'మెగా' ఫెయిల్యూర్

రాష్ట్ర రాజకీయాల్లోనే కాదు, సమైక్యాంధ్ర ఉద్యమంలో కూడా ప్రజారాజ్యం పార్టీ అధినేత చిరంజీవి ఘోరంగా విఫలమయ్యారు. సమైక్యాంధ్ర ఉద్యమంతో పార్టీని కోస్తాంధ్ర ప్రాంతంలో బలోపేతం చేసుకోవాలని చూసిన ఆయనకు తగిన ఫలితాలు లభించడం లేదు. తెలంగాణను వదులుకుని, కోస్తాంధ్ర, రాయలసీమ ప్రాంతాల్లో బలమైన పార్టీగా అవతరించాలని తొందరపడి చిరంజీవి సమైక్యాంధ్ర నినాదాన్ని తీసుకున్నారు. సామాజిక తెలంగాణకు కట్టుబడి ఉన్నామన్న తన నిర్ణయాన్ని వెనక్కి తీసుకున్నారు. రాష్ట్రం కలిసి ఉండాలంటూ ఆయన రాయలసీమ, కోస్తాంధ్ర ప్రాంతాల్లో పర్యటించారు. సమైక్యాంధ్ర నినాదం వినిపించారు. మొదట ఆయనకు ఊపు లభించినట్లు కనిపించినప్పటికీ మెల్లగా చిరంజీవి ప్రాబల్యం తగ్గుతూ వచ్చింది.

చిరంజీవి సమైక్యాంధ్ర ఉద్యమం వల్ల బలపడకుండా కాంగ్రెసు, తెలుగుదేశం పార్టీలు చెక్ పెట్టాయి. తెలుగుదేశం, కాంగ్రెసు పార్టీల నాయకులు సమైక్యాంధ్ర నినాదంతో ఉద్యమాలకు దిగాయి. జెఎసి సమావేశాలు నిర్వహించాయి. ఈ జెఎసి సమావేశాలకు చిరంజీవిని ఆహ్వానించలేదు. సమైక్యాంధ్ర ఉద్యమ ఫలాలు చిరంజీవికి దక్కకుండా ఆ పార్టీలు రంగంలోకి దిగాయి. రాష్ట్ర విభజనను తామే అడ్డుకుంటామనే విధంగా వ్యవహరించాయి. దీంతో చిరంజీవి కన్నా కాంగ్రెసు, తెలుగుదేశం పార్టీలు బలంగా తయారైనట్లు చెబుతున్నారు.

తెలంగాణలో తెలంగాణ రాష్ట్ర సమితి, సీమాంధ్రలో చిరంజీవి బలపడకుండా, ఆ రెండు పార్టీలను దెబ్బ తీసేందుకు తెలుగుదేశం, కాంగ్రెసు పార్టీలు వ్యూహాత్మకంగా ముందుకు కదులుతున్నట్లు అర్థమవుతోంది. తెరాస శాసనసభ్యులు రాజీనామా చేసే వరకు తెరాసలో కొనసాగిన కాంగ్రెసు ఆ తర్వాత తప్పుకుంది. తెలుగుదేశం శాసనసభ్యులు కాంగ్రెసు పేరు చెప్పి రాజీనామాలకు దిగలేదు. దీంతో తెలంగాణ ఉద్యమంలో తెరాస అధ్యక్షుడు కె. చంద్రశేఖర రావు ఒంటరివారయ్యారు. అలాగే, సీమాంధ్రలో చిరంజీవి కూడా ఒంటరివాడయ్యారు. ఏమైనా, రాజకీయ వ్యూహరచనలో చిరంజీవి వైఫల్యం కొట్టొచ్చినట్లు కనిపిస్తోంది.