• search
  • Live TV
వేగవంతమైన అలర్ట్స్ కోసం
వెంటనే సబ్‌స్క్రైబ్ చేసుకోండి  
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

డిఎస్ కు తెలంగాణ వాతలు

By Pratap
|

Srinivas
ప్రదేశ్ కాంగ్రెసు పార్టీ (పిసిసి) అధ్యక్షుడు డి. శ్రీనివాస్ కు సొంత పార్టీ నాయకుల నుంచే వ్యతిరేకత ఎదురవుతోంది. శాసనసభ ఉప ఎన్నికల్లో తమ పార్టీ పోటీ చేస్తుందని డి. శ్రీనివాస్ చేసిన ప్రకటన కాంగ్రెసు పార్టీలో కలకలం రేపింది. కాంగ్రెసు తెలంగాణ ప్రాంత నాయకులు తనను వ్యతిరేకిస్తుండడంతో డిఎస్ వ్యూహరచనకు విఘాతం కలిగేట్లే కనిపిస్తోంది. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును దెబ్బ తీయాలని డిఎస్ చేసిన ప్రయత్నం తీవ్రంగా దెబ్బ తినే పరిస్థితే కాకుండా డిఎస్ తెలంగాణ ప్రజల ఆగ్రహానికి కూడా గురి కావాల్సి రావచ్చు. శ్రీకృష్ణ కమిటీ విధివిధానాలను వ్యతిరేకిస్తూ తెలంగాణ జెఎసి నిర్ణయం మేరకు తెరాసకు చెందిన 10 మంది శాసనసభ్యులతో పాటు తెలుగుదేశం పార్టీ శాసనసభ్యుడు ఒకరు, బిజెపి సభ్యుడు ఒకరు రాజీనామా చేశారు. దీంతో ఈ స్థానాలకు ఉప ఎన్నికలు వస్తున్నాయి. జెఎసి నిర్ణయం మేరకు ఆ 12 మందిని కూడా ఏకగ్రీవంగా ఎన్నుకోవాల్సి ఉంది.

జెఎసి నిర్ణయానికి విరుద్ధంగా డిఎస్ మందుకు సాగడానికి చేసిన ప్రకటనకు తీవ్రంగా వ్యతిరేకత ఎదురవుతోంది. కాంగ్రెసు సీనియర్ శాసనసభ్యుడు పి. శంకరరావు డిఎస్ ప్రకటనను వ్యతిరేకించారు. తెరాస శాసనసభ్యులను ఏకగ్రీవంగా ఎన్నుకోవాల్సిన బాధ్యత అందరిపై ఉందని ఆయన అన్నారు. అయితే, తెరాస శాసనసభ్యులు రాజీనామా చేయడాన్ని కూడా ఆయన సమర్థించలేదు. తెరాస తొందరపడి రాజీనామాలు చేసిందని ఆయన అన్నారు. తెరాస శాసనసభ్యులకు వ్యతిరేకంగా పోటీ దింపినా ప్రజల నుంచి కాంగ్రెసుకు తీవ్ర వ్యతిరేకత రావచ్చు. డిఎస్ ప్రకటనను మరో కాంగ్రెసు సీనియర్ నేత జీవన్ రెడ్డి కూడా వ్యతిరేకించారు. డిఎస్ ఏ సందర్భంలో పోటీ చేస్తామన్నారో తెలియదు గానీ కాంగ్రెసు పోటీ చేయకూడదని ఆయన అన్నారు. జెఎసిలో తీసుకున్న నిర్ణయాన్ని అమలు చేయాల్సిన బాధ్యత తమపై ఉందని ఆయన అన్నారు. సీనియర్ శాసనసభ్యుడు ఆర్ దామోదర్ రెడ్డి కూడా డిఎస్ ప్రకటనను వ్యతిరేకించారు. తెరాస శాసనసభ్యులను ఏకగ్రీవంగా ఎన్నుకోవడానికి అవసరమైన చర్యలు తీసుకోవాల్సిన అవసరం ఉందని ఆయన అన్నారు. ఈ విషయాన్ని పార్టీ అధిష్టానం దృష్టికి తీసికెళ్తామని ఆయన చెప్పారు.

కాగా, తెరాస నాయకులు డిఎస్ ప్రకటనపై తీవ్రంగా మండిపడుతున్నారు. డిఎస్ కు సవాళ్లు విసురుతున్నారు. దమ్ముంటే నిజామాబాద్ శాసనసభ నియోజకవర్గం నుంచి పోటీ చేయాలని తెరాస నాయకుడు హరీష్ రావు డిఎస్ ను సవాల్ చేశారు. కాంగ్రెసు పోటీ చేస్తే తీవ్రంగా దెబ్బ తీయాలనే ఎత్తుగడలో తెరాస ఉంది. డిఎస్ ప్రకటనను తెలంగాణ జెఎసి కన్వీనర్ కోదండరామ్ ద్రోహపూరిత చర్యగా వ్యాఖ్యానించారు. మొత్తం మీద, డిఎస్ కు తెలంగాణ వాతలు తీవ్రంగా పడుతున్నాయి. ఆయనపై మరింత వ్యతిరేకత రావచ్చు.

న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X