ఆ హీరోయిన్ కొరికిన యాపిల్ పండు వేలం.. ఎంత పలికిందో తెలిస్తే షాకే!
మంత్రముగ్ధులను చేసే కళ్లతో వెండితెరపై నిషా మత్తును పరిచయం చేసిన నటి సిల్క్ స్మిత. కేవలం 36 ఏళ్ల వయసులోనే ఈ లోకాన్ని వీడినప్పటికీ.. దక్షిణాది చిత్రసీమలో ఆమె సృష్టించిన ప్రభంజనం సామాన్యమైనది కాదు. ప్రేక్షకులను థియేటర్ల వైపు లాగే ఓ అయస్కాంత శక్తిగా ఆమె నిలిచారు. ఓ సినిమాలో ఆమె ఉందంటే చాలు.. నిర్మాతలకు కాసుల వర్షం కురిసినట్లే. కళ్లలోనే మత్తు, కదలికలో కళ్లు తిప్పుకోలేని సౌందర్యాన్ని ప్రదర్శించిన సిల్క్ స్మిత కేవలం ఓ ఐటమ్ భామ మాత్రమే కాదు.. కోట్ల మంది కుర్రాళ్ల మనసులను కొల్లగొట్టిన లేడీ సూపర్ స్టార్. ఒకటిన్నర దశాబ్ధానికి పైగా సినిమా ఇండస్ట్రీని ఉర్రూతలూగించిన సిల్క్ స్మిత.. తన ఒక్క పాటతోనే సినిమా బ్రేక్ ఈవెన్ అయ్యేలా చేయగల తిరుగులేని క్రేజ్ను సొంతం చేసుకుంది.
దక్షిణాది సినీ లోకంలో సిల్క్ స్మితకు ఉన్న ప్రజాదరణ ఏ స్థాయిదో చెప్పడానికి ఓ ఆసక్తికరమైన సంఘటన నిదర్శనంగా నిలుస్తుంది. 1984లో ఓ షూటింగ్లో బ్రేక్లో సిల్క్ స్మిత యాపిల్ తింటూ ఉండగా షాట్ రెడీ అని చెప్పి ఆమెను పిలిచారట. సిల్క్ స్మిత సగం తిన్న యాపిల్ అక్కడే వదిలేసి వెళ్లిపోయారట. సిల్క్ స్మిత సగం కొరికిన యాపిల్ పండును ఆమె మేకప్ మ్యాన్ అక్కడికక్కడే వేలం వేస్తే సెట్లో ఉన్న వాళ్లు పోటీపడి రూ.25 వేలకు కొనుక్కున్నారట. అప్పట్లో రూ.25 వేలు అంటే మాటలా.. అది సిల్క్ స్మితకు ఉన్న డిమాండ్. ఒకానొక సమయంలో హీరోలతో సమానంగా సిల్క్ స్మిత రెమ్యూనరేషన్ తీసుకుంది. సినిమాలో సిల్క్ స్మిత ఉంటే చాలు.. ఎడ్ల బండి కట్టుకుని మరీ యువకులు సినిమాలకు వెళ్లేవారట.
డిస్ట్రిబ్యూటర్ల ఫేవరేట్
సిల్క్ స్మిత కేవలం ఓ నటిగానే కాకుండా.. అప్పట్లో సినిమాల విజయాలను శాసించే శక్తిగా ఎదిగారు. ఏదైనా ఓ సినిమాలో సిల్క్ స్మిత పాట లేదా డ్యాన్స్ ఉందా అని డిస్ట్రిబ్యూటర్లు ప్రత్యేకంగా అడిగేవారట. ఒకవేళ ఆమె పాట ఉంటేనే ఆ సినిమాను కొనుగోలు చేయడానికి డిస్ట్రిబ్యూటర్లు ముందుకు వచ్చేవారు.. లేదంటే వెనుకడుగు వేసేవారు. అంతటి తిరుగులేని సామ్రాజ్యాన్ని సిల్క్ స్మిత చిత్రసీమలో సృష్టించుకున్నారు. ఎందరో అగ్ర కథానాయికలు ఉన్నప్పటికీ.. సిల్క్ స్మితకు లభించిన క్రేజ్ మరే ఇతర నటికీ దక్కలేదని సినీ వర్గాలు చెబుతుంటాయి.
సెట్స్లో క్రమశిక్షణ, వ్యక్తిత్వం
బయటకు ఎంతో గ్లామరస్గా, మహారాణిలా జీవించిన సిల్క్ స్మిత వ్యక్తిగతంగా చాలా మంచి మనసున్న వ్యక్తని సన్నిహితులు చెప్తారు. షూటింగ్ సెట్కు వస్తే ఆమె మెయింటెనెన్స్ కాస్త ప్రత్యేకంగా ఉన్నప్పటికీ.. మిగతా విషయాల్లో సిల్క్ స్మిత ఎంతో క్రమశిక్షణతో, సమయపాలనతో ఉండేవారు. అందరితో ఎంతో మర్యాదగా ప్రవర్తించేవారని, ఎంతో సౌమ్యురాలని ఆమెతో కలిసి పనిచేసిన నటీనటులు, సాంకేతిక నిపుణులు గుర్తుచేసుకుంటారు.
