ఢిల్లీని మించి.. నొయిడా ఎయిర్‍పోర్టు నిర్మాణంతో కొత్తగా లక్ష ఉద్యోగాలు: కేంద్రమంత్రి సింధియా

Published: Friday, November 26, 2021, 20:17 [IST]

నొయిడా: ఉత్తరప్రదేశ్‌లో ఆసియాలోనే అతిపెద్ద విమానాశ్రయాన్ని నిర్మించాలని ప్రధాని నరేంద్ర మోడీ దిశానిర్దేశం చేశారని, ఈరోజు నోయిడా అంతర్జాతీయ విమానాశ్రయానికి శంకుస్థాపన చేశామని కేంద్ర పౌర విమానయాన శాఖ మంత్రి జ్యోతిరాదిత్య సింధియా తెలిపారు. నొయిడా విమానాశ్రయం నిర్మాణంతో లక్ష ఉద్యోగావకాశాలు కల్పిస్తామని చెప్పారు కేంద్రమంత్రి.

ఢిల్లీని మించి నొయిడా ఎయిర్ పోర్టు

పశ్చిమ ఉత్తరప్రదేశ్‌లోని గౌతమ్ బుద్ధ్ నగర్ జిల్లాలోని జెవార్‌లో ఉన్న ఈ విమానాశ్రయం రూ. 34,000 కోట్ల విలువైన పెట్టుబడులను తీసుకువస్తుందని, గ్రీన్‌ఫీల్డ్ ప్రాజెక్ట్ మొదటి దశ 2024లో పూర్తవుతుందని అంచనా వేస్తున్నామని, దీని ద్వారా ఏటా 1.2 కోట్ల మంది ప్రయాణికులు రాకపోకలు సాగించవచ్చని జ్యోతిరాధిత్య సింధియా వివరించారు. ‘అభివృద్ధి చివరి దశ నాటికి, నోయిడా అంతర్జాతీయ విమానాశ్రయం ఢిల్లీలోని ఇందిరా గాంధీ ఇంటర్నేషనల్ (ఐజీఐ) విమానాశ్రయాన్ని కూడా అధిగమించి భారతదేశపు ప్రముఖ విమానాశ్రయంగా అవతరిస్తుంది' అని సింధియా స్పష్టం చేశారు.

ఆసియాలోనే అతిపెద్ద విమానాశ్రయం జేవార్..

గత బీజేపీయేతర ప్రభుత్వాల హయాంలో ఉత్తరప్రదేశ్‌లో నాలుగు విమానాశ్రయాలు మాత్రమే ఉన్నాయని, ఇప్పుడు తొమ్మిది ఉన్నాయని, ఇది (జేవార్) రాష్ట్రంలో 10వ విమానాశ్రయం అవుతుందని సింధియా తెలిపారు. ‘ప్రధాని నరేంద్ర మోడీ ఆదేశాల మేరకు ఉత్తరప్రదేశ్‌లో ఆసియాలోనే అతిపెద్ద విమానాశ్రయం నిర్మించాల్సి వచ్చింది' అని సింధియా తెలిపారు. ‘సంకల్పం ఉన్నచోట, ఒక మార్గం ఉంటుంది. ఇది ప్రధాన మంత్రి మోడీ ప్రతిష్టాత్మక తీర్మానం, ఇది నేడు నిజమైంది' అని కేంద్రమంత్రి చెప్పారు.

జేవార్ విమానాశ్రయంతో కొత్తగా లక్ష ఉద్యోగాలు

యూకే, ఫ్రాన్స్, జర్మనీల ఉమ్మడి జనాభా కంటే ఉత్తరప్రదేశ్‌లో ఎక్కువ మంది ఉన్నారని, రాబోయే సంవత్సరాల్లో రాష్ట్రంలో మొత్తం 17 విమానాశ్రయాలు ఉంటాయని, జెవార్‌లో రానున్న ఏరోడ్రోమ్ లక్ష ఉద్యోగావకాశాలను సృష్టిస్తుందని సింధియా తెలిపారు. నోయిడా అంతర్జాతీయ విమానాశ్రయం ‘ఆసియాలోనే అతిపెద్ద ఎయిర్‌డ్రోమ్‌గా అవతరిస్తుంది' అని జ్యోతిరాదిత్య సింధియా తెలిపారు. ప్రస్తుతం ఉత్తరప్రదేశ్‌లో తొమ్మిది కార్యాచరణ విమానాశ్రయాలు ఉన్నాయని, మరో ఎనిమిది విమానాశ్రయాలు రానున్నాయని సింధియా తెలిపారు. కాగా, ఢిల్లీ-ఎన్‌సీఆర్‌లో రెండో అంతర్జాతీయ ఏరోడ్రోమ్ ఎయిర్‌పోర్టుకు ప్రధాని మోడీ శంకుస్థాపన చేసిన విషయం తెలిసిందే.

Published On November 26, 2021