కెసిఆర్ చెడగొడుతున్నారా?

తెలంగాణ రాష్ట్ర ఏర్పాటు సాధనకు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వ్యూహం చెరుపు చేస్తుందా అనే అనుమానాలు వ్యక్తమవుతున్నాయి. ఆయన తెలుగుదేశం పార్టీ నాయకులతో కుమ్మక్కయి కాంగ్రెసు తెలంగాణ నాయకుల మెడలపై కత్తి పెట్టడం ద్వారా మొదటికే మోసం వచ్చేట్లుందనే అనుమానాలు వ్యక్తమవుతున్నాయి. తెరాసతో పాటు తెలుగుదేశం పార్టీ నాయకులు రాజీనామాలు ఆమోదింపజేసుకోవడానికి చేస్తున్న ప్రయత్నం బెడిసికొట్టే ప్రమాదం ఉందని భావిసల్తున్నారు. రాజీనామాలను ఆమోదింపజేసుకుని రాజ్యాంగ సంక్షోభం సృష్టించాలనేది ఈ రెండు పార్టీల వ్యూహంగా కనిపిస్తోంది. తెలుగుదేశం నాయకులకు రాష్ట్ర సాధన కన్నా రాజ్యాంగ సంక్షోభం సృష్టించి తిరిగి ఎన్నికలను అహ్వానించడం మీదనే దృష్టి ఉందనే అభిప్రాయం బలంగా ఉంది. దీంతో రాజీనామాలను ఆమోదింపజేసుకునే విషయంలో తెలంగాణ రాజకీయ జెఎసిపై ఆ పార్టీ తీవ్రమైన ఒత్తిడి పెడుతుందని అంటున్నారు. ఈ విషయంలో తెలుగుదేశం పార్టీతో కెసిఆర్ కుమ్మక్కయ్యారనే ప్రచారం జరుగుతోంది. ఇటీవల కెసిఆర్ తెలుగుదేశం నాయకులతో రహస్య చర్చలు జరిపినట్లు కూడా చెబుతున్నారు. అయితే కాంగ్రెసుపై తీవ్రమైన ఒత్తిడి పెడితే తప్ప ఆ పార్టీ అధిష్టానంపై వారు ఒత్తిడి తేరని, ఒత్తిడి తేకపోతే తెలంగాణ రాష్ట్ర ప్రక్రియ ఆగిపోతుందని కెసిఆర్ భావిస్తున్నారని, ఈ విషయంలో తెలుగుదేశం కన్న భిన్నమైన ఆలోచన కెసిఆర్ కు ఉందని అంటున్నారు. దీనిపై నిజానిజాలేమిటో తెలియదు.

ఒత్తిడి పెడుతున్నప్పటికీ పార్టీ అధిష్టానం అడుగు ముందుకు వేయకపోవడంతో కాంగ్రెసు ప్రజాప్రతినిధుల్లో ఆందోళన వ్యక్తమవుతోంది. ప్రజల్లో, విద్యార్థుల్లో ఉన్న ఆకాంక్షకు అనుగుణంగా వ్యవహరించలేకపోవడమే అందుకు కారణం. ప్రజాప్రతినిదులంతా రాజీనామాలు చేసి రావాల్సిందేనని విద్యార్థులు డిమాండ్ చేస్తున్నారు. రాజీనామాలు చేసిన వారిని ఏకగ్రీవంగా ఎన్నిక చేయించే బాధ్యత తమదని వారు చెబుతున్నారు. వారి మాటలను కాదని ప్రజల్లోకి వెళ్లలేని స్థితి తెలంగాణలోని ప్రజాప్రతినిధుల్లో నెలకొంది. దీంతో కాంగ్రెసు మంత్రులు, శాసనసభ్యులు, ఎమ్మెల్సీలు ఇరకాటంలో పడ్డారు. ఈ స్థితిలో వారు జెఎసిని మరింత గడువు కోరే దిశలో కదులుతున్నట్లు సమాచారం. జెఎసి నుంచి బయటకు రావాలనే అభిప్రాయం కూడా కొంత మంది తెలంగాణ కాంగ్రెసు నాయకుల్లో ఉంది. అయితే అందుకు కూడా చాలా మందికి అవకాశం లేకుండా పోయింది. ప్రత్యక్ష ఎన్నికల్లో జయాపజయాలు నిర్ణయించుకోలేని వి. హనుమంత రావు వంటి నాయకులే ఆ విధంగా వ్యవహరిస్తున్నారనే అభిప్రాయం ఉంది.

క్లైమాక్స్ లో చెడగొట్టడం కెసిఆర్ కు అలవాటుగా మారిందని హనుమంతరావు అన్నారు. అంతా బాగా ముందుకు తెచ్చి చివరలో చెడగొడతారని ఆయన అంటున్నారు. రాజీనామాల విషయంలో ఒత్తిడి విషయంలో కూడా కెసిఆర్ ఆ విధంగానే వ్యవహరిస్తున్నారని ఆయన విమర్శిస్తున్నారు. రాజీనామాలను ఆమోదింపజేసుకుంటే రాష్ట్రపతి పాలన వచ్చి తెలంగాణ రాష్ట్ర ఏర్పాటు ప్రక్రియలో జాప్యం జరుగుతుందని ఆయన వాదిస్తున్నారు. సీమాంధ్ర నాయకులు కూడా ఇదే వాదనను ముందుకు తెస్తున్నారు. అయితే, రాజీనామాల విషయంలో తెలుగుదేశం నాయకులు కాస్తా పట్టు సడలించినట్లు కనిపిస్తోంది. తమకు ఎన్నికలు రావాలనే ఉద్దేశం ఉందని, తెలంగాణపై కన్నా ఎన్నికలపైనే ఆసక్తి ఉందనే అభిప్రాయం వల్ల చెరుపు జరిగే ప్రమాదం ఉందని గ్రహించిన తెలుగుదేశం తెంలగాణ నాయకులు కాస్తా పట్టు సడలించినట్లు కనిపిస్తోంది. రాజీనామాల విషయంలో తాము జెఎసి నిర్ణయానికి కట్టుబడి ఉంటామని, రాజీనామాల గడువు పెంచే విషయంపై జెఎసి నిర్ణయం తీసుకుంటుందని తెలుగుదేశం నాయకుడు నాగం జనార్దన్ రెడ్డి అన్నారు. ఢిల్లీకి వెళ్లిన దామోదర్ రెడ్డి, జానారెడ్డి మంచి వార్త తెస్తారనే నమ్మకం ఉందని ఆయన బుధవారం అన్నారు. తాము అనుసరించాల్సిన వ్యూహం చర్చించడానికి వారు బుధవారం సమావేశమయ్యారు.

మొత్తం మీద, కెసిఆర్ వ్యూహం ఫలిస్తుందా, చివరి నిమిషంలో బెడిసి కొడుతుందా అనేది వేచి చూడాల్సిందే. ఇటు తెలంగాణపై కాంగ్రెసు అధిష్టానం ముందుకు కదిలే పరిస్థితి రావడంతోనే సీమాంధ్ర నాయకులు గొంతు విప్పారు. రాయపాటి సాంబశివరావు, లగడపాటి రాజగోపాల్, శైలజానాథ్ మరో సారి తమ గొంతు విప్పి తెలంగాణకు వ్యతిరేకంగా మాట్లాడారు.