30 కోట్లు పెడితే.. 300 కోట్లు వసూలు చేసిన చిన్న సినిమా

సాధారణంగా పెద్ద సినిమాలు, స్టార్ హీరోల చిత్రాలకే భారీ అంచనాలు ఉంటాయి. కానీ, కొన్నిసార్లు చిన్న సినిమాలు సైతం బాక్సాఫీస్‌ను షేక్ చేసి, అంచనాలను తలకిందులు చేస్తాయి. సరిగ్గా అలాంటి అద్భుతమే చేసింది మలయాళీ సెన్సేషన్ 'లోక ఛాప్టర్ 1 చంద్ర‌' (తెలుగులో 'కొత్త లోక').

ఆగస్టు 28న థియేటర్లలో విడుదలైన ఈ సినిమాపై రిలీజ్‌కు ముందు ఎలాంటి హైప్ లేదు. స్టార్ కాస్ట్ లేకపోవడం, చిన్న సినిమా ట్యాగ్‌తో పెద్దగా ప్రమోషన్లు చేయకపోవడం దీనికి కారణాలు. కానీ, ఆసక్తికరమైన కథా కథనాలు, ఉత్కంఠ కలిగించే సన్నివేశాలు, అబ్బురపరిచే యాక్షన్ సీన్స్ మరియు ఊహించని ట్విస్టులు ఈ సినిమాకు ప్రేక్షకులను క్యూ కట్టించాయి. కేవలం రూ. 30 కోట్ల బడ్జెట్‌తో నిర్మితమైన ఈ చిత్రం ప్రపంచవ్యాప్తంగా రూ.300 కోట్లకు పైగా కలెక్షన్లు సాధించి, స్టార్ హీరోల సినిమాలను సైతం వెనక్కి నెట్టింది. మలయాళంలో ఇప్పటికీ పలు చోట్ల ఈ సినిమా విజయవంతంగా ప్రదర్శితమవుతోంది.

కల్యాణి ప్రియదర్శన్ ప్రధాన పాత్రలో నటించిన ఈ సినిమాలో 'ప్రేమలు' ఫేమ్ నస్లేన్, డాన్స్ మాస్టర్ శాండీ, విజయరాఘవన్ తదితరులు ముఖ్య పాత్రలు పోషించారు. మలయాళ స్టార్ హీరోలు దుల్కర్ సల్మాన్, టోవినో థామస్, షౌబిన్ అతిథి పాత్రల్లో మెరిశారు. ఈ సినిమాను స్వయంగా దుల్కర్ సల్మాన్ నిర్మించడం విశేషం. ఈ విజయం ఇందులో భాగమైన యాక్టర్స్‌కు మంచి గుర్తింపు తెచ్చిపెట్టింది.

ఓటీటీ ప్రేమికులకు పండగే
థియేటర్లలో బ్లాక్ బస్టర్‌గా నిలిచిన ఈ సెన్సేషనల్ మూవీని ఎప్పుడెప్పుడు ఓటీటీలో చూద్దామా? అని ఎదురు చూస్తున్న ప్రేక్షకులకు నిరీక్షణకు తెరపడింది. 'కొత్త లోక' డిజిటల్ స్ట్రీమింగ్‌పై తాజాగా అధికారిక ప్రకటన వెలువడింది. ఈ సినిమా డిజిటల్ హక్కులను ప్రముఖ ఓటీటీ సంస్థ డిస్నీ+ హాట్‌స్టార్ కొనుగోలు చేసింది.

త్వరలోనే ఈ సినిమా ఓటీటీలోకి రానుందని హాట్‌స్టార్ అధికారికంగా ప్రకటించింది. కచ్చితమైన తేదీని ఇంకా వెల్లడించకపోయినా, త్వరలోనే రిలీజ్ డేట్‌ను రివీల్ చేస్తామని పోస్టర్ ద్వారా ప్రకటించారు. సినీ వర్గాల సమాచారం ప్రకారం, ఈ సంచలన చిత్రం దీపావళి కానుకగా ఓటీటీలోకి రావచ్చని తెలుస్తోంది. ఇక ఈ బ్లాక్‌బస్టర్‌ను ఇంట్లోనే కుటుంబ సభ్యులతో కలిసి చూసే అవకాశం త్వరలో రానుంది

English summary

The low-budget Malayalam film 'Loka Chapter 1 Chandra' (Kotha Loka), which collected over ₹300 crores globally, is set for its OTT release. Disney+ Hotstar has officially acquired the digital rights. Find out the expected streaming date and full details here.