నువ్వా నేనా?

రాష్ట్రంలో లోకసభ ఎన్నికలతో పాటు శాసనసభ ఎన్నికల పర్వం ముగిసింది. రాష్ట్రంలోని 294 శాసనసభా నియోజకవర్గాలకు, 42 లోకసభ స్థానాలకు రెండు విడతల్లో పోలింగ్ ముగిసింది. కాంగ్రెస్, తెలుగుదేశం, ప్రజారాజ్యం పార్టీలు ఎన్నికల ఘటం ప్రారంభమైనప్పటి నుంచీ విజయం కోసం అహర్నిశలూ పని చేస్తూనే ఉన్నారు. మూడు పార్టీల్లోనూ విజయం ఆ పార్టీల అగ్రనేతలకు అనివార్యంగా మారింది. ముఖ్యమంత్రి డాక్టర్ వైయస్ రాజశేఖర రెడ్డి తిరిగి అధికారాన్ని నిలబెట్టుకోవడానికి ప్రయత్నిస్తే, తెలుగుదేశం పార్టీ అధ్యక్షుడు నారా చంద్రబాబు నాయుడు మరోసారి అధికారాన్ని చేపట్టడానికి చక్రం తిప్పారు. ప్రజారాజ్యం పార్టీ అధినేత చిరంజీవి తన రాజకీయ భవిష్యత్తుకు పరీక్ష పెట్టుకున్నారు. ఈ ముగ్గురు నాయకులు కూడా ఎన్నికల ప్రచారంలో చెమటోడ్చారు. విమర్శలు, ప్రతివిమర్శలతో వాతావరణాన్ని వేడెక్కించారు.

తిరిగి అధికారం మాదేనని వైయస్ రాజశేఖర రెడ్డి ధీమా వ్యక్తం చేస్తుండగా, అధికారం మాదేనని తెలుగుదేశం పార్టీ అధ్యక్షుడు నారా చంద్రబాబు నాయుడు అంటున్నారు. రాష్ట్రంలో నిశబ్ద విప్లవం వస్తుందని, ఓటర్లు తమకే పట్టం కడుతారని చిరంజీవి చెబుతూ వచ్చారు. అయితే చిరంజీవి రాష్ట్రంలో అధికారాన్ని చేపట్టడానికి తగిన సీట్లను సాధించుకోలేరని గట్టిగానే వాదనలు వినిపిస్తున్నాయి. పోటీ చంద్రబాబుకు, వైయస్ రాజశేఖర రెడ్డికి మధ్యనే ఉండే అవకాశాలున్నాయి. అయితే ఏ పార్టీకి కూడా ప్రభుత్వాన్ని ఏర్పాటు చేయడానికి తగిన మెజారిటీ రాదని, ఈ స్థితిలో చిరంజీవి ప్రభుత్వ ఏర్పాటులో కీలక పాత్ర పోషిస్తారనే మాట కూడా వినిపిస్తుంది.

తెలంగాణలో తెలుగుదేశం పార్టీ నేతృత్వంలోని మహా కూటమి ఆధిక్యత సాధిస్తుందని అంటున్నారు. తొలి విడత పోలింగ్ జరిగిన 154 అసెంబ్లీ స్థానాల్లో 90 దాకా గెలుచుకుంటుందని అంచనాలు వేస్తున్నారు. ఉభయ గోదావరి జిల్లాల్లో చిరంజీవి పాగా వేసినట్లు భావిస్తున్నారు. మిగతా కోస్తా జిల్లాల్లో మూడు పార్టీలు కూడా సీట్లను పంచుకుంటాయని అంటున్నారు. రాయలసీమలో కాంగ్రెసుకు కొద్దిపాటి ఆధిక్యత మాత్రమే వస్తుందని భావిస్తున్నారు. మొత్తం మీద చంద్రబాబుకు, రాజశేఖర రెడ్డికి మధ్య నువ్వా నేనా అన్నట్లు పోటీ సాగింది.