వంద టెస్టుల తెలుగువాడు

హైదరాబాదీ బ్యాట్స్ మన్ వివియస్ లక్ష్మణ్ వంద టెస్టులు ఆడిన తొలి తొలుగువాడిగా చరిత్ర సృష్టించాడు. ప్రస్తుతం నాగపూర్ లో జరుగుతున్న టెస్టు మ్యాచ్ అతనికి వందో టెస్టు. లక్ష్మణ్ రోల్ మోడల్, హైదరాబాదీ మహ్మద్ అజరుద్దీన్ 99 టెస్టు మ్యాచులు ఆడాడు. బ్యాటింగులో మణికట్టు మాంత్రికుడిగా పేరున్న లక్ష్మణ్ ప్రపంచవ్యాప్తంగా గుర్తింపు పొందారు. అజరుద్దీన్ లక్ష్మణ్ ను టెస్టు క్రికెట్ లోకి తెచ్చాడు. ఆయన తల్లిదండ్రులు సత్యభామ, శాంతారాం వృత్తిరీత్యా వైద్యులు. లక్ష్మణ్ కూడా వైద్య విద్యార్థియే. అయితే విద్యకు మధ్యలోనే స్వస్తి చెప్పి క్రికెట్ కెరీర్ ను ప్రారంభించాడు. కంప్యూటర్ అప్లికేషన్స్ లో పోస్టు గ్రాడ్యుయేట్ అయిన జి.ఆర్. శైలజను 2004 ఫిబ్రవరిలో పెళ్లి చేసుకున్నారు. వారికి 2007 మార్చిలో కుమారుడు పుట్టాడు. అతని పేరు సర్వజిత్.

తన బ్యాటింగ్ శైలితో లక్ష్మణ్ ప్రపంచంలోని క్రికెట్ మేధావులను ఆకట్టుకున్నారు. స్పిన్ ను ఆడడంలో ఆయనను మించినవారు లేరనే మాట ఎప్పుడూ వినిపిస్తూనే ఉంటుంది. ఆస్ట్రేలియా బౌలర్లను ఎదుర్కోవడంలో ఆయనను మించినవారు లేరు. ఆయన తన రెండు డబుల్ సెంచరీలను ఆస్ట్రేలియాపైనే చేశారు. కోల్ కత్తాలో 2001లో జరిగిన టెస్టు మ్యాచులో 281 పరుగులు చేసి మ్యాచ్ ఫలితాన్నే మార్చివేశాడు.

గాడ్ ఫాదర్స్ లేకపోవడంతో భారత జట్టులో ఆయన స్థానం ఎప్పుడూ స్థిరంగా ఉన్నట్లు కనిపించదు. దాంతో ఎప్పటికప్పుడు తన ప్రతిభను చాటుకుంటూ తన స్థానాన్ని నిలబెట్టుకుంటూ వస్తున్నాడు. 99 టెస్టు మ్యాచుల్లో ఆయన 6313 పరుగులు చేశాడు. లక్ష్మణ్ ను వెరీ వెరీ స్పెషల్ అంటారు. ఆ రకంగా క్రికెట్ వ్యాఖ్యాతల మన్ననలు పొందాడు ఆయన.

లక్ష్మణ్ 1996లో అహ్మదాబాద్ లో దక్షిణాఫ్రికాతో జరిగిన మ్యాచ్ తో తన అంతర్జాతీయ క్రికెట్ కెరీర్ ను ప్రారంభించారు. దాంట్లో అతను అర్థ సెంచరీ చేశాడు. అయితే జట్టులో స్థానం కోసం అతను పోరాటమే చేయాల్సి వచ్చింది. మిడిల్ ఆర్డర్ లో మేటి బ్యాట్స్ మెన్ ఉండడంతో 1997లో దక్షిణాఫ్రికాతో జరిగిన సిరీస్ లో ఓపెనరుగా దిగాల్సి వచ్చింది. మూడేళ్ల పాటు అతను ఆ పాత్ర నిర్వహించాడు. ఆ తర్వాత అతను ఎక్కువ కాలం కొనసాగలేకపోయాడు. ఈ రకంగా జట్టులో స్థిరమైన చోటు లేకుండా అతను ఇబ్బందులు పడ్డాడు. అయినా మొక్కవోని ధైర్యంతో, స్థిర చిత్తంతో అంతర్జాతీయ క్రికెట్ లో ప్రత్యేకమైన గుర్తింపు పొందాడు. అందుకే లక్ష్మణ్ వెరీ వెరీ స్పెషల్ అయ్యాడు.