సి ఉంటుంది. విద్యార్థులకు తుది మార్కులు మరియు డిగ్రీలను జారీ చేయడానికి ముందు BCI నిర్ణయం క్లీన్చిట్ కోసం వేచి ఉండాలి. అదనంగా విద్యార్థులు ఒకేసారి ఒకటి కంటే ఎక్కువ రెగ్యులర్ కోర్సులు చదవకుండా నిషేధం విధించింది. తద్వారా LLB చదువుతున్న లా విద్యార్థులు మరే ఇతర కోర్సులు అభ్యసించలేరు. అయితే లాంగ్వేజెస్ లేదా కంప్యూటర్ అప్లికేషన్లు, దూరవిద్య కోర్సులు వంటి స్వల్పకాలిక పార్ట్టైమ్ కోర్సులకు అనుమతించబడతారు.
అన్ని న్యాయ విశ్వవిద్యాలయాలు మరియు కళాశాలల తరగతి గదులలో బయోమెట్రిక్ హాజరు వ్యవస్థలు మరియు CCTV కెమెరాలను ఏర్పాటు చేయాలని BCI ఆదేశించింది. విద్యార్థుల నేర చరిత్ర బహిర్గతం అవసరాలు, సింగిల్ కోర్సు అధ్యయనం విధానాలు, ఉద్యోగ స్థితి మరియు హాజరు ప్రమాణాలకు అనుగుణంగా నిబద్ధతతో కూడిన ప్రకటనను సమర్పించాలని సూచించింది.
తుది గ్రేడ్లు మరియు ధ్రువపత్రాలు జారీ చేయడానికి ముందు ఈ మేరకు తప్పనిసరిగా డిక్లరేషన్ సమర్పించాలని నిబంధన విధించింది. ఈ నిబంధనలను పాటించడంలో విఫలమైతే చట్టపరంగా క్రమశిక్షణా చర్యలు తీసుకోనున్నట్లు స్పష్టం చేసింది. అంతేకాకుండా BCI ద్వారా సభ్యత్వాన్ని గుర్తించకపోవడం లేదా ఆమోదించకపోవడం జరుగుతుందని హెచ్చరించింది.
Click it and Unblock the Notifications
Sign in with Google