నానా పటేకర్ ఆస్తులు ఇన్ని కోట్లా?.. కానీ సింపుల్ లైఫ్‌స్టైల్ తెలిస్తే షాకవ్వాల్సిందే!
ప్రముఖ దిగ్గజ నటుడు నానా పటేకర్ మరణం సినీ ప్రపంచాన్ని, ఆయన అభిమానులను తీవ్ర దిగ్భ్రాంతికి గురిచేసింది. హిందీ, మరాఠీ చిత్రసీమలో దాదాపు ఐదు దశాబ్దాల పాటు సాగిన ఆయన ప్రస్థానం అకస్మాత్తుగా ముగిసింది. కోట్ల రూపాయల సంపద, సుదీర్ఘమైన కెరీర్ ఉన్నప్పటికీ.. ఆయన ఎంతో నిరాడంబరమైన జీవనశైలిని గడపడం అందరినీ ఆశ్చర్యపరిచే విషయం.
గోవాలోని డోనా పౌలాలో ఉన్న తన నివాసంలో గురువారం తెల్లవారుజామున నానా పటేకర్ తీవ్ర గుండెపోటుకు గురయ్యారు. తెల్లవారుజామున 4 గంటలకు ఆయన అపస్మారక స్థితిలో కనిపించడంతో వెంటనే కుటుంబ సభ్యులు మణిపాల్ ఆస్పత్రికి తరలించారు. అక్కడ వైద్యులు దాదాపు 45 నిమిషాల పాటు సీపీఆర్ చేసిన ఆయనను కాపాడేందుకు ప్రయత్నించినప్పటికీ ఫలితం లేకుపోయింది. ఉదయం 5.20 గంటలకు ఆయన మరణించినట్లు వైద్యులు ధ్రువీకరించారు.
నానా పటేకర్ నికర ఆస్తి విలువ దాదాపు రూ.50 కోట్ల నుంచి రూ.80 కోట్ల మధ్య ఉంటుందని అంచనా. ఇటీవలి కాలంలో ఆయన ఒక్కో సినిమాకు రూ.2 నుంచి రూ.3 కోట్ల వరకు పారితోషికం తీసుకునేవారు. అయినప్పటికీ.. తన సహనటులతో పోలిస్తే ఆయన చాలా సాధారణ జీవితాన్ని గడిపారు. దశాబ్దాల క్రితం ముంబైలోని అంధేరిలో రూ.1.1 లక్షలకు కొనుగోలు చేసిన 750 చదరపు అడుగుల అపార్ట్‌మెంట్‌లోనే ఆయన తన తల్లి మరణించే వరకు ఆమెతో కలిసి నివసించారు.
ముంబైలోని సాధారణ ఫ్లాట్‌తో పాటు, ఆయనకు గోవాలో ఓ ఆధునిక ఇల్లు, పుణె సమీపంలోని ఖడక్‌వాస్లాలో సుమారు 27 ఎకరాల్లో విస్తరించి ఉన్న ఓ పెద్ద ఫామ్‌హౌస్ కూడా ఉంది. ఏడు గదులు, పెద్ద హాలు ఉన్న ఈ వ్యవసాయ క్షేత్రంలో గోధుమలు, వరి పండించేవారు. అయితే ఈ వ్యవసాయం ద్వారా వచ్చే ఆదాయాన్ని ఆయన సొంతానికి తీసుకోకుండా.. అక్కడి స్థానిక రైతులకు, వ్యవసాయ కూలీల సంక్షేమానికి పంపిణీ చేసేవారు.
కేవలం నటనలోనే కాకుండా సామాజిక సేవలోనూ నానా పటేకర్ తన ఉదారతను చాటుకున్నారు. 2015లో మహారాష్ట్రలోని కరువు పీడిత ప్రాంతాలైన లాతూర్, విదర్భలలో కష్టాల్లో ఉన్న వందకు పైగా రైతు కుటుంబాలకు రూ.15,000 చొప్పున చెక్కులను అందజేసి ఆదుకున్నారు. కష్టాల్లో ఉన్న రైతులకు ఆయన అందించిన ఆర్థిక సహాయం, చేసిన సేవా కార్యక్రమాలు ఆయనను ప్రజాదరణ పొందిన నాయకుడిగా నిలిపాయి.
మరాఠీ నాటకరంగానికి, అలాగే భారతీయ సినిమాకు నానా పటేకర్ చేసిన అసమాన సేవలకు గుర్తింపుగా ఆయనకు ప్రభుత్వ లాంఛనాలతో అంత్యక్రియలు నిర్వహించాలని మహారాష్ట్ర ప్రభుత్వం నిర్ణయించింది. ఆయన భౌతికకాయాన్ని గోవా నుంచి పుణెకు తరలించిన అనంతరం పుణెలోని సింహగడ్ రోడ్డు సమీపంలో ఉన్న డోంజే గ్రామంలోని ఆయన ఫామ్‌హౌస్‌లో అధికారిక లాంఛనాలతో అంతిమ వీడ్కోలు పలకనున్నారు.
Click it and Unblock the Notifications
Sign in with Google
