• search
  • Live TV
వేగవంతమైన అలర్ట్స్ కోసం
వెంటనే సబ్‌స్క్రైబ్ చేసుకోండి  
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

జగన్ తెలంగాణ మద్దతు పొందుతారా?

By Pratap
|

YS Jagan
తెలంగాణ ప్రజల సానుభూతిని సంపాదించుకోవడానికి వైయస్సార్ కాంగ్రెసు పార్టీ అధ్యక్షుడు వైయస్ జగన్ సరికొత్త వ్యూహాన్ని అనుసరిస్తున్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు మేలు చేసే వ్యూహాన్ని అనుసరిస్తూ దీర్ఘకాలిక రాజకీయ ప్రయోజనాలను పొందడానికి వైయస్ జగన్ ప్రయత్నిస్తున్నారు. తెలంగాణ కోసం రాజీనామా చేసినవారికి ఉప ఎన్నికల్లో మద్దతు తెలుపుతూ తమ పార్టీకి పోటీకి దిగబోదని ప్రకటించారు. సమైక్యవాదానికి బలం చేకూర్చే విధంగా వ్యవహరిస్తున్న వైయస్ జగన్ ఉప ఎన్నికల సందర్భంగా తాను తెలంగాణకు వ్యతిరేకం కాదని, తెలంగాణ ప్రజల మనోభావాలను గౌరవిస్తానని చెప్పడానికి సిద్ధపడ్డారు. తెలంగాణలోని ఉప ఎన్నికల్లో పార్టీ అభ్యర్థులను పోటీకి దించకపోవడం ద్వారా బహుళ ప్రయోజనాలను ఆయన ఆశిస్తున్నారు.

మొదట తాను తెలంగాణకు వ్యతిరేకిని కాదని చెప్పుకోవడానికి తన వ్యూహం పనికి వస్తుందని ఆయన భావిస్తున్నారు. తద్వారా తెరాస మద్దతు సంపాదించడానికి కూడా వీలవుతుంది. అవసరమైతే సాధారణ ఎన్నికల్లో కెసిఆర్‌తో పొత్తు పెట్టుకోవడానికి ఇప్పటి వ్యూహం పనికి వస్తుంది. కెసిఆర్‌కు, జగన్‌కు మధ్య రహస్య అవగాహన ఇప్పటికే ఉందని ప్రచారం జరుగుతోంది. అయితే, ఆ అవగాహనను వచ్చే ఎన్నికల నాటికి అధికారికంగా ప్రకటించడానికి ప్రస్తుత వ్యూహం పనికి వస్తుంది. తెలంగాణ ఉప ఎన్నికల తర్వాత వచ్చే మరో విడత ఉప ఎన్నికల్లో తెలంగాణ నియోజకవర్గాల్లో పోటీ చేసే కొండా సురేఖ వంటివారిపై తెరాస పోటీకి దించకుండా చూసుకోవడానికి ప్రస్తుత వ్యూహం పనికి వస్తుంది. కొండా సురేఖ తాను తెలంగాణ కోసమే రాజీనామా చేశానని చెబుతున్నారు కాబట్టి ఆ కారణంగా తెరాస ఆమెకు మద్దతు ప్రకటించడానికి వీలవుతుంది.

విప్‌ను ధిక్కరించి ప్రభుత్వానికి వ్యతిరేకంగా ఓటేసిన 18 మందిపై ఇప్పుడిప్పుడే స్పీకర్ నాదెండ్ల మనోహర్ అనర్హత వేటు వేసే అవకాశాలు లేవని, తెలంగాణ ఉప ఎన్నికలకు నోటిఫికేషన్ జారీ అయిన తర్వాతనే అనర్హత వేటు పడి రెండో విడత ఆ స్థానాలకు ఉప ఎన్నికలు వచ్చే విధంగా కాంగ్రెసు వ్యవహరిస్తోందనే ప్రచారం జరుగుతోంది. కాంగ్రెసు వ్యూహాన్ని దెబ్బ తీయడానికి ఇప్పుడు తెలంగాణ నియోజకవర్గాల్లో పోటీకి తమ పార్టీ అభ్యర్థులను పోటీకి దింపకపోవడమే మంచిదని జగన్ భావించినట్లు చెబుతున్నారు. అదే సమయంలో పోటీ చేసి ఓడిపోవడం కన్నా తెలంగాణ నియోజకవర్గాల్లో పోటీకి దిగకపోవడం వల్ల ఈ ప్రాంత ప్రజల సానుభూతిని పొందడానికి, రాజకీయంగా తెరాస మద్దతు సంపాదించుకోవడానికి, తాను తెలంగాణలో పర్యటించడానికి వీలవుతుందని ఆయన అనుకుంటున్నట్లు తెలుస్తోంది. ఆ రకంగా తెలంగాణకు అనుకూలంగా ఉన్నట్లు ఉప ఎన్నికల ద్వారా సంకేతాలు పంపుతున్న వైయస్ జగన్ ఈ ప్రాంత ప్రజల సానుభూతి ఏ మేరకు పొందుతారనేది వేచి చూడాల్సిందే.

English summary
YSR Congress president YS Jagan wants to garner Telangana people support for future politics.
న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X