Sanjeev Movie Review: కేవలం 4 రోజుల్లోనే షూటింగ్ పూర్తి.. 'సంజీవ్' మూవీ రివ్యూ ఇదే..

ఇటీవలికాలంలో ఓ సినిమా చేయాలంటే సంవత్సరాలు పడుతున్న సంగతి తెలిసిందే. ఇలాంటి సమయంలో కేవలం నాలుగు రోజుల్లోనే సినిమా షూటింగ్ పూర్తి అంటే మీరు నమ్ముతారా..? అవును ఈ ప్రశ్నకు టీమ్ అప్పా తమ 'సంజీవ్' చిత్రంతో సమాధానం చెప్పే ప్రయత్నం చేసింది. 70 నిమిషాల నిడివి ఉన్న ఈ తెలుగు ఇండిపెండెంట్ ఫీచర్ ఫిల్మ్‌ను కేవలం 4 రోజుల్లో చిత్రీకరించడం ఈ సినిమా ప్రత్యేకతల్లో ప్రధానమైనది. అనిల్ నక్క రచన, దర్శకత్వంలో రూపొందిన 'సంజీవ్' చిత్రాన్ని వీబీ సినిమా బ్యానర్‌ పై నిర్మించారు. టీమ్ అప్పా ఎగ్జిక్యూట్ చేసిన ఈ చిత్రం ప్రస్తుతం ఆహాలో స్ట్రీమింగ్ అవుతోంది.

కథ విషయానికి వస్తే.. గ్రామీణ తెలంగాణకు చెందిన సంజీవ్‌ కు నటుడు కావాలనే కల ఉంటుంది. సినిమా ప్రపంచంలో తనకంటూ ఒక స్థానం సంపాదించుకోవాలని ప్రయత్నించే అతడి జీవితంలో ఆర్థిక సమస్యలు, వ్యక్తిగత ఇబ్బందులు ఎదురవుతాయి. మరోవైపు దర్శకుడిగా ఎదగాలనే కలతో ఉన్న శివ కూడా ఈ ప్రయాణంలో భాగమవుతాడు. కలలు, స్నేహం, ఆర్థిక ఇబ్బందులు, సినిమా చేయాలనే తపన మధ్య వారి ప్రయాణం ఎలా సాగింది..? చివరకు తమ కలను నెరవేర్చుకోగలిగారా..? అన్నదే మూవీ కథ.

సినిమా అంటే కేవలం గ్లామర్, విజయాలు మాత్రమే కాదని, దాని వెనుక ఎన్నో కలలు, కష్టాలు, అనిశ్చితి, ఆర్థిక సమస్యలు ఉంటాయని ఈ చిత్రం చూపించే ప్రయత్నం చేస్తుంది. ముఖ్యంగా ఒక కలను నమ్మి, ఎన్ని పరిస్థితులు ఎదురైనా దాని కోసం ముందుకు సాగే యువకుల భావోద్వేగాలను కథలో ఆవిష్కరించారు. ఇంత తక్కువసమయంలో సినిమా షూటింగ్ పూర్తి చేయడం వెనుక ముందస్తు ప్రణాళిక, నటీనటుల సిద్ధత, సాంకేతిక బృందం సమన్వయం కీలక పాత్ర పోషించాయి. కథపై స్పష్టమైన ప్రిపరేషన్‌తో షూటింగ్‌కు వెళ్లడం వల్లే చిత్రీకరణ పూర్తి చేయగలిగారు.

హైదరాబాద్‌ లోని ప్రసాద్ ఫిల్మ్ ల్యాబ్‌ లో జరిగిన ప్రత్యేక ప్రీమియర్‌ కు హాజరైన దర్శకుడు శైలేష్ కొలను, నటుడు, దర్శకుడు రాహుల్ రవీంద్రన్ సహా పలువురు అతిథులు కూడా సినిమా కేవలం నాలుగు రోజుల్లో షూట్ చేశారని తెలుసుకుని ఆశ్చర్యపోయారు. ఇంత తక్కువ సమయంలో పూర్తి స్థాయి చిత్రాన్ని తెరకెక్కించడం వెనుక ఉన్న టీమ్‌వర్క్, ప్రణాళికను ప్రత్యేకంగా అభినందించారు.

ఇక అనిల్ నక్క సంజీవ్ పాత్రలో నటించారు. తన కలను వదులుకోకుండా, జీవితంలో ఎదురయ్యే పరిస్థితులతో పోరాడే యువకుడి పాత్రలో ఆయన కనిపించారు. లయ మిర్యాల పల్లవి పాత్రలో నటించగా, వీరమనోహర్ కావలి శివ పాత్రలో కనిపించారు. హరీష్ పాలకుర్తి హరీష్ పాత్రలో, అచ్యుత్ జీఎస్ వెంకట్ పాత్రలో నటించారు. మహీంద్ర గణాచారి, నిఖిల్ గోపు, యశ్వంత్ జన్నె, వసంత్ వికాస్ తదితరులు ఇతర ముఖ్య పాత్రల్లో కనిపించారు. కథలోని పాత్రలు వారి వారి ప్రయాణాలు, కలలు, సమస్యలతో కథనంలో భాగమవుతాయి.

చిత్రానికి జాన్ కె. జోసెఫ్ సంగీతం అందించారు. కథలోని భావోద్వేగాలకు అనుగుణంగా పాటలు, నేపథ్య సంగీతం సాగుతాయి. సంజీవ్ లోని మూడు పాటలకు శివ శంకర్ చింతకింది సాహిత్యం అందించగా, చిత్రంలోని కీలకమైన చివరి పాటకు నటుడు వీరమనోహర్ కావలి సాహిత్యం అందించారు. నటుడిగా తెరపై కనిపించడమే కాకుండా, చిత్రంలోని ఒక ముఖ్యమైన పాటకు సాహిత్యం అందించడం వీరమనోహర్ కావలి మరో ప్రత్యేకతగా నిలిచింది. ఇప్పటికే విడుదలైన 'కలలకే' పాట ఒక భావోద్వేగ మెలోడీగా నిలుస్తుంది. పాటలు, నేపథ్య సంగీతం కథలోని భావోద్వేగాలను ముందుకు తీసుకెళ్లే ప్రయత్నం చేస్తాయి.

చిత్రానికి భూపతి కే.వై సినిమాటోగ్రఫీ అందించారు. కథకు అవసరమైన విజువల్స్‌ను తెరకెక్కించడం చిత్ర నిర్మాణంలోని మరో సవాలుగా నిలిచింది. సాయి కృష్ణ నారెడ్ల ఎడిటింగ్‌తో కథను 70 నిమిషాల నిడివిలో చెప్పే ప్రయత్నం చేశారు. పరిమిత నిడివిలో కథను చెప్పడం వల్ల సినిమా తన ప్రధాన అంశాలపై దృష్టి పెట్టే ప్రయత్నం చేస్తుంది. సంజీవ్ మూవీ ప్రస్తుతం ఆహాలో స్ట్రీమింగ్ అవుతోంది.