‘సినీ ఇండస్ట్రీలో మాఫియా రాజ్యమేలుతోంది.. చిన్న సినిమాలను తొక్కేస్తున్నారు!’
తెలుగు సినీ పరిశ్రమలో చిన్న సినిమాల పరిస్థితిపై హీరో, మూవీ మేకర్ షిరాజ్ మెహదీ సంచలన ఆరోపణలు చేశారు. ఇండస్ట్రీలో మాఫియా తరహా వ్యవస్థ నడుస్తోందని, చిన్న నిర్మాతలు, దర్శకులు అడుగడుగునా మోసం, దోపిడీ, వివక్షను ఎదుర్కొంటున్నారని ఆరోపించారు. తాను నిర్మించి, హీరోగా నటించిన 'ఓ అందాల రాక్షసీ' చిత్రానికి థియేటర్లు కేటాయించడంలో అన్యాయం జరిగిందని ఆవేదన వ్యక్తం చేశారు. తనకు బెదిరింపులు వస్తున్నాయని, అయినా వెనక్కి తగ్గే ప్రసక్తే లేదని షిరాజ్ మెహదీ స్పష్టం చేశారు. మీడియా సమావేశంలో షిరాజ్ మెహదీ మాట్లాడుతూ.. తన సినిమాను మంచి సాంకేతిక నిపుణులతో, ఎంతో కష్టపడి నిర్మించామని తెలిపారు. సరైన స్థాయిలో థియేటర్లు లభించి సినిమా ప్రేక్షకుల ముందుకు వస్తే రికార్డులు సృష్టించే సత్తా తన చిత్రానికి ఉందని ధీమా వ్యక్తం చేశారు.
'చిన్న సినిమాలను తొక్కిపెడుతున్నారు'
సినిమా విడుదలకు థియేటర్లు దొరకడం చిన్న నిర్మాతలకు అతిపెద్ద సమస్యగా మారిందని షిరాజ్ మెహదీ ఆరోపించారు. పెద్ద సినిమాలకు ప్రాధాన్యత ఇస్తూ చిన్న చిత్రాలను పక్కన పెడుతున్నారని అన్నారు. ఈ సమస్యపై ఇప్పటికే 40కి పైగా ప్రెస్‌మీట్లు, 50కి పైగా ఇంటర్వ్యూలు ఇచ్చినట్లు తెలిపారు. "చిన్న సినిమాలను తొక్కిపెడితే చూస్తూ ఊరుకోం. మా హక్కుల కోసం ఎంతవరకైనా పోరాడతాం" అని ఆయన స్పష్టం చేశారు.
'క్యూబ్, యూఎఫ్‌ఓ పేరుతో దోపిడీ'
డిజిటల్ ప్రొజెక్షన్, ఇతర విడుదల ప్రక్రియల పేరుతో చిన్న నిర్మాతలపై అదనపు ఆర్థిక భారం మోపుతున్నారని షిరాజ్ ఆరోపించారు. క్యూబ్, యూఎఫ్‌ఓ వంటి డిజిటల్ ప్రొవైడర్లపై ఆయన తీవ్ర విమర్శలు చేశారు. వారానికి సుమారు రూ.2,000లో పూర్తయ్యే పనికి ఒక్కో థియేటర్ నుంచి రూ.10 వేల నుంచి రూ.12 వేల వరకు వసూలు చేస్తున్నారని ఆరోపించారు. ఈ విధానం వల్ల ఇప్పటికే ఆర్థికంగా ఇబ్బందులు ఎదుర్కొంటున్న చిన్న నిర్మాతలు మరింత నష్టపోతున్నారని అన్నారు.
ఫిల్మ్ ఛాంబర్‌పైనా సంచలన వ్యాఖ్యలు
చిన్న నిర్మాతలు, దర్శకులకు అండగా నిలవాల్సిన ఫిల్మ్ ఛాంబర్ తమ సమస్యలను పట్టించుకోవడం లేదని షిరాజ్ మెహదీ విమర్శించారు. చిన్న నిర్మాతల సమస్యలను పరిష్కరించాల్సిన వ్యవస్థే వారిని మరింత ఇబ్బందులకు గురిచేస్తోందని ఆరోపించారు.ఐనాక్స్, పీవీఆర్, ఏషియన్ ఫిల్మ్స్ వంటి ప్రముఖ మల్టీప్లెక్స్ సంస్థలు తొలుత థియేటర్లు ఇస్తామని చెప్పి, చివరి సమయంలో వెనక్కి తగ్గాయని ఆయన పేర్కొన్నారు. ఈ వ్యవహారంపై ఇప్పటికే చట్టపరమైన నోటీసులు ఇచ్చామని, హైకోర్టు నుంచి సమన్లు కూడా వెళ్లాయని తెలిపారు.
'సీఎం రేవంత్ రెడ్డి జోక్యం చేసుకోవాలి'
సినీ పరిశ్రమలో చిన్న సినిమాలు ఎదుర్కొంటున్న సమస్యలపై తెలంగాణ ముఖ్యమంత్రి రేవంత్ రెడ్డి ప్రత్యేక దృష్టి సారించాలని షిరాజ్ మెహదీ విజ్ఞప్తి చేశారు.సినీ పరిశ్రమపై ఆధారపడి జీవిస్తున్న డ్రైవర్లు, మేకప్ ఆర్టిస్టులు, టెక్నీషియన్లు, జూనియర్ ఆర్టిస్టులు తదితర కార్మికుల సంక్షేమం కోసం హెల్త్ ఇన్సూరెన్స్ వంటి రక్షణ చర్యలు తీసుకోవాలని కోరారు.
'ప్రాణాలు పోయినా పోరాటం ఆపను!'
తనకు బెదిరింపులు వస్తున్నాయని వెనక్కి తగ్గే ప్రసక్తే లేదని షిరాజ్ మెహదీ స్పష్టం చేశారు. "నా ప్రాణాలు పోయినా చిన్న సినిమాల హక్కుల కోసం నా పోరాటం ఆగదు. అవసరమైతే 100 ప్రెస్‌మీట్లు పెడతా.. ర్యాలీలు నిర్వహిస్తా. ఈ యుద్ధంలో చివరికి విజయం సాధించి తీరుతా" అని ఆయన ప్రకటించారు. తన పోరాటం కేవలం 'ఓ అందాల రాక్షసీ' సినిమా కోసమే కాదని, చిన్న నిర్మాతలు, దర్శకులు, కళాకారులు, టెక్నీషియన్ల హక్కుల కోసం కూడా అని పేర్కొన్నారు.
'ఎలాగైనా సినిమా విడుదల చేస్తా'
ఎన్ని అడ్డంకులు ఎదురైనా వెనక్కి తగ్గబోనని స్పష్టం చేసిన షిరాజ్ మెహదీ.. 'ఓ అందాల రాక్షసీ' చిత్రాన్ని త్వరలోనే రీరిలీజ్ చేసి ప్రేక్షకుల ముందుకు తీసుకొస్తానని ప్రకటించారు. చిన్న సినిమాలకు థియేటర్ల కేటాయింపు, డిజిటల్ ప్రొవైడర్ల ఛార్జీలు, ఫిల్మ్ ఛాంబర్ పాత్రపై షిరాజ్ మెహదీ చేసిన ఈ వ్యాఖ్యలు ఇప్పుడు టాలీవుడ్‌లో చర్చనీయాంశంగా మారాయి.
Click it and Unblock the Notifications
Sign in with Google