సిల్క్ స్మిత ప్రస్థానం
సిల్క్ స్మిత అసలు పేరు వడ్లపట్ల విజయలక్ష్మి. ఆమె ఆంధ్రప్రదేశ్లోని ఏలూరు ప్రాంతానికి చెందిన ఓ సాధారణ మధ్యతరగతి అమ్మాయి. 1960 డిసెంబర్ 2న దెందులూరు మండలం కొవ్వలి గ్రామంలో జన్మించిన విజయలక్ష్మి, కుటుంబ పరిస్థితుల వల్ల కేవలం నాల్గవ తరగతి వరకే చదువుకోగలిగింది. కేవలం 15 ఏళ్ల చిన్న వయసులోనే ఆమెకు వివాహం జరిగాయి. అయితే, అత్తింటి వేధింపులు భరించలేక, తన జీవితాన్ని తానే నిర్మించుకోవాలనే పట్టుదలతో ఆమె మద్రాసు (చెన్నై) పారిపోయింది. సినీ నగరిలో టచప్ ఆర్టిస్ట్గా కెరీర్ ప్రారంభించి, ఆ తర్వాత చిన్న చిన్న పాత్రలు చేస్తూ సినిమా రంగంలో నిలదొక్కుకునే ప్రయత్నం చేసింది.
ఆమెలోని ప్రతిభను గుర్తించిన మలయాళ దర్శకుడు ఆంథోనీ ఈస్ట్ మన్ 'ఇనయే తేడి' అనే సినిమాతో ఆమెను హీరోయిన్గా పరిచయం చేశారు. ఆ తర్వాత తమిళంలో ఆమె నటించిన 'వండిచక్రం' చిత్రం సంచలన విజయం సాధించడంతో, విజయలక్ష్మి కాస్తా 'సిల్క్ స్మిత'గా మారిపోయింది. అప్పటికే పరిశ్రమను శాసిస్తున్న జయమాలిని, జ్యోతిలక్ష్మి వంటి స్టార్ డ్యాన్సర్ల హవా నడుస్తున్న సమయంలో, శృంగార రసాధిదేవతగా దూసుకొచ్చి వారి స్థానాన్ని భర్తీ చేసింది. ఆ తర్వాత దక్షిణాదిలోని అందరు టాప్ హీరోల సినిమాల్లోనూ సిల్క్ స్మిత ఒక అనివార్య శక్తిగా మారిపోయింది.
ఒకానొక దశలో అగ్ర హీరోలతో సమానమైన రెమ్యునరేషన్ తీసుకునే స్థాయికి సిల్క్ స్మిత ఎదిగారు. ఆమె సినిమా ఉందంటే చాలు, పల్లెటూళ్ల నుండి ఎడ్లబండ్లు కట్టుకుని మరీ యువకులు థియేటర్లకు తరలివచ్చేవారు. అభిమానులు ఆమె ఆటోగ్రాఫ్ కోసం ఎగబడేవారే కాదు, తమిళనాడులో కొందరు అభిమానులు కిళ్ళీ తెచ్చి ఆమెను కొరికి ఇమ్మని ప్రాధేయపడేవారట. వెండితెరపై మహారాణిలా వెలిగిన సిల్క్ స్మిత వ్యక్తిగత జీవితంలో మాత్రం ఎన్నో ఒడిదుడుకులు, మానసిక సంఘర్షణలను ఎదుర్కొన్నారు. ఆడంబరమైన జీవితం వెనుక దాగి ఉన్న ఒంటరితనం, ఆర్థిక ఇబ్బందులు ఆమెను తీవ్రంగా కలచివేసాయి. ఈ క్రమంలోనే, 1996 సెప్టెంబర్ 23న ఆమె తన నివాసంలో ఆత్మహత్య చేసుకుని తనువు చాలించారు. అంతటి స్టార్ హీరోయిన్ అర్ధాంతరంగా మరణించడం సినీ లోకాన్ని దిగ్భ్రాంతికి గురిచేసింది. ఆమె మరణం చుట్టూ ఇప్పటికీ ఎన్నో అనుమానాలు, వీడని మిస్టరీలు ఉన్నప్పటికీ, తెలుగు, తమిళ ప్రేక్షకుల గుండెల్లో 'సిల్క్ స్మిత' స్థానం ఎప్పటికీ చెరిగిపోనిది.
Click it and Unblock the Notifications
Sign in with Google