"ఆటా"లో కొట్లాట

న్యూజెర్సీ, నెవార్క్‌, వింధ్యామ్‌ హోటల్‌లో మే 2న జరిగిన అమెరికన్‌ తెలుగు అసోసియేషన్‌ (ఆటా) బోర్డు సమావేశంపై వివాదం చెలరేగుతోంది. సమావేశానికి సంస్థ అధ్యక్షుడు ఎం.జితేందర్‌ రెడ్డి అధ్యక్షత వహించారు. అయితే ఈ సమావేశం చట్ట విరుద్ధమని అధ్యక్ష అభ్యర్ధి రాజీందర్‌ రెడ్డి, కార్యదర్శి జిన్నా, ఇతర సభ్యులు ఒక ప్రకటనలో తెలిపారు. జనవరి 24న లాస్‌వెగాస్‌లో జరిగిన గత బోర్డు సమావేశాన్ని నిష్ప్రయోజనం చేసేందుకు ఎగ్జిక్యూటివ్‌ కమిటీ ఎన్నికను పనికి రాకుండా చేసేందుకు జితేందర్‌ రెడ్డి పలు అక్రమ మార్గాలను అవలంబించారని వారు ఆరోపించారు. గత బోర్డు సమావేశానికి సంబంధించిన అంశాలను చర్చించేందుకు ఆయన అనుమానాస్పద బోర్డు సమావేశాన్ని నిర్వహించినట్లు వారు ఆరోపించారు. ఈ బోర్డు సమావేశంలో చర్చించదగిన అంశాలేవీ లేవని వారు తెలిపారు. జనవరి 24 జరిగిన బోర్డు సమావేశంలో ప్రస్తుత అధ్యక్షుడు ప్రిసైడింగ్‌ అధికారి పాత్ర పోషించారని. ఆయన 13 మంది ట్రస్టీలతో కుమ్మక్కై ఆటా రాజ్యాంగం ప్రకారం సూత్రాల ప్రకారం తీసుకున్న చర్యలను పనికిరాకుండా చేసేందుకు యత్నించారని వారు విమర్శించారు.

ఈ 13 మందిలో ఒకరు గత బోర్డు సమావేశం లోనే రాజీనామా సమర్పించటం వల్ల ప్రస్తుత సమావేశంలో పాల్గొనేందుకు అర్హత కోల్పోయారు. రాజీనామా చేసిన ఈ ట్రస్టీ డాక్టర్‌ ప్రేమ్‌రెడ్డి గత బోర్డు సమావేశంలో ఎన్నికైన ఎగ్జిక్యూటివ్‌ కమిటీని నియమితులైన వివిధ హోదాల అధికారులను చెల్లకుండా చేసేందుకు తీర్మానం ఆమోదించేందుకు కొంతమంది ట్రస్టీలను డాక్టర్‌ రెడ్డి బలవంతపెట్టారు.

ఆటా రాజ్యాంగం ప్రకారం గత బోర్డు తీసుకున్న నిర్ణయాలను చెల్లకుండా చేసేందుకు కనీసం 66.3 శాతం మెజారిటీ సాధించవలసి ఉంది. సరైన కారణం లేకుండా న్యాయబద్ధంగా ఎన్నికైన ఎగ్జిక్యూటివ్‌ కమిటీ సభ్యులను తొలగించేందుకు వీలు లేదు. అయితే ఈ తీర్మానం కూడా 14 ఓట్ల మెజారిటీతో ఆమోదం పొందింది. ఈ రాజ్యాంగ విరుద్ధమైన అక్రమ చర్యలను తాము ఖండిస్తున్నట్లు రాజీందర్‌ రెడ్డి, జిన్నా తెలిపారు. తమకు ఉన్న అన్ని ఐచ్ఛికాలను వినియోగించి సమస్య పరిష్కారానికి ప్రయత్నిస్తున్నట్లు వారు వెల్లడించారు.