కుప్పంలో బాబుకు ఎదురు

చంద్రబాబు నాయుడు కుప్పంలో ఓడిపోవచ్చన్న సూచనలు పత్రికల్లో కన్పిస్తున్నాయి. తాను తొమ్మిదేళ్ళ పాటు ముఖ్యమంత్రిగా ఉన్నప్పుడు కుప్పం నియోజకవర్గాన్ని చంద్రబాబు బాగా అభివృద్ధి చేశారు. అయినా ఓటర్లు ఆ అంశానికి ఈసారి పెద్ద ప్రాధాన్యం ఇవ్వడం లేదని తెలుస్తోంది. అందుకే చంద్రబాబు బాలకృష్ణతో, కుమారుడు లోకేష్ తో ఇక్కడ విస్తృతంగా ప్రచారం చేయించారు. బాబు మీద రెండు సార్లు కాంగ్రెస్ అభ్యర్ధిగా పోటీ చేసి ఓడిపోయిన రెడ్డి మీద జనం సానుభూతి ఓట్లు కురిపించినట్టు తెలుస్తోంది. చంద్రబాబును ఓడించడానికి వైఎస్ అనేక వ్యూహాలను ఇక్కడ అమలు చేసినట్టు తెలుస్తోంది. కుప్పంలో పోలింగ్ శాతం బాగా పెరగడం చంద్రబాబుకు వ్యతిరేకాంశమని చెబుతున్నారు.

తిరుపతిలో చిరంజీవి ఎదురీదుతున్నారు. కాంగ్రెస్ అభ్యర్ధి కరుణాకర్ రెడ్డి అన్ని పార్టీల్లోని రెడ్డి నాయకుల మద్దతును సమీకరించుకున్నట్టు తెలుస్తోంది. అందుకే చిరంజీవి చివరి రెండు రోజులూ తిరుపతిలోనే మకాం వేసి గెలుపు కోసం బాగా కష్టపడవలసి వచ్చింది. ఇక్కడ పోలింగ్ శాతం తక్కువగా ఉండడం కాంగ్రెస్ అభ్యర్ధి కరుణాకర్ రెడ్డికి కలిసి వచ్చే అంశమని చెబుతున్నారు. తెలుగుదేశం అభ్యర్ధి సీరియస్ గా ప్రచారం చేయకపోవడం కూడా కాంగ్రెస్ కు మంచిదంటున్నారు. పాలకొల్లులో కూడా చిరంజీవి గెలుపు అంత ఈజీ కాదని వినిపిస్తోంది. అక్కడ ఆయనకు తెలుగుదేశం అభ్యర్ధి అయిన డాక్టరుకు హోరాహోరీ పోరు సాగింది. చిరంజీవి ఓడినా, గెలిచినా అతికొద్ది ఓట్ల వ్యత్యాసంతోనే అని పరిశీలకులు చెబుతున్నారు.