తెలంగాణ మార్చ్ కిరణ్‌కు ఎసరు పెడుతుందా?

హైదరాబాద్: తెలంగాణ మార్చ్ ముఖ్యమంత్రి కిరణ్ కుమార్ రెడ్డికి ఎసరు పెడుతుందా అనే అనుమానాలు వ్యక్తమవుతున్నాయి. అయితే, కిరణ్ కుమార్ రెడ్డి కన్నా తగిన నాయకుడు ముఖ్యమంత్రి పదవి కోసం లేరనే అభిప్రాయంతో కాంగ్రెసు అధిష్టానం ఉంది. అయితే, తెలంగాణ మార్చ్ విషయంలో తెలంగాణ మంత్రులు, కాంగ్రెసు తెలంగాణ నాయకుల వైఖరి కిరణ్ కుమార్ రెడ్డి వైఖరి తలనొప్పిగా మారింది. మార్చ్‌ను వాయిదా వేయించాలని ఆయన చేసిన సూచనను పట్టించుకోలేదు. పైగా, తెలంగాణ మార్చ్‌కు అనుమతి ఇవ్వాలంటూ తెలంగాణ మంత్రులు కూడా ముఖ్యమంత్రిపై ఒత్తిడి తెస్తున్నారు.

అనుమతి ఇస్తే అవాంఛనీయ సంఘటనలేవీ జరగవని నాయకులు హామీ ఇస్తున్నప్పటికీ ఏం జరుగుతుందో చెప్పలేని పరిస్థితే ఉందని అంటున్నారు. 2011 మార్చిలో జరిగిన మిలియన్ మార్చ్ సందర్బంగా హైదరాబాదులోని ట్యాంక్‌బండ్‌పై ఉద్యమకారులు సీమాంధ్ర ప్రముఖుల విగ్రహాలను ధ్వంసం చేశారు. అవి ఇప్పటికీ అలాగే ఉన్నాయి. వాటిని పునరుద్ధరించడానికి కూడా తెలంగాణ నాయకుల నుంచి, తెలంగాణవాదుల నుంచి వ్యతిరేకత ఎదురవుతోంది.

తెలంగాణ మంత్రుల మాటలను, కాంగ్రెసు తెలంగాణ నాయకుల ఒత్తిడిని నమ్మి మార్చ్‌కు అనుమతి ఇస్తే జరగరానిది జరిగితే తన పదవికి గండం రావడం ఖాయమనే విషయం కిరణ్ కుమార్ రెడ్డికి తెలుసు. అలాగే, తనకు వ్యతిరేకంగా చాలా మంది కత్తులు నూరుతున్నారనే విషయం కూడా ఆయన తెలుసు. కె. జానారెడ్డి వంటి మంత్రులను కిరణ్ కుమార్ రెడ్డి విశ్వసించడం లేదు. అందువల్ల వారి మాటలు విని నిర్ణయాలు తీసుకునే స్థితిలో కిరణ్ కుమార్ రెడ్డి లేరు.

సీమాంధ్ర నాయకుల ఆస్తులపై దాడులు జరగవచ్చునని నిఘా వర్గాలు చెబుతున్నాయి. హింసాత్మక సంఘటనలు జరిగితే అక్టోబర్ 1వ తేదీ నుంచి జరిగే అంతర్జాతీయ జీవవైవిధ్య సదస్సుపై ప్రభావం పడుతుంది. ఈ సదస్సుకు 193 దేశాల నుచంి దాదాపు 8 వేల మంది ప్రతినిధులు హాజరవుతున్నారు. అంతర్జాతీయ జీవవైవిధ్య సదస్సును ప్రభుత్వం అత్యంత ప్రతిష్టాత్మకంగా తీసుకుంటుంది. మరో వైపు ఈ నెల 29వ తేదీన వినాయక నిమజ్జనం ఉంది. దీంతో ముఖ్యమంత్రి కిరణ్ కుమార్ రెడ్డికి పరిస్థితి కత్తి మీది సాములా ఉంది.

సిపిఎం మినహా తెలంగాణకు చెందిన అన్ని రాజకీయ పార్టీల నాయకులు తెలంగాణ మార్చ్‌లో పాల్గొనేందుకు సిద్ధపడ్డారు. మార్చ్‌కు వారే ముందుండే ఉవకాశం ఉంది. తెలంగాణ మార్చ్‌ను తన కాళ్ల కిందికి నీరు తెచ్చేందుకు కొంత మంది వాడుకుంటున్నారని కూడా ముఖ్యమంత్రి అనుమానిస్తున్నట్లు సమాచారం. ఏమైనా, గండం ఎలా గడుస్తుందో వేచి చూడాల్సిందే.

English summary

CM Kiran kumar Reddy is in tremendous pressure regarding Telangana March to be held on September 30, in the wake of vio diversity convention and Ganesh immersion.