నెట్‌ఫ్లిక్స్‌లో ట్రెండ్ అవుతున్న థ్రిల్లర్స్‌‌లో మాస్టర్‌పీస్..!!

ఒక భయానక నేరం.. దాన్ని ఛేదించడానికి పోలీసుల ముందున్నది కేవలం 72 గంటల గడువు! దేశాన్ని కుదిపేసిన ఆ యథార్థ ఘటన వెనుక అసలు ఏం జరిగింది? భారతీయ వెబ్ సిరీస్ చరిత్రలో సరికొత్త మైలురాయిగా నిలిచి, అంతర్జాతీయ స్థాయిలో మన దేశ సత్తాను చాటిన సంచలన పోలీస్ ఇన్వెస్టిగేషన్ డ్రామానే 'ఢిల్లీ క్రైమ్'. కేవలం వినోదాన్ని పంచడమే కాకుండా, సమాజాన్ని కదిలించిన యథార్థ ఘటనల ఆధారంగా తెరకెక్కిన ఈ సిరీస్ నెట్‌ఫ్లిక్స్ వేదికగా సంచలనం సృష్టించింది.

రిచీ మెహతా దర్శకుడిగా వ్యవహరించిన ఈ సిరీస్ మొదటి సీజన్ మార్చి 22, 2019న ప్రపంచవ్యాప్తంగా విడుదలైంది. ప్రతిష్టాత్మక 'అంతర్జాతీయ ఎమ్మీ అవార్డు' గెలుచుకున్న మొట్టమొదటి భారతీయ వెబ్ సిరీస్‌గా 'ఢిల్లీ క్రైమ్' చరిత్ర సృష్టించింది. 48వ అంతర్జాతీయ ఎమ్మీ అవార్డ్స్‌లో ఈ ఘనత సాధించడం ద్వారా ఈ సిరీస్ ప్రపంచవ్యాప్తంగా ఉన్న ప్రముఖుల ప్రశంసలను అందుకుంది.

నిర్భయ ఘటన
సమాజాన్ని భయభ్రాంతులకు గురిచేసిన వాస్తవ నేరాలను, వాటి వెనుక పోలీసులు పడ్డ తీవ్రమైన శ్రమను ఈ సిరీస్‌లో కళ్లకు కట్టినట్లు చూపించారు. మొదటి సీజన్ దేశవ్యాప్తంగా పెను సంచలనం సృష్టించిన 'నిర్భయ' ఘటన ఆధారంగా రూపుదిద్దుకుంది. దిల్లీ పోలీసులు నిందితులను కేవలం 72 గంటల్లోనే ఎలా పట్టుకున్నారు? ఆ దర్యాప్తులో ఎదురైన సవాళ్లు ఏమిటి? అనే కోణంలో ఇది సాగుతుంది.

ఇక రెండో సీజన్ ఢిల్లీ నగరంలో వృద్ధులను లక్ష్యంగా చేసుకుని భయానక హత్యలు, దోపిడీలకు పాల్పడిన 'ఛడ్డీ బనియన్ గ్యాంగ్' నేరాల నేపథ్యంలో తెరకెక్కింది. ఆ తర్వాత వచ్చిన మూడో సీజన్ మరింత తీవ్రమైన అంశమైన మానవ అక్రమ రవాణా, దేశవ్యాప్తంగా సంచలనం సృష్టించిన 'బేబీ ఫలక్' విషాదకర వాస్తవ ఘటన ఆధారంగా రూపొందించబడింది. పిల్లల అక్రమ రవాణా, లైంగిక వేధింపుల వంటి సున్నితమైన అంశాలను ఇందులో అత్యంత లోతుగా దర్యాప్తు చేశారు.

ఛాయా శర్మ స్ఫూర్తితో
ఈ సిరీస్‌లో నటీనటులంతా అత్యంత సహజమైన నటనతో ప్రాణం పోశారు. షెఫాలి షా డీసీపీ వర్తికా చతుర్వేది పాత్రలో (నిజజీవితంలో ఈ కేసును విజయవంతంగా ఛేదించిన ఐపీఎస్ అధికారి 'ఛాయా శర్మ' స్ఫూర్తితో ఈ పాత్రను మలిచారు) అద్భుతమైన అభినయాన్ని కనబరిచారు. రసికా దుగల్ ప్రొబేషనరీ ఐపీఎస్ ఆఫీసర్ నీతి సింగ్ పాత్రలో కనిపించగా, రాజేష్ తైలాంగ్, ఆదిల్ హుస్సేన్ తదితరులు కీలక పోలీసు అధికారులుగా నటించారు.

అలాగే మూడవ సీజన్‌లో ప్రముఖ నటి హుమా ఖురేషి (మీనా పాత్రలో), సయాణి గుప్తా వంటి వారు కొత్తగా చేరి తమ నటనతో మెప్పించారు. నేరాల తీవ్రతను చూపించేటప్పుడు ఎలాంటి మసాలా లేదా సంచలనాత్మక పద్ధతులకు పోకుండా, అత్యంత బాధ్యతాయుతంగా, పారదర్శకంగా పోలీసుల దర్యాప్తు తీరును తెరకెక్కించిన విధానం ప్రతి ఒక్కరినీ ఆలోచింపజేస్తుంది. క్రైమ్-ఇన్వెస్టిగేషన్ జోనర్‌ను ఇష్టపడేవారికైతే 'ఢిల్లీ క్రైమ్' ఒక అద్భుతమైన, ఆలోచనాత్మకమైన అనుభూతిని ఇస్తుంది.