త‌మిళ హీరో ఆరోగ్య ప‌రిస్థితి విష‌మం...

డీఎండీకే పార్టీ అధినేత, ఒకప్పటి తమిళ స్టార్ హీరో, విజయకాంత్ ఆరోగ్య పరిస్థితి విషమంగా ఉందని చెన్నైలోని మయత్ ఆస్పత్రి యాజమాన్యం ఓ నివేదిక‌లో వెల్ల‌డించింది. నవంబర్ 18న డీఎండీకే అధినేత విజయకాంత్ అనారోగ్య కారణాలతో చెన్నైలోని మయత్ ఆస్పత్రిలో చేరిన విష‌యం తెలిసిందే. అయితే, విజయకాంత్ దగ్గు, జలుబు, గొంతునొప్పితో బాధపడుతున్నందున సాధారణ వైద్య పరీక్షల కోసం మాత్ర‌మే ఆసుప‌త్రికి వెళ్లినట్లు అప్ప‌ట్లో డీఎండీకే వెల్లడించింది. అయితే సుమారు తొమ్మిది రోజుల త‌ర్వాత అంటే నేడు, డీఎండీకే అధినేత విజయకాంత్ ఆరోగ్య పరిస్థితికి సంబంధించి మయత్ హాస్పిటల్ యాజ‌మాన్యం ఒక కొత్త వైద్య నివేదికను విడుదల చేయ‌డం జ‌రిగింది.

ఆ నివేదిక‌లో విజయకాంత్ ఆరోగ్యం మెరుగుపడిందని, అయినప్పటికీ, గత 24 గంటలుగా విషమంగా మారినట్లు వెల్లడించింది. వైద్య చికిత్సకు ఆయన శరీరం సహకరిస్తున్నా, పరిస్థితి మాత్రం నిలకడగా లేదని డాక్ట‌ర్లు తెలిపారు. అతడు కోలుకోవడానికి పల్మనరీ చికిత్సను వైద్య నిపుణులు సిఫార్సు చేసినట్లు నివేదిక‌లో వెల్లడించారు. అంతేకాదు, ఆయన కోలుకోవడానికి మరో 14 రోజుల పాటు నిరంతర చికిత్స అవసరం అని వెల్లడించారు. వైద్యులు ఇచ్చిన హెల్త్ బులెట‌న్‌తో డీఎండీకే వర్గాల్లో ఆందోళన మొద‌లైంది. ఆయన ఆరోగ్యం త్వరగా కుదుట పడాలని పార్టీ నాయకులు, కార్యకర్తలు ప్రత్యేక పూజలు చేస్తున్నారు. గెట్ వెల్ సూన్ అంటూ సోషల్ మీడియా వేదికగా విజ‌య్‌కాంత్ అభిమానులు పోస్టులు పెడుతున్నారు.

పార్టీ కార్య‌క్ర‌మాల్లో చురుకుగా ఉంటోన్న ప్రేమ‌ల‌త‌...

అనారోగ్య పరిస్థితుల కారణంగా విజ‌య్‌కాంత్ పార్టీ కార్య‌క్ర‌మాల్లో యాక్టివ్ గా లేకున్నాఆయన భార్య ప్రేమలత విజయ ప్రభాకరన్ మాత్రం పార్టీ కార్యక్రమాల్లో చురుకుగా పాల్గొంటున్నారు. ఆమె ప్రస్తుతం డీఎండీకే కోశాధికారి పదవిలో కొనసాగుతున్నారు. 70 ఏళ్ల వ‌య‌సున్న విజయ్ కాంత్ తమిళ సినీ పరిశ్రమలో తనదైన న‌ట‌న‌తో ప్రేక్ష‌కుల‌ను ఆక‌ట్టుకున్నారు. ఆ తర్వాత రాజకీయాల్లోకి అడుగు పెట్టి, డీఎండీకే పార్టీని స్థాపించారు. ఆయ‌న రీసెంట్ గా దీపావళిని తన కుటుంబంతో కలిసి ఇంట్లో జరుపుకుని సోషల్ మీడియాలోని త‌న ఖాతాలో ఆ ఫోటోలను కూడా షేర్ చేశాడు.

English summary

The management of Chennai's Mayath Hospital revealed in a report that DMDK party leader and former Tamil star hero Vijayakanth is in critical condition,