గురువుకు 'హ్యాండ్'!: బాబుకు దగ్గరవుతున్న మోహన్‌బాబు

By Srinivas

Published: Tuesday, March 20, 2012, 9:50 [IST]

తన గురువు, దర్శకరత్న దాసరి నారాయణ రావుకు కాంగ్రెసు పార్టీ మొండి చేయి చూపుతూ.. తిరుపతి శాసనసభ్యుడు చిరంజీవికి ప్రాధాన్యత కల్పిస్తున్న నేపథ్యంలో కలెక్షన్ కింగ్ మోహన్ బాబు తెలుగుదేశం పార్టీ వైపు మొగ్గు చూపుతున్నట్లుగా కనిపిస్తోంది. రాజ్యసభ అభ్యర్థిగా కాంగ్రెసు పార్టీ అధిష్టానం చిరంజీవిని ఎంపిక చేసిన విషయం తెలిసిందే. చిరు తన ప్రజారాజ్యం పార్టీని కాంగ్రెసులో విలీనం చేసిన తర్వాత ఆయనకు పార్టీ చాలా ప్రాధాన్యం ఇస్తోంది. ఈ నేపథ్యంలో ఇటీవలె రెండో పర్యాయం రాజ్యసభ పదవి కాలాన్ని పూర్తి చేసుకున్న దాసరి నారాయణ రావుకు అధిష్టానం మరోసారి పదవి ఇచ్చేందుకు విముఖత చూపింది. అదే స్థానాన్ని చిరుతో భర్తీ చేసేంది. ఇరువురు కాపు సామాజిక వర్గానికి చెందిన వారే. అయితే దాసరికి కాంగ్రెసులో క్రమంగా ప్రధాన్యత తగ్గుతున్నట్లుగా కనిపిస్తుండటంతో మోహన్ బాబు అసంతృప్తికి లోనైనట్లుగా కనిపిస్తోంది. సోమవారం నాటి తన పుట్టిన రోజు వేడుకలకు తెలుగుదేశం పార్టీ అధినేత నారా చంద్రబాబు నాయుడును ఆయన ఆహ్వానించారు.

తన గురువును కాంగ్రెసు విస్మరించిన కారణంగానే ఆయన దశాబ్దానికి పైగా టిడిపికి, చంద్రబాబుకు దూరంగా ఉన్నప్పటికీ ఇప్పుడు ఆ పార్టీకి దగ్గరవుతున్నారని అంటున్నారు. మోహన్ బాబు తెలుగుదేశం పార్టీ నుండి రాజ్యసభకు వెళ్లారు. స్వర్గీయ నందమూరి తారక రామారావు మరణం, తదనంతర పరిణామాలతో ఆయన చంద్రబాబుకు దూరమయ్యారు. ఆయన టిడిపితో సంబంధాలు ఎప్పుడో తెంచుకున్నారు. రాజకీయాల వైపు చూడలేదు. అయితే దాసరికి రాజ్యసభ విషయంలో కాంగ్రెసు మొండి చేయి చూపిన అనంతరం ఆయన చంద్రబాబును తన పుట్టిన రోజు వేడుకలకు పిలవడం టిడిపికి దగ్గరవుతున్నారనడానికి సంకేతాలే అని పరిశీలకులు అంటున్నారు. అంతేకాదు త్వరలో ఖాళీ అవుతున్న తిరుపతి స్థానం నుండి తెలుగుదేశం పార్టీ తరఫున ఎమ్మెల్యేగా పోటీ చేసే అవకాశాలను కూడా కొట్టి పారేయలేమని చెబుతున్నారు. మరోవైపు మోహన్ బాబు పుట్టిన రోజు వేడుకలు కాబట్టి ఇది యాదృచ్ఛికంగానే జరిగి ఉంటుందని మరికొందరు అంటున్నారు.

Published On March 20, 2012